20:50 , 13 օգոստոսի, 2017

Մխիթարյանի գոլային փոխանցումներն ու Լուկակուի դուբլը հաղթանակ բերեցին «Մանչեսթեր Յունայթեդին» (ֆոտոշարք)

«Մանչեսթեր Յունայթեդը» հաղթանակով մեկնարկեց Անգլիայի առաջնությունում: Պրեմյեր լիգայի մեկնարկային տուրում Ժոզե Մոուրինյոյի թիմն ընդունեց Լոնդոնի «Վեստ Հեմին» եւ 4:0 հաշվով հաղթեց բելգիացի հարձակվող Ռոմելու Լուկակուի դուբլի օգնությամբ:

Հայաստանի հավաքականի կիսապաշտպան Հենրիխ Մխիթարյանը խաղը սկսել էր մանչեսթերցիների մեկնարկային կազմում եւ դարձավ 2 գոլային փոխանցման հեղինակ:

Առաջին խաղակեսում «Մանչեսթեր Յունայթեդն» ուներ խաղային առավելություն, որը գոլի վերածեց 33-րդ րոպեին: Անգլիացի Մարկուս Ռեշֆորդի հրաշալի փոխանցումից հետո Ռոմելու Լուկակուն Պրեմյեր լիգայում առաջին գոլը խփեց «Մանչեսթեր Յունայթեդի» կազմում: 1:0 հաշիվը պահպանվեց մինչեւ ընդմիջում, իսկ երկրորդ խաղակեսի սկզբնամասում դաշտի տերերը խփեցին երկրորդ գոլը: 53-րդ րոպեին Հենրիխ Մխիթարյանի իրացրած տուգանային հարվածը գլխի հարվածով գոլով ավարտեց Լուկակուն՝ դառնալով դուբլի հեղինակ: 88-րդ րոպեին հայ կիսապաշտպանը կատարեց նաեւ երկրորդ գոլային փոխանցումը, իսկ փոխարինման դուրս եկած ֆրանսիացի Անտոնի Մարտիալը հաշիվը դարձրեց 3:0: Հանդիպման վերջնական հաշիվն 90-րդ րոպեին ձեւակերպեց ֆրանսիացի կիսապաշտպան Պոլ Պոգբան: Մխիթարյանը փոխարինվեց 88-րդ րոպեին:

Ժոզե Մոուրինյոյի թիմը Պրեմյեր լիգայում հաջորդ խաղը կանցկացնի օգոստոսի 19-ին՝ հյուրընկալվելով «Սուոնսիին»:

Անգլիայի առաջնություն, առաջին տուր

«Մանչեսթեր Յունայթեդ» - «Վեստ Հեմ»՝ 4:0

Ռոմելու Լուկակու, 33, 53, Անտոնի Մարտիալ, 88, Պոլ Պոգբա, 90