Հայաստանի շախմատի ակադեմիայում փետրվարի 10-ին՝ ժամը 11։00-ին, տեղի կունենա շախմատի չորրորդ մրցաշարը լրատվամիջոցների ներկայացուցիչների միջեւ:
Մրցաշարը կանցկացվի մեկ օրում եւ կտեւի 3-4 ժամ: Այն բաղկացած է 7 մրցափուլից եւ կանցնի արագ շախմատի կանոններով: Ամեն խաղի համար մասնակիցներին կտրամադրվի 10 րոպե եւ 5 վարկյան լրացուցիչ ամեն մի քայլի համար:
Մրցաշարի կազմակերպիչն է Արտասահմանյան թղթակիցների ասոցիացիան, իսկ գլխավոր մրցավարն է միջազգային կարգի մրցավար Վահագն Խաչատրյանը:
Մրցաշարի մրցանակաբաշխությանը ներկա կլինեն եւ հաղթողներին կպարգեւատրեն Հայաստանի շախմատի ֆեդերացիայի փոխնախագահ Սմբատ Լպուտյանը, շախմատի Հայաստանի նորընծա չեմպիոն Հայկ Մարտիրոսյանը եւ ԱԹԱ-ի նախագահ Տիգրան Հովհաննիսյանը: Սպասվում է, որ այս տարի կմասնակցեն մոտ 30 լրագրողներ:
Հետևեք NEWS.am SPORT-ին Facebook-ում, Twitter և Telegram-ում