ԱԱ. Լեւոն Արոնյանը 5-րդն է բլիցում

Հայկական շախմատի առաջատար Լեւոն Արոնյանը 5-րդ տեղն է գրավել Սաուդյան Արաբիայի մայրաքաղաք Էր Ռիյադում ավարտված կայծակնային խաղի աշխարհի առաջնությունում:

21 տուրերում Արոնյանը վաստակել է 14 միավոր եւ չինացի Հաո Վանի հետ բաժանել 4-5-րդ տեղերը: Չեմպիոնի տիտղոսը նվաճել է աշխարհի չեմպիոն Մագնուս Կարլսենը, որը հավաքել է 16 միավոր: Ռուսաստանցի Սերգեյ Կարյակինն ու հնդիկ Վիշվանաթան Անանդը 14.5-ական միավորով բաժանել են 2-3-րդ տեղերը:

Հայաստանի մյուս ներկայացուցիչներից Տիգրան Լ. Պետրոսյանը վաստակել է 13.5 միավոր (7-րդ տեղ), Հրանտ Մելքումյանը՝ 13 միավոր (15-րդ տեղ), Զավեն Անդրիասյանը՝ 11.5 միավոր (43-րդ տեղ), Սերգեյ Մովսեսյանը՝ 10.5 միավոր (74-րդ տեղ), իսկ Գաբրիել Սարգսյանը՝ 9.5 միավոր (95-րդ տեղ): Մրցաշարին մասնակցել է 138 շախմատիստ:

Կանանց առաջնությունում Հայաստանի ներկայացուցիչներից լավագույն արդյունքը գրանցել է Էլինա Դանիելյանը, որը 13 միավորով գրավել է 13-րդ տեղը: Լիլիթ Գալոյանը 58-րդն էր, Լիլիթ Մկրտչյանը՝ 62-րդը, իսկ Մարիա Գեւորգյանը՝ 71-րդը:

Կանանց առաջնությունում հաղթել է վրացի Նան Ձագնիձեն, որը վաստակել է 16.5 միավոր:

Հիշեցնենք, որ արագ շախմատի աշխարհի առաջնությունում եւս Հայաստանի ներկայացուցիչները մրցանակային տեղեր չէին գրավել:

Հետևեք NEWS.am SPORT-ին Facebook-ում, Twitter և Telegram-ում