Կարեն Ասլանյան․ Նվաճեցի աշխարհի չեմպիոնի տիտղոսը, որովհետեւ ինքս ինձ չխանգարեցի

Անչափ ուրախ եմ այս հաղթանակին: Բարդ տրվեց հաղթանակս, բայց ոչ թե հաղթելն էր բարդ, այլ ճանապարհը դեպի հաղթանակ: Այս անգամ ես հաղթեցի, որովհետեւ ես ինքս ինձ չխանգարեցի:

Այս մասին NEWS.am Sport-ի թղթակցի հետ զրույցում Աստանայից ասաց հունահռոմեական ոճի ըմբշամարտի աշխարհի նորընծա չեմպիոն Կարեն Ասլանյանը:

Եվրոպայի փոխչեմպիոն, աշխարհի առաջնության բրոնզե մեդալակիր, Տոկիոյի Օլիմպիական խաղերի մասնակից Կարեն Ասլանյանը Ղազախստանի մայրաքաղաք Աստանայում ավարտված հունահռոմեական ոճի ըմբշամարտի աշխարհի առաջնությունում ադրբեջանցու նկատմամբ տպավորիչ հաղթանակով հռչակվեց չեմպիոն:

60 կգ քաշայինների եզրափակիչում 31-ամյա Ասլանյանը գոտեմարտեց 2024 թ. աշխարհի չեմպիոն, Եվրոպայի կրկնակի չեմպիոն, ադրբեջանցի Նիհադ Զահիդ Մամադլիի հետ եւ հաղթեց 8:4 հաշվով:

Եվրոպայի փոխչեմպիոնը աշխարհի առաջնության ոսկե մեդալի ճանապարհին 5 գոտեմարտ անցկացրեց. որակավորման փուլում ժամանակից շուտ հաղթեց Կոռնելիու Ռուսուին (Մոլդովա, 10:0), 1/8 եզրափակիչում պարտության մատնեց Աֆթանդիլ Ուուլուին (Ղրղսզտան,8:0), քառորդ եզրափակիչում կրկին ժամանակից շուտ տպավորիչ հաղթանակ տարավ Ուզուդբեկ Խալիմբոեւի նկատմամբ (Ուզբեկստան,9:0), կիսաեզրափակիչում հաղթեց աշխարհի փոխչեմպիոն, Եվրոպայի կրկնակի չեմպիոն, կրկնակի օլիմպիական չեմպիոն Արմեն Նազարյանի որդի, Էդմոնդ Նազարյանին (Բուլղարիա, 12:4):

Կարեն, շնորհավորում եմ աշխարհի չեմպիոնի տիտղոսը նվաճելու կապակցությամբ: Երկար ճանապարհ ես անցել այս հաղթանակին հասնելու համար: Բարդ տրվե՞ց:

Շնորհակալ եմ շնորհավորանքի համար: Անչափ ուրախ եմ այս հաղթանակին: Բարդ տրվեց հաղթանակս, բայց ոչ թե հաղթելն էր բարդ, այլ ճանապարհը դեպի հաղթանակ: Շնորհակալ եմ Աստծուն այն ամենի համար, ինչ ինձ տվել է, նաեւ այն բարդ ճանապարհի համար, որով անցա եւ հասա այստեղ:

Ինչպիսի՞ նշանակություն ունի քեզ համար այս հաղթանակը: Ի՞նչ էր նախկինում քեզ պակասում չեմպիոն դառնալու համար:

Հիմա ավելի համոզվել եմ, որ նախկինում իմ պարտություններում, վերջին պահին ձախողելու մեջ ոչ ոք մեղավոր չի եղել, մրցավարական միջամտություններ չեն եղել: Այս հաղթանակով համոզվեցի, որ եթե պատրաստ ես, ուժեղ ես, կհաղթես: Իհարկե, հակառակն էլ է լինում, բայց որեւէ մեկին պետք չի մեղադրել չհաղթելու մեջ:

Այս անգամ ես հաղթեցի, որովհետեւ ես ինքս ինձ չխանգարեցի: Աշխարհի առաջնությանը մոտեցել էի շատ հանգիստ, նախնական գոտեմարտերն էլ շատ հանգիստ անցան մինչեւ եզրափակիչ: Նույնը եզրափակիչում եղավ, ես ինձ չխանգարեցի, որի համար շատ ուրախ եմ:

Ոսկե մեդալի ճանապարհին 5 գոտեմարտ անցկացրիր: Ո՞րը կառանձնես:

Կառանձնացնեմ կիսաեզրափակիչ գոտեմարտը, որտեղ մրցում էի Էդմոնդ Նազարյանի հետ: Էդմոնդը բարձրակարգ եւ շատ ուժեղ ըմբիշ է, նաեւ մտերիմ ընկերներ ենք: Դժվար ստացվեց նրա հետ գոտեմարտը, որովհետեւ նա եւ շատ ուժեղ է, եւ մենք էլ մտերիմ ենք: Մի քիչ հուզական գոտեմարտ ստացվեց. այդ առումով բարդ էր:

Եզրափակիչում ադրբեջանցու հետ էիր վիճարկում տիտղոսը: Ի՞նչ կասես Մամադլիի մասին:

Չէի մտածում այն մասին, որ մրցակիցս ադրբեջանցի է, ոչ էլ կենտրոնացել էի այն մտքի վրա, որ եզրափակիչ գոտեմարտ ենք անցկացնում: Ես ուղղակի դուրս էի եկել մրցագորգ իմ պայքարը տանելու: Ոչ միայն եզրափակիչից, այլեւ բոլոր գոտեմարտերիցս առաջ աղոթք էի անում, Աստծուն խնդրում էի հաղթանակ, եթե ես արժանի եմ դրան:

Մարզական կարիերայիդ ընթացքում առաջին անգամ էիր մասնակցում աշխարհի առաջնության եզրափակիչին: Այսօր առավոտյան ի՞նչ մտքերով էիր արթնացել:

Ոչ մի այլ մտքեր չունեի: Արթնացել էի այն մտքերով, որ կշռվեմ, հաց ուտեմ եւ պատրաստվեմ գոտեմարտիս, այսինքն՝ ամեն ինչ սովորականի պես, ինչպես մյուս մրցաշարերում է լինում: Այս աշխարհի առաջնությունում շատ հանգիստ էի, եզրափակիչից առաջ եւս:

Այս պահին ի՞նչ հույզեր են քեզ պատել: Քո պատվին հնչեց Հայաստանի հիմնը: Ի՞նչ էմոցիաներ ապրեցիր պատվո հարթակին:

Պատվո հարթակին լիարժեք հոգեբանական բավարարվածություն էի զգում: Այս հաղթանակն իմ այսքան տարվա աշխատանքի, նաեւ բոլոր այն մարդկանց աշխատանքի գնահատականն է, արդյունքը, որոնք այս տարիների ընթացքում կողքիս են եղել, սպասել այս հաղթանակին, աջակցել են ինձ ամեն ինչում: Սա բոլորի հաղթանակն է: Ես չեմ համարում, որ միայնակ հասա այս տիտղոսին:

Տոկիոյի Օլիմպիական խաղերից հետո տեւական ժամանակ դադար վերցրիր կարիերայում: Ի՞նչը քեզ ստիպեց նորից հավատալ ինքդ քեզ:

Երբեք չեմ կորցրել հավատս: Եթե կորցնեի, չէի մարզվի: Ամեն անգամ ինչ-որ բան ինձ խանգարում էր, եւ ես չէի կարողանում հաղթել: Երբ հասկացա, որ այդ՝ ինչ-որ խանգարող բանը ես ինքս եմ, ամեն ինչ փոխվեց: Ժամանակի ընթացքում հասկացա, որ ես էի ինձ խանգարում: Ես նվաճեցի աշխարհի չեմպիոնի տիտղոսը, որովհետեւ ես ինքս ինձ չխանգարեցի:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում