«Ռեալը» վերջին վայրկյաններին հաղթանակ կորզեց Էլչեում

Ֆուտբոլի Իսպանիայի առաջնության 6-րդ տուրում Մադրիդի «Ռեալը» մրցակցի խաղադաշտում 2:1 հաշվով առավելության հասավ Պրիմերայի նորեկ «Էլչեի» նկատմամբ:

Առաջին խաղակեսում դարպասի գրավումներ չարձանագրվեցին: Խաղի հաշիվը 51-րդ րոպեին բացեց Արքայական ակումբի առաջատար Կրիշտիանու Ռոնալդուն: Մադրիդցիները հաշվի մեջ առջեւում էին մինչեւ 90-րդ րոպեն, սակայն ավելացված ժամանակում գանացի հարձակվող Ռիչմոնդ Բոակյեն խփեց «Էլչեի» պատասխան գնդակը: Թվում էր, թե «Ռեալը» միավորներ կկորցնի, բայց խաղի ավարտից վայրկաններ առաջ դաշտի տերերի դարպասին նշանակվեց 11 մետրանոց հարված, որն անվրեպ իրացրեց Ռոնալդուն՝ Իսպանիայի ընթացիկ առաջնությունում աչքի ընկնելով 6-րդ անգամ:

Կարլո Անչելոտիի թիմը 16 միավորով երրորդն է, իսկ առաջատարներ կատալոնական «Բարսելոնան» ու Մադրիդի «Աթլետիկոն» 6-րդ տուրից հետո ունեն 100 տոկասանոց արդյունք՝ 18-ական միավոր:

Իսպանիայի առաջնություն, 6-րդ տուր 

«Էլչե» - «Ռեալ»՝ 1:2

Ռիչմոնդ Բոակյե, 90+2 – Կրիշտիանու Ռոնալդու, 51, 90+5

Հետևեք NEWS.am SPORT-ին Facebook-ում, Twitter և Telegram-ում