Աշխարհի 9-րդ չեմպիոն Տիգրան Պետրոսյանի հուշամրցաշարի բացման արարողությունից հետո NEWS.am Sport-ի թղթակիցը Մոսկվայում ճեպազրույց է ունեցել հայկական շախմատի առաջատար Լեւոն Արոնյանի հետ:
Լեւոն, սովորաբար մրցաշարից առաջ, ակնկալիքներից խոսելն ավելորդ է, բայց, այնուամենայնիվ, ինչպե՞ս եք մոտենում այս մրցաշարին, որը Տիգրան Պետրոսյանի հիշատակին է: Պարտավորեցնո՞ղ է:
Պարզ է, որ այս մրցաշարը ես այլ կերպ եմ ընդունում: Այստեղ հաղթելը պարտադիր եմ համարում: Կփորձեմ ցուցադրել լավագույն խաղս:
Շախմատի միջազգային ֆեդերացիայի (ՖԻԴԵ) աղյուսակում տեւական ժամանակ զբաղեցնում էիք երկրորդ տեղը, որոշ ժամանակ առաջ իջել էիք 5-րդ, իսկ այժմ չորրոդ տեղում եք: Ինչ կասե՞ք այս մասին:
Ինձ մոտ միշտ այդպես է եղել: Առաջ գնալուց առաջ միշտ հետ եմ գնացել (ժպտում է):
Կարո՞ղ ենք մեծ քայլի սպասել՝ դեպի վեր:
Այո (ծիծաղում է):
Տարին մոտենում է ավարտին: Ի՞նչ անելիքներ ունեք մինչեւ տարվա վերջ:
Այստեղից կմեկնեմ Սենթ Լուիս, որտեղ ԱՄՆ-ի առաջատար շախմատիստ Հիկարու Նակամուրայի հետ 4 պարտիա կխաղամ: Դրանից հետո կմեկնեմ Պեկին, որտեղ ամեն տարի արագ եւ դասական շախմատի հետաքրքիր պարտիաներ ենք ունենում: Այդքանով կեզրափակեմ 2014 թվականը:
Շնորհակալություն, Լեւո՛ն: Հաջողություն եմ մաղթում մրցաշարում:
Շնորհակալ եմ:
Շուշանիկ Հակոբյան (Մոսկվա)
Հետևեք NEWS.am SPORT-ին Facebook-ում, Twitter և Telegram-ում