Հայերը պարբերաբար հետաքրքվում էին իմ գործերով: Ինձ համար Հայաստանի հավաքականից հրավեր ստանալն իսկապես անկանկալ է՝ շատ հաճելի անակնկալ:
Այս մասին NEWS.am Sport-ի թղթակցի հետ զրույցում ասաց Ֆինլանդիայի «Յարո» ակումբի 21-ամյա կիսապաշտպան Ալեքսանդր Թումասյանը, ով առաջին անգամ հրավիրվել է ֆուտբոլի Հայաստանի ազգային հավաքական:
Ալեքսանդր, այսօր պարզ դարձավ, որ հրավիրվել ես Հայաստանի ազգային հավաքական: Անկեղծ ասած, շատ քիչ տեղեկություն ունենք քո մասին: Կպատմե՞ս որտեղից է ընտանիքդ, ինչպես ես սկսել զբաղվել ֆուտբոլով:
Ես հայ եմ: Հայրս հայ է, իսկ մայրս Ուկրաինայից է: Ամբողջ ընտանիքով շատ ուրախացանք այս հրավերի համար: Հայերեն չգիտեմ, բայց այս հրավերը ինձ համար լրացուցիչ մոտիվացիա կլինի հայերեն սովորելու հարցում: Հայաստանում չեմ եղել: Ֆուտբոլով սկսել եմ մարզվել Ռուսաստանի Ռոստով քաղաքում, որտեղ ծնվել եմ: Մարզվում էի Ռոստովի դպրոցում, հետո հայտնվեցի «Ռոստովի» ակումբի երկրորդ թիմում:
Ինչպե՞ս հայտնվեցիր Ֆինլանդիայում:
Հայրս իմ ելույթների տեսագրությունն ուղարկեց «Յարոյի» մարզիչին: Նա հետաքրքրվեց եւ զանհագարեց հորս՝ ասելով, որ պետք է մեկնեմ Ֆինլանդիա: Նախորդ մրցաշրջանում մեկնեցի այնտեղ: Արդարացրի սպասելիքները, իսկ վերջերս մեկ տարով երկարաձգեցի պայմանագիրը «Յարոյի» հետ: Արդեն երկրորդ տարին է այստեղ եմ:
Ո՞ր խաղային դիրքում ես ավելի վստահ զգում քեզ:
Հենակետային կիսապաշտպանի:
Նախկինում հետեւե՞լ ես Հայաստանի հավաքականի ելույթներին:
Այո, իհարկե: Այսօր շատ եմ կարդում, որ սա վերջին ժամանակների ամենաուժեղ հավաքականն է: Հիմա իսկապես հնարավորություն է ստեղծվել հայտնվել Եվրոպայի առաջնության եզրափակիչ փուլում:
Մինչեւ այս հրավերը կապ ունե՞իր Հայաստանի ֆուտբոլի ֆեդերացիայի հետ:
Ինձ հետ շփվում էին, բայց չգիտեմ դա ֆեդերացիայից էր, թե՝ ոչ: Հայերը պարբերաբար հետաքրքվում էին իմ գործերով: Ինձ համար սա իսկապես անակնկալ է՝ շատ հաճելի անակնկալ:
Այսօ՞ր իմացար, որ հրավիրվել ես, թե գիտեիր վաղուց:
Ես գիտեի, որ իմ թեկնածությունը քննարկվում է, բայց հստակ իմացա այսօր: Ինձ հետ պարբերաբար կապվում էին, հետաքրրքվում, թե ինչպես են գործերս: Ասել էին, որ ազգային հավաքականի մարզիչը հետաքրքված է ինձանով, ես էլ ասացի, որ շատ կցանկանամ արդարացնել սպասելիքները:
Քանի որ երբեք Հայաստանում չես եղել, հնարավո՞ր է հավաքից մի քանի օր շուտ ժամանես Երեւան:
Որքան գիտեմ, թիմը հավաքվում է ամսի 21-ին: Այժմ Ֆինլանդիայում ֆուտբոլային թեժ մրցաշրջան է, այդ պատճառով չեմ կարողանա շուտ գալ:
Ալեքսանդր, բարի գալուստ Հայաստան:
Շատ-շատ շնորհակալ եմ:
Վերա Մարտիրոսյան
Հետևեք NEWS.am SPORT-ին Facebook-ում, Twitter և Telegram-ում