Ապրիլի 6-ից 16-ը Թուրքիայի Անթալիա քաղաքում կանցկացվի ծանրամարտի Եվրոպայի առաջնությունը: Հայաստանը կներկայացնեն 69 կգ քաշայիններ, քասախցի Սամվել Գրիգորյանը , սամաղարցի Վանիկ Ավետիսյանը, 85 կգ քաշայիններ, երեւանցի Աղասի Աղասյանը, վանաձորցի Վահրամ Գեւորգյանը, 94 կգ քաշայիններ, երեւանցի Վարդան Դավթյանը, բանակային Նորայր Վարդանյանը եւ գերծանրքաշային բանակային Հայկ Հակոբյանը: Առաջատարներից Եվրոպայի առաջնությանը չեն մեկնի Առաքել եւ Արայիկ Միրզոյանները, Տիգրան Մարտիրոսյանը, Արա Խաչատրյանը եւ Ռուբեն Ալեքսանյանը: Հայաստանը նաեւ կանանց թիմ չի գործուղի Անթալիա: Նրանք բոլորը անհատական ծրագրով նախապատրսատվում են Լոնդոնի Օլիմպիական խաղերին:
Հավաքականը մարտի 23-ից Աբովյանում անցկացնում է հավաք:
Առաջնության նախօրյակին Անթալիայում տեղի կունենա Եվրոպայի ծանրամարտի ֆեդերացիայի հաշվետու-ընտրական համաժողովը: Կմասնակցեն եվրոպական 51 երկրների ներկայացուցիչներ, նրանց թվում նաեւ Հայաստանի ծանրամարտի ֆեդերացիայի նախագահ Սամվել Խաչատրյանը եւ գլխավոր քարտուղար Փաշիկ Ալավերդյանը :
Նախագահի պաշտոնին հավակնում են գործող նախագահ, իտալացի Անտոնիո Ուրսոն, փոխնախագահներ, օլիմպիական կրկնակի չեմպիոն, բելառուս Ալեքսանդր Կուրլովիչը, օլիմպիական չեմպիոն, ռումինացի Նիկո Վլադը եւ Լեհաստանի ֆեդերացիայի նախագահ Զիգմունդ Վասիյելան, հաղորդում է ՀԱՕԿ-ի մամուլի քարտուղարությունը:
Հետևեք NEWS.am SPORT-ին Facebook-ում, Twitter և Telegram-ում