Արմեն Մկրտչյանը՝ Սերբիայից. Բոլորս տրամադրված ենք հաղթանակի

Պետք է մեդալներ ունենանք Եվրոպայի առաջնությունում: Մեդալների համար ենք եկել: Ափսոսում եմ Գրիգոր Գրիգորյանի համար, նա այսօր պետք է ոսկու համար պայքարեր, ոչ թե բրոնզի:

Այս մասին NEWS.am Sport-ի թղթակցի հետ զրույցում Սերբիայից ասաց ազատ ոճի ըմբշամարտի Հայաստանի հավաքականի գլխավոր մարզիչ Արմեն Մկրտչյանը:

Նովի Սադ քաղաքում ընթացող ազատ ոճի ըմբշամարտի Եվրոպայի առաջնությունում Հայաստանի ներկայացուցիչներ Վոլոդյա Ֆրանգուլյանը (61 կգ) եւ Գրիգոր Գրիգորյանը (74 կգ)  կգոտեմարտեն բրոնզե մեդալների համար:

Կիսաեզրափակիչում Գրիգոր Գրիգորյանը լարված պայքարում 6:8 հաշվով պարտվեց թուրք Սոմեր Դեմիրտասին: Իսկ Վոլոդյա Ֆրանգուլյանը 1:11 հաշվով պարտվեց Ռուսաստանը ներկայացնող Ախմեդ Չակաեւին: Հայ ըմբիշները մի քանի ժամից դուրս կգան մրցագորգ:

«Այսօր Գրիգոր Գրիգորյանն ու Վոլոդյա Ֆրանգուլյանը լավ դրսեւորեցին իրենց: Ինձ զայրացրեց միայն Գրիգոր Գրիգորյանը, քանի որ նա պետք է եզրափակիչում ոսկու համար պայքարեր, այլ ոչ թե բրոնզի: Վոլոդյա Ֆրանգուլյանը կիսաեզրափակիչում արդար պայքարում պարտվեց Ռուսաստանը ներկայացնող ըմբիշին: Ախմեդ Չակաեւը ուժեղ ըմբիշ էր: Իսկ Գրիգոր Գրիգորյանը իր սխալի պատճառով զրկվեց ոսկու համար գոտեմարտից: Հույս ունեմ, որ բրոնզե մեդալի համար պայքարում գոնե հետ կբերի իր կորցրածը եւ մեդալով կավարտի մրցելույթը Եվրոպայի առաջնությունում:

Տղաները լիովին պատրաստ են գոտեմարտերին: Բոլորս տրամադրված ենք հաղթանակի, մեդալների, քանի որ այդ նպատակով ենք այստեղ: Ճիշտ է, ոչ բոլորի մոտ է ստացվում հաղթել, գնալ մեդալի, բայց հույսներս չենք կորցնում, մի օր բոլորի մոտ էլ կստացվի: 57 կգ քաշային Գարիկ Բարսեղյանը մեկնարկում իր տակտիկական սխալի պատճառով պարտվեց: Դժգոհ եմ 97 կգ քաշային կարգը ներկայացնող Գեորգի Կետոեւից: 86 կգ քաշայինների պայքարում Վահե Թամրազյանը լավ հնարավորություն ուներ, բայց նորից չկարողացավ եւ ձեռքից բաց թողեց շանսը: 65 կգ քաշային Նարեկ Սիրունյանը եւս չկարողացավ լավ հանդես գալ»,- մեկնաբանեց Արմեն Մկրտչյանը:

Բրոնզե մեդալի համար Գրիգոր Գրիգորյանը կգոտեմարտի հույն Կիրիլոս Բինենմպաումի հետ, իսկ Վոլոդյա Ֆրանգուլյանն ուժերը կչափի թուրք Աբդի Զուրնաչիի հետ: Ըստ Արմեն Մկրտչյանի, երկու հայ ըմբիշներն էլ հաղթելու մեծ հնարավորություն ունեն:

«Պետք է կռվեն, պայքարեն: Ամեն ինչ պետք է անեն, որ բրոնզներն իրենցը լինեն: Յուրաքանչյուր հաղթանակն էլ բարդ է տրվում, չես կարող ասել, թե անպայման կհաղթեն: Բոլորն էլ ուժեղ են: Ոչ ոք չի եկել այստեղ պարտվելու կամ հաղթանակը մրցակցին նվիրելու կամ ուղղակի ժամանակ անցկացնելու համար: Այնպես որ բարդ է լինելու, բայց մեդալ պետք է ունենանք:

Հիմա տղաները հանգստանում են, հոգեբանորեն պատրաստվում են գորգ դուրս գալուն: Իրենց շատ լավ են զգում եւ հույս ունենք, որ ամեն ինչ հաջող է ավարտվելու»,- նշեց ավագ մարզիչը:

Մրցավարության մասին էլ հավաքականի ավագ մարզիչը նշեց, որ հայերի նկատմամբ որեւէ կողմնակալ կամ անարդար մրցավարություն չի նկատել:

«Ամեն ինչ շատ նորմալ է, չկա մեր նկատմամբ որեւէ անարդար վերաբերմունք: Գրիգոր Գրիգորյանի գոտեմարտերից մեկում շատ միավոր տվեցին մրցակցին, մենք բողոքարկեցինք եւ արդարացի միավորները հետ վերցրեցին: Այնպես որ ամեն ինչ մեր տղաների ձեռքում է»,- ասաց Արմեն Մկրտչյանը:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում