Սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը, թիմի մարզիկներ Արթուր Թովմասյանն ու Արթուր Դավթյանն ամփոփել են մասնակցությունը Թայվանում անցկացված Համաշխարհային ուսանողական խաղերին:
«Գոհ եմ արդյունքներից, Արթուր Թովմասյանի, Արթուր Դավթյանի մասնակցությունից, նաեւ Արմեն Պետրոսյանից: Արթուր Դավթյանից ոսկե մեդալի ակնկալիք ունեինք: Այնպես չէր, որ նա վատ մասնակցեց, այդ պատճառով մեդալ չնվաճեց: Շատ լավ մասնակցեց: Հանդես եկավ բազմամարտում եւ նույնիսկ Եվրոպայի առաջնության արդյունքներից երկու օրերում էլ 2 միավորից ավել հավաքեց: Սա շատ մեծ արդյունք է: Բարդացրել ենք նժույգի, օղակների վարժությունները:
Օղակների վարժությունը Եվրոպայի փոխչեմպիոն Արթուր Դավթյանի հենակետային վարժությունը չէ, եւ մենք թիմով որոշում ընդունեցինք եզրափակիչում Արթուր Դավթյանի փոխարեն հանդես գալու հնարավորություն տալ Արթուր Թովմասյանին: Սա նախեւառաջ Արթուր Դավթյանի առաջարկն էր: Նա բրոնզե մեդալ կնվաճեր: Բայց մեր թիմի տղաները բոլոր պայքարում են ոչ միայն անհատական հաջողությունների, այլ առաջնային թիմի ընդհանուր հաջողությունների համար: Ես ուրախ եմ եւ կասկած չունեի, որ Արթուր Դավթյանն ինքը կառաջարկի Թովմասյանին իր փոխարեն հանդես գալ: Այդպես էլ եղավ: Ես իմ մասնագիտական խոսքն էլ ասացի, եւ Արթուր Թովմասյանը օղակների վարժության եզրափակիչում փայլեց:
Արթուր Թովմասյանը որակավորման փուլում մի փոքր զիջեց եւ չկարողացավ դուրս գալ եզրափակիչ: Ինչն էլ ակնկալում էինք: Ուրախ եմ այս հաջողության համար: Ունենք չեմպիոն եւ սա լավագույն արդյունքն է Ունիվերսիադայի համար: Ուրախ եմ, որ Արթուր Թովմասյանը կրկնակի չեմպիոն դարձավ»,- ասաց Հակոբ Սերոբյանը:
Ունիվերսիադայի չեմպիոն Արթուր Թովմասյանը նշեց, որ հաղթանակի հասավ Արթուր Դավթյանի եւ Հակոբ Սերոբյանի շնորհիվ:
«Ոսկե մեդալը մեր թիմային աշխատանքի արդյունքն է: Ես դարձա չեմպիոն եւ դրանում ահռելի բաժին ունի Արթուր Դավթյանը, ով եզրափակիչում իր տեղը զիջեց ինձ: Իհարկե սա նաեւ Հակոբ Սերոբյանի գլխավորությամբ է, քանի որ նրա թույլտվությամբ ես կարողացա եզրափակիչում մասնացել:
Եզրափակիչում շատ լարված էի ու պատասխանատվության զգացումը մեծ էր, քանի որ ինձ վստահվել էր Արթուր Դավթյանի փոխարեն հանդես գալ: Ես զգում էի, որ պետք է լավագույնս հանդես գամ, վարժությունս կատարեմ, քանի որ սխալվելու իրավունք չունեմ, քանի որ եթե ես սխալվեի, ուրեմն ոսկե մեդալի սպասելիքները չէին արդարանա, Արթուր Դավթյանն էլ մեդալ նվաճելու հնարավորությունից կզրկվեր»,- նշեց Արթուր Թովմասյանը:
Եվրոպայի փոխչեմպիոն Արթուր Դավթյանը համաշխարհային ուսանողական խաղերում մեդալ չնվաճեց, բայց նշում է, որ Արթուր Թովմասյանի ոսկե մեդալն իրեն ավելի է ուրախացրել:
«Համաշխարհային ուսանողական խաղերում ես դուրս եկա եզրափակիչ, բայց ես չէի կարող այն արդյունքը գրանցել, ինչ Արթուր Թովմասյանը: Այդ պատճառով ես իմ տեղը զիջեցի Արթուր Թովմասյանին, որպեսզի մենք չեմպիոնով վերադառնանք Հայաստան: Ես օղակների վարժությունում դուրս եկա եզրափակիչ, բայց ոսկե մեդալ չէի նվաճի, քանի որ դա իմ հենակետային գործիքը չէ: Դա Արթուր Թովմասյանի հենակետային գործիքն է: Ես գուցե բրոնզե մեդալ նվաճեի, բայց ավելի ուրախ եմ, որ Արթուրը ոսկե մեդալ նվաճեց եւ մեր թիմը կրկնակի չեմպիոն ունեցավ»,- ասաց Արթուր Դավթյանը:
Լուսինե Շահբազյան
Հետևեք NEWS.am SPORT-ին Facebook-ում, Twitter և Telegram-ում