Ռոմարիո. Սա մեր Խայտառակության Գավաթն էր

Ես համաձայն չեմ, որ ամեն ինչի մեղավորը ֆուտբոլիստներն են եւ Սկոլարին. ժամանակն է ասել ճշմարտությունը, բաց նամակում նշել է Բրազիլիայի հավաքականի կազմում 1994թ. աշխարհի չեմպիոն եւ լավագույն ֆուտբոլիստ, Բրազիլիայի խորհրդարանի պատգամավոր, Բրազիլիայի սոցիալիստական կուսակցության ներկայացուցիչ Ռոմարիոն՝ ներկայացնելով բրազիլական ֆուտբոլի ճգնաժամի պատճառները, փոխանցում է 101greatgoals-ը:

«Բացահայտ է դառնում, որ մեր ֆուտբոլն արդեն երկար տարիներ դեգրադացվում է: Մեր ամենասիրած մարզաձեւը խորագույն ճգնաժամի մեջ է, եւ գլխավոր մեղավորները ֆուտբոլի ֆեդերացիայի կոռուպցիոներներն ու ավազակներն են: Չորս տարի է ես խոսում եմ ֆեդերացիայի խնդիրների մասին, բայց ոչ ոք չի լսում: Ամբողջությամբ կոռումպացված այդ կառույցը վատնում է մեր ժառանգությունը, մեր գույները, մեր խաղացողներին: Պետք է հասկանալ, որ ֆուտբոլը բիզնես է, որը հսկայական գումար է բերում: Բրազիլիայի նախագահ Դիլմա Ռուսեֆը երբեք ինձ չի աջակցել: Ես մի քանի անգամ նրան խնդրել եմ միջամտել, բայց ապարդյուն:

Բրազիլական ֆուտբոլում կոռուպցիան սկսվում է ակումբներից: Նրանք են պատասխանատու խարդախ կառավարման, երիտասարդական ֆուտբոլում ներդրումներ չանելու, հարկերից խուսափելու, պարտքերի, մշտական սնանկությունների համար: Այդ ամենը ոչնչացնում է մեր ֆուտբոլը:

Մեզ նվաստացրին, եւ մենք չեն խաղա «Մարականայում», որի նորոգման համար մեկ միլիարդ դոլար ենք ծախսել: Ֆեդերացիայի ղեկավարը հավաքականի հանդերձարանից վռնդում է աշխարհի չեմպիոն թիմի ավագ Կաֆուին: Դա սովորական երեւույթ է մեր այսօրվա ֆուտբոլում: Եզրափակիչից հետո նախագահը գավաթը կհանձնի այլ թիմի, իսկ մենք կմնանք մեր պարտքերի եւ կոռուպցիայի հետ: Սա մեր Խայտառակության Գավաթն էր»,- բաց նամակում գրել է Ռոմարիոն:

Հիշեցնենք, որ աշխարհի առաջնության կիսաեզրափակիչում Բրազիլիայի հավաքականը 1:7 հաշվով պարտվեց Գերմանիային եւ բրոնզե մեդալների համար կմրցի հոլանդացիների հետ:

Հետևեք NEWS.am SPORT-ին Facebook-ում, Twitter և Telegram-ում