10:17  +04,  2 հունվարի, 2017

Օլիմպիական փոխչեմպիոն Գոռ Մինասյան. Ցանկանում եմ, որ 2017-ը բոլորի համար լինի երազանքների իրականացման տարի

Թող 2017 թվականը նոր հաղթանակների տարի լինի մարզիկներիս համար, որ մեր ժողովրդին նույնքան ուրախացնենք, որքան 2016-ին:

Այս մասին NEWS.am Sport-ի թղթակցի հետ զրուցում ասաց Ռիո-2016-ի օլիմպիական փոխչեմպիոն, 22-ամյա ծանրորդ Գոռ Մինասյանը:

Գոռ, շնորհավոր Նոր տարի: Ինչպե՞ս ես նշում, սիրո՞ւմ ես Ամանորի տոնը:

Ամանորն իմ ամենասիրելի տոներից մեկն է: Սիրում եմ Նոր տարվա եռուզեռը, Նոր տարվա հետ կապված ամեն ինչ՝ նախապատրաստական փուլից՝ տոնածառ դնել, տոնական սեղանի առեւտուրը, պատրաստվել, մինչեւ դեկտեմբերի 31-ի գիշեր: Ու դրանից հետո հյուր գնալ, դիմավորել: Տոնական սեղանից էլ սիրում եմ ամեն ինչ:  Սիրում եմ, որ այս տոնին միմյանց նվերներ են անում: Մինչեւ 7 տարեկանը հավատացել եմ Ձմեռ պապի գոյությանը: Հիշում եմ 4 տարեկանում Ձմեռ պապն ինձ մեծ մեքենա էր նվեր բերել: Այդ ժամանակ 4 տարեկան երեխայի համար այդքան մեծ մեքենա նվեր ստանալը շատ մեծ բան էր, ու ես այսօրվա պես հիշում եմ, թե որքան էի ուրախացել:

Ամանորի գիշերը երազանք պահո՞ւմ ես:

Հավատում եմ ամանորի գիշերվա խորհրդավորությանը, բայց երազանք չեմ պահում: Առհասարակ ես երազանքներ չեմ պահում: Ցանկանում եմ, որ 2017 թվականը ուրախ տարի լինի բոլորի համար, երազանքների իրականացման տարի լինի, մարզաշխարհի համար էլ հաղթանակների տարի լինի: Թող այս տարին էլ մեծ հաջողությունների տարի լինի, որպեսզի մեր մարզասեր հասարակությունն ուրախանա: Մենք էլ լիքը մեդալներ նվաճենք, ուրախացնենք մեր ժողովրդին:

Ինչպե՞ս ճանապարհեցիր 2016 թվականը եւ ինչպե՞ս այն կհիշվի քո կյանքում:

Իմ մարզական կարիերայում 2016 թվականն ամենահաջող տարին էր ինձ համար՝ օլիմպիական տարի, օլիմպիական մեդալով: Ինչպես յուրաքանչյուր մարզիկի համար, այնպես էլ իմ՝ 2016 թվականը հիշելիս, ամենառաջինը կհիշեմ օլիմպիական մեդալ նվաճելուս օրը՝ օգոստոսի 17-ը: 2016-ն իսկապես հաջողված էր ինձ համար, քանի որ օլիմպիական մեդալ ամեն մարզիկի չի հաջողվում նվաճել: Դեռ չեմ կարող ասել, որ կմասնակցեմ Տոկիո-2020-ին, քանի որ դեռեւս 4 տարի կա, ամեն ինչ հնարավոր է:

Եթե 2016 թվականը նորից ապրելու հնարավորություն ունենայի, առանց վարանելու նորից այդ բարդությունների միջով կանցնեի, նորից կուզեի ապրել հաղթանակի պահերը:

Ի՞նչ փոխեց օլիմպիական մեդալը քո կյանքում:

Օլիմպիական մեդալն իմ կյանքում ոչինչ չի փոխել, ամեն ինչ նույն է, նույն հունով, նույն օրերով, միակ տարբերությամբ՝ մարդիկ սկսել են ճանաչել ինձ:

Ես ինքս հասարակ տղա եմ՝ ընտանիքին նվիրված, ընկերասեր: Ազատ ժամանակս անցկացնում եմ ընտանիքիս հետ կամ ընկերներիս, այնպես որ օլիմպիական արծաթե մեդալը նվաճելուց հետո իմ կյանքում ակնհյատ փոփոխություններ չկան:

Իսկ անձնական կյանքի ժամանակ ունենո՞ւմ ես: Սիրտդ զբաղվա՞ծ է:

Սիրտս զբաղված չէ, դեռ չեմ մտածում անձնական կյանքս կառուցելու մասին: Ես դեռ ցանկանում եմ սպորտում նոր հաղթանակներ գրանցել: Իմ կարծիքով, անձնական կյանքը հնարավոր չի լինի համատեղել սպորտի հետ, ունենալ հաջողություններ: Անընդհատ ընտանիքից հեռու լինելը անհնար է, իսկ մարզիկի աշխատանքի բնույթն այնպիսին է, որ տարվա մեծ մասը դրսում ես անցկացնում: Կարծում եմ ոչ մի կին չի դիմանա ամուսնու այդքան բացակայությանը:

Այսինքն՝ Գոռ Մինասյանը կամուսնանա այն ժամանակ, երբ ավարտի մարզական կարիերան:

Չգիտեմ: Գուցե 2 կամ թեկուզ 4 տարի հետո ամուսնանամ: Չեմ ծրագրում:

Լուսինե Շահբազյան

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Այս թեմայով



  • Լրահոս
  • Հարցում
Քվեարկել են (12)
  • Ֆեյսբուք
  • NEWS.am Sport Exclusive
  • Արխիվ