Վարշավա. Հայաստանի հավաքականը հաղթեց ռուսներին

Լեհաստանի մայրաքաղաք Վարշավայում անցկացվող շախմատի տղամարդկանց Եվրոպայի թիմային առաջնության 7-րդ տուրում Հայաստանի հավաքականը 2.5:1.5 հաշվով առավելության հասավ ռուսների նկատմամբ:

Միակ հաղթական պարտիան գրանցվեց Գաբրիել Սարգսյանի եւ Եվգենի Տոմաշեւսկու միջեւ դիմակայությունում, որում սպիտակներով խաղացող հայ գրոսմայստերը հաղթեց 71-րդ քայլում:

ՖԻԴԵ-ի երկրորդ համար Լեւոն Արոնյանը սեւերով 79-րդ քայլում ոչ ոքի խաղաց ռուս Ալեքսանդր Գրիշչուկի հետ: Ավելի վաղ Սերգեյ Մովսեսյանը սպիտակներով միավորը կիսել էր Պյոտր Սվիդլերի հետ, իսկ Վլադիմիր Հակոբյանը սեւերով ոչ ոքի էր խաղացել Ալեքսանդր Մորոզեւիչի հետ:

7-րդ տուրից հետո Հայաստանի հավաքականն ունի 11 միավոր եւ ադրբեջանցիների հետ բաժանում է 2-3-րդ տեղերը: Առաջատար ֆրանսիացիները 2:2 հաշվով ավարտեցին մրցամարտն Ադրբեջանի հավաքականի հետ՝ հավաքելով 12 միավոր: 

Հետևեք NEWS.am SPORT-ին Facebook-ում, Twitter և Telegram-ում