Աշխարհի գործող չեմպիոններ Արթուր Ալեքսանյանը եւ Մաքսիմ Մանուկյանը դուրս եկան Ռուսաստանի Կասպիյսկ քաղաքում շարունակվող հունահռոմեական ըմբշամարտի Եվրոպայի առաջնության կիսաեզրափակիչ:
Ռիո-2016 օլիմպիական չեմպիոն Արթուր Ալեքսանյանը 97 կգ քաշային կարգի երկրորդ գոտեմարտում ժամանակից շուտ 8:0 հաշվով հաղթեց հույն Լոակրատիս Կեսիդիսիին: Ալեքսանյանը պայքարը սկսել էր 1/8 եզրափակիչից, որտեղ 1 րոպե 40 վայրկյանում հաղթել էր Իսրայելը ներկայացնող հայազգի Ռոբերտ Ավանեսյանին: Կիսաեզրափակիչում նրա մրցակիցը կլինի ֆինն Էլիաս Կուսմանենը:
82 կգ քաշային Մաքսիմ Մանուկյանը քառորդ եզրափակիչում 5:2 հաշվով պարտության մատնեց բուլղարացի Դանիել Ալեքսանդրովին: Մանուկյանը եւս մեկնարկել էր 1/8 եզրափակիչից՝ տուշեով հաղթելով խորվաթ Բոզո Ստարչեւիչին: Կիսաեզրափակիչում նա կմրցի հունգարացի Լասլո Սաբոյի հետ:
67 կգ քաշային Կարեն Ասլանյանը 1/8 եզրափակիչում սերբ Մատե Նեմեշին 5:0 հաշվով հաղթելուց հետո հաջորդ փուլում 3:6 հաշվով պարտվեց ռուս Արտյոմ Սուրկովին: Եթե ռուս ըմբիշը հասնի եզրափակիչ, Ասլանյանը հնարավորություն կստանա պայքարել բրոնզե մեդալի համար:
60 կգ քաշային Արմեն Մելիքյանը 1/8 եզրափակիչում մեկնարկել էր մոլդովացի Վիկտոր Չոբանուի նկատմամբ 8:7 հաշվով հաղթանակով, սակայն հաջորդ գոտեմարտում 4:12 հաշվով պարտվեց վրացի Դաթո Չխարտիշվիլիին: Եթե վրացի ըմբիշը դուրս գա եզրափակիչ, Արմեն Մելիքյանը հնարավորություն կստանա պայքարել բրոնզե մեդալի համար:
Կիսաեզրափակիչի գոտեմարտերը կկայանան երեկոյան մրցահերթում, իսկ եզրափակիչները՝ մայիսի 2-ին:
Հիշեցնենք, որ Եվրոպայի առաջնության առաջին օրը պայքարի մեջ մտած Հայաստանի 3 ներկայացուցիչներ Սլավիկ Գալստյանը (63 կգ), Կարապետ Չալյանը (77 կգ) եւ Արթուր Շահինյանը (87 կգ) մեդալ չէին նվաճել: Արթուր Շահինյանը հնարավորություն էր ստացել պայքարել բրոնզե մեդալի համար եւ մայիսի 1-ին մասնակցեց սփոփիչ գոտեմարտերի: Առաջին սփոփիչ գոտեմարտում նա 7:0 հաշվով հաղթեց լիտվացի Ջուլիուս Մատուզեւիչիուսին, սակայն երկրորդում 3:7 հաշվով պարտվեց գերմանացի Դենիս Կուդլային եւ լքեց պայքարը: Բրոնզե մեդալի համար գոտեմարտում Դենիս Կուդլայի մրցակիցը կլինի ադրբեջանցի Իսլամ Աբասովը:
Եվրոպայի առաջնությանն անցկացվում է նոր կանոնակարգով, եւ ըմբիշները կշռվում են մրցագորգ դուրս գալուց 2 ժամ առաջ:
Հետևեք NEWS.am SPORT-ին Facebook-ում, Twitter և Telegram-ում