Բուլղարիայի մայրաքաղաք Սոֆիայում անցկացվող ձյուդոյի Եվրոպայի մինչեւ 17 տարեկանների առաջնությունում Հայաստանի ներկայացուցիչ Լյովա Սրապյանը նվաճել է բրոնզե մեդալ:
60 կգ քաշայինների պայքարում պատանի ձյուդոիստը 6 գոտեմարտ է անցկացրել: Բրոնզե մեդալի համար պայքարում ժամանակից շուտ վազարիով հաղթել է Սերբիայի ներկայացուցիչ Վեյլոկո Վարչիչին:
Հայաստանի հավաքականների թիմերի պատասխանատու, մեծահասակների հավաքականի գլխավոր մարզիչ Հովհաննես Դավթյանը NEWS.am Sport-ի թղթակցի հետ զրույցում Սոֆիայից նշեց, որ Հայաստանի թիմը ուժեղ կազմով է մասնակցում ԵԱ-ին:
«Շատ ուրախ եմ Լյովա Սրապյանի բրոնզե մեդալի համար: Շատ մեծ մրցակցություն է: 6 հաղթանակ է տարել բրոնզե մեդալի համար: Մեծ պայքար է գնում: Առաջնությանը մասնակցում է 44 երկրի 511 մարզիկ՝ 275 տղա, 236 աղջիկ։ Շատ դժվար է այսօր ձյուդոյում արդյունք ցույց տալ եւ մեդալ նվաճել: Լավ թիմով ենք մասնակցում Եվրոպայի առաջնությանը: Առաջին մրցումային օրվա բոլոր մասնակիցներն էլ հաղթանակներ ունեցան:
Այսօր տատամի են դուրս եկել նաեւ -50 կգ քաշային Շավարշ Նահապետյանը, Արթուր Դավիդյանը, -55 կգ քաշային Հայկ Դարբինյանը, -60 կգ՝ Օզմանյան Ջոնիկը:
-50 կգ քաշային Շավարշ Նահապետյանը 5 գոտեմարտ հաղթելուց հետո պարտվել է բրոնզե մեդալի համար պայքարում եւ գրավել 5-րդ տեղը:
-55 կգ քաշային Հայկ Դարբինյանը 4 հաղթանակ է տարել, 7-րդ տեղ զբաղեցրել:
Մյուս մասնակիցները մեկ-երկու հաղթանակ տանելուց հետո պարտվել են:
Հայաստանի թիմի միակ աղջիկ Լարիսա Աթոյանը (-48 կգ) պարտվել է մեկնարկում: Լարիսան նոր է ընդգրկվել հավաքական, սա նրա առաջին փորձն էր Եվրոպայի առաջնությունում»,- ասաց Հովհաննսե Դավթյանը:
Մ17 Եվրոպայի առաջնության երկրորդ մրցումային օրը տատամի դուրս կգա Հայաստանի երեք ներկայացուցիչ՝ 66 կգ քաշային Նարեկ Դանիելյանը, 73 կգ քաշային Տիգրան Սարուխանյանը եւ Արման Կեչոյանը:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում