Ռիցոլի. Կրամերը բախումից հետո չէր հասկանում, որ ԱԱ եզրափակիչում է

Գերմանիայի հավաքականի կիսապաշտպանը Քրիստոֆ Կրամերը աշխարհի առաջնության եզրափակիչում ուղեղի ցնցում ստանալուց հետո չի գիտակցել, որ մասնակցում է եզրափակիչ հանդիպմանը: Այդ մասին ասել է Գերմանիա - Արգենտինա (1:0) հանդիպման իտալացի գլխավոր մրցավար Նիկոլա Ռիցոլին, որի խոսքով Կրամերից ստացել է շատ տարօրինակ հարց:

«Հարվածից հետո Կրամերը մոտեցավ ինձ եւ հարցրեց. «Մրցավար, սա եզրափակի՞չն է»: Ես մտածեցի, թե նա կատակ է անում եւ խնդրեցի կրկնել հարցը: Նա ասաց. «Ինձ անհրաժեշտ է ստույգ իմանալ, թե ինչ խաղ է սա»: Ես հաստատեցի, որ եզրափակիչն է: Նա շնորհակալություն հայտնեց: Դրանից հետո նրան փոխարինեցին»,- Ռիցոլիի խոսքը մեջեբրում է La Gazzetta dello Sport-ը:

Հիշեցնենք, որ աշխարհի առաջնության եզրափակիչի նախավարժանքի ժամանակ վնասվածք ստացավ գերմանացիների կիսապաշտպան Սամի Խեդիրան, եւ նրան փոխարինեց Քրիստոֆ Կրամերը: Սակայն արդեն 18-րդ րոպեին արգենտինացիների հետ բախման ժամանակ Կրամերը ուղեղի ցնցում ստացավ եւ 13 րոպե անց փոխարինվեց:

Հետևեք NEWS.am SPORT-ին Facebook-ում, Twitter և Telegram-ում