Ես կմասնակցեի Օլիմպիական խաղերին չեզոք դրոշով, մարզիկներին պետք է հասկանալ եւ չքննադատել մասնակցության համար, ասել է սուսերամարտի կրկնակի օլիմպիական չեմպիոն, ռուսաստանցի Յանա Եգորյանը՝ մեկնաբանելով Միջազգային օլիմպիական կոմիտեի որոշումը 2018թ. ձմեռային Օլիմպիական խաղերում Ռուսաստանի պատվիրակությանը մասնակցության իրավունքից զրկելու մասին:
Հակադոպինգային կանոնները երբեւէ չխախտած ռուսաստանցի մարզիկները օլիմպիական ուղեգիր նվաճելու դեպքում, հնարավորություն կստանան մասնակցել ձմեռային Օլիմպիական խաղերին, սակայն չեզոք դրոշի տակ: Նրանք կկոչվեն «օլիմպիական մարզիկներ Ռուսաստանից»:
«Կարծում եմ՝ ՄՕԿ-ի որոշումը լիակատար ամենաթողություն է: Սակայն եթե կա մասնակցության հնարավորություն, մարզիկները պարտադիր պետք է մեկնեն: Ես ինքս կմասնակցեի: Ինչո՞ւ պետք է մարդիկ հրաժարվեն իրենց երազանքից: Նրանք դրա համար հենց այնպես չեն տանջվել 10, 15, 20 տարի:
Երկիրը պետք է աջակցի իր մարզիկներին: Եթե նա մասնակցում է Խաղերին չեզոք դրոշով, դա դեռ չի նշանակում, որ Ռուսաստանը չի ներկայացնում: Ամեն դեպքում, նա մեր մարզիկն է: Այո, չի լինի հիմն, բայց դա չի նշանակում, որ նա մեր մարզիկը չէ:
Կարծում եմ՝ Վլադիմիր Պուտինը պետք է ազդի այս հարցում, որպեսզի մարզիկները մեկնեն Խաղերին չեզոք դրոշով: Մաքուր մարզիկները պետք է չտուժեն:
Եթե այսպիսի խնդիր լինի նաեւամառային մարզաձեւերում, ես առանց մտածելու կմասնակցեմ: Իսկ հիմնը հաղթանակից հետո կարելի է եւ Ռուսաստանում երգել: Պետք է մեկնել եւ հաղթել»,- Ինստագրամում տեղի ունեցած ուղիղ եթերում ասել Յանա Եգորյանը:
2018թ. ձմեռային Օլիմպիական խաղերը փետրվարի 9-ից 25-ը կընդունի Հարավային Կորեայի Պհենչհան քաղաքը:
Հետևեք NEWS.am SPORT-ին Facebook-ում, Twitter և Telegram-ում