Վարդան Փահլեւանյանն օլիմպիական ուղեգիր նվաճեց

Հայ մարզիկները հաջող հանդես եկան Թբիլիսիում կայացած աթլետիկայի Վրաստանի բաց առաջնությունում:

Հայաստանի եւ Արցախի  10 պատվիրակներից առավել հաջող հանդես եկավ երեւանցի հեռացատկորդ Վարդան Փահլեւանյանը: Նա ցուցադրեց 8 մ 12 սմ արդյունք՝ հռչակվելով Վրաստանի չեմպիոն: Փահլեւանյանը երկու սմ-ով գերազանցեց օլիմպիական վարկանիշային ցուցանիշը՝ նվաճելով լոնդոնյան խաղերի ուղեգիր: Հայաստանի օլիմպիական մարզիկների թիմը հասավ 22-ի, հաղորդում է ՀԱՕԿ-ի պաշտոնական կայքը:

Վանաձորցի հեռացատկորդ Գոռ Ներկարարյանը 756 սմ ցուցանիշով գրավեց երրորդ տեղը եւ իրավունք ստացավ մասնակցելու Իսպանիայում հուլիսին կայանալիք աշխարհի երիտասարդական առաջնությանը:

Երեւանցի Դիանա Խուբեսերյանը առաջինը ճանաչվեց 100 եւ 200մ վազքում: Անգերազանցելի էր նաեւ հեռացատկորդ Սաթենիկ Հովհաննիսյանը, ում ցուցանիշն էր՝ 620 սմ (սպորտի վարպետի արդյունք է): Եռացատկում Սաթենիկի ցուցանիշն էր՝ 12մ 69 սմ:

800 մետր վազքում առաջին տեղ գրավեց վանաձորցի Գայանե Բուլղադարյանը՝ 2ր 14.95 վ: 

Երկրորդ մրցանակակիր դարձան  երեւանցի Սամվել Գրիգորյանը (400մ արգելավազք) եւ արցախցի Աշոտ Հայրապետյանը (3000 մ խոչընդոտավազք): Արցախի մեկ այլ ներկայացուցիչ Արթուր Պետրոսյանը բրոնզե մեդալակիր դարձավ  800մ վազքում: Նման պատվի արժանացավ նաեւ արտաշատցի արգելավազորդ Ռոման Ալեքսանյանը (400 մ` 57,64վ):

Հայաստանի հավաքականին Թբիլիսի ուղեկցած վաստակավոր մարզիչ Զաուր Սարգսյանը դրական է գնահատել թիմի մրցելույթները:

Հետևեք NEWS.am SPORT-ին Facebook-ում, Twitter և Telegram-ում