Հայաստանի չեմպիոն «Արարատ-Արմենիայի» և Հայաստանի ազգային հավաքականի կիսապաշտպան Պետրոս Ավետիսյան խոսել է «Ուրարտուի» սեփականատեր Ջևան Չելոյանցի հայտարարության մասին:
«Հարգելի ֆուտբոլասերներ, ցանկանում եմ անդրադառնալ «Ուրարտու» ֆուտբոլային ակումբի սեփականատիրոջ՝ իմ հասցեին արված վիրավորական արտահայտություններին։ Ցավում եմ, որ նա մինչև հիմա տեղյակ չէ, թե որն է եղել մեկ ակումբից մյուսը տեղափախվելու իմ մոտիվացիան, ինչի հետևանքով ոչինչ չի փոխվում իր ակումբում։
Ուզում եմ, որ բոլորդ իմանաք, որ ոչ «Բանանցից» «Փյունիկ», ոչ էլ «Փյունիկից» «Արարատ-Արմենիա» տեղափոխվելիս իմ աշխատավարձը գրեթե չի փոխվել։ Երկու տեղափոխությունների ժամանակ էլ գումարային հարցեր ես նույնիսկ չեմ քննարկել և թե ինչքան եմ ստանալու, իմացել եմ միայն ամենավերջին պահին՝ պայմանագիրը ստորագրելիս։
Իմ միակ մոտիվացիան եղել է ֆուտբոլ խաղալու երազանքը, որից ես գրեթե զրկված էի «Բանանցում»՝ Տիտո Ռամալյոյի գլխավորությամբ, երբ ինձ ուղիղ տեքստով ասում էին, որ հույսեր չեն կապում ինձ հետ։ Այնպես, ինչպես իրենց ֆուտբոլային երազանքն իրագործելու հնարավությունից մինչև հիմա զրկված են «Բանանցի» (այժմ «Ուրարտուի») շատ տաղանդավոր հայ ֆուտբոլիստներ, որոնք աճ գրանցելու համար իրենց լավագույն տարիներն անցկացնում են լավագույն դեպքում պահեստայինների նստարանին։
Ի՞նչ էր մնում ինձ անել, երբ մարզիչներն ինձ հետ հույսեր չէին կապում, բայց նաև թույլ չէին տալիս հեռանալ։ Ես միշտ երախտապարտ կլինեմ «Բանանցին» այն կրթության համար, որն այնտեղ ստացել եմ, բայց այս իրավիճակում մնում էր միայն ամեն ինչ անել, որպեսզի փախնեմ այդ՝ Չ տառով սկսվող մարդու ակումբից և փրկել կարիերաս։ Ամեն ինչ անել, որպեսզի գնալ այլ՝ ավելի լավ ակումբ, որտեղ ինձ հավատում ու վստահում են, գոլեր խփել, հաղթել ինձ հետ հույսեր չկապող մարզչի թիմին, չեմպիոն դառնալ, հրավիրվել հավաքական և ապացուցել, որ ես արժանի եմ կանաչ խաղադաշտում տեղ ունենալուն, ինչը և ես արել եմ և ինչը, ինչպես փորձն է ցույց տալիս, չի հաջողվում անել «Բանանցում» մնացած գրեթե ոչ մի խաղացողի»,- Ֆեյսբուքի իր էջում գրել է Պետրոս Ավետիսյանը:
Հիշեցնենք, որ հոկտեմբերի 1-ին տեղի ունեցած մամուլի ասուլիսի ժամանակ Ջևան Չելոյանցը ասել էր. «Երբ դեռ նոր եկա «Բանանց», առաջին քայլս երիտասարդ տաղանդավոր ֆուտբոլիստի` արտասահման բուժման ուղարկելն էր: Ինձ համար կարևոր չէր, շատ տաղանդավոր է նա, թե ոչ, կարևոր էր, որ նա «Բանանցի» ֆուտբոլիստ է: Նա բուժվեց եկավ, իսկ հետո եկավ և ասաց, որ ուրիշ ակումբ նրան 150 դոլար ավելին էր առաջարկել: Այդ ակումբը նրա համար Հայաստանի համար աներևակայելի գումար էր առաջարկել: Ես ասացի, որ «գ»-ով սկսվող ֆուտբոլիստների համար մենք գումար չենք վերցնում, թող անվճար տեղափոխվի»:
Հետևեք NEWS.am SPORT-ին Facebook-ում, Twitter և Telegram-ում
18:01 , 26 ապրիլի 
17:05 , 26 ապրիլի 
16:06 , 26 ապրիլի 
15:26 , 26 ապրիլի 
14:52 , 26 ապրիլի 
14:03 , 26 ապրիլի 
13:45 , 26 ապրիլի 
12:22 , 26 ապրիլի 
11:14 , 26 ապրիլի 
10:56 , 26 ապրիլի 
