Իտալիայի հավաքականին հասնել չի լինի, իսկ երկրորդ տեղի եւ անցումային հանդիպումների իրավունքի համար պայքարելու հնարավորությունները Հայաստանի, Դանիայի, Չեխիայի եւ Բուլղարիայի հավաքականների մոտ հավասար են: Այդ մասին Երեւանում կայացած մամուլի ասուլիսում հայտարարել է Դանիայի հավաքականի գլխավոր մարզիչ Մորտեն Օլսենը:
«Հայաստանի հավաքականը Դանիայի, Բուլղարիայի եւ Չեխիայի հետ հավասար հնարավորություններ ունի խմբից դուրս գալու: Մենք արդեն որոշել ենք վաղվա խաղում մեր կազմը: Դժվար որոշում էր, բայց մենք արդեն գիտենք այն ֆուտբոլիստների անունները, ովքեր խաղալու են: Վաղը մենք ցանկանում ենք ռեւանշի հասնել եւ վաղը այլ խաղ պետք է ցույց տանք: Առաջիկա խաղում չեմ կարող ասել, թե ով է ֆավորիտը: Խմբից դուրս կարող են գալ բոլոր չորս թիմերն էլ:
Մալթայի խաղից մենք այդքան էլ բավարարված չէինք: Մենք խաղում էինք շատ դանդաղ: Հուսանք, որ վաղը այլ խաղ կցուցադրենք: Հայաստանի հավաքականի հաղթանակից հետո Դանիայում ես ասացի, որ դուք խմբից դուրս գալու հնարավորություններ չունեք, բայց այժմ այդ կարծիքին չեմ, քանի որ թիմերի ցույց տված ադյունքները ազդում են հետագա ելքի վրա: Մենք պետք է մոռանանք Մալթայի հետ խաղը եւ կենտրոնանանք վաղվա խաղի վրա»,- ասել է Մորտեն Օլսենը:
Կոպենհագենում կայացած առաջին խաղում Օլսենի թիմը Հայաստանին պարտվել է 0:4 հաշվով:
Հայաստան - Դանիա պատասխան հանդիպումը կմեկնարկի սեպտեմբերի 10-ին, 20.00-ին:
Չեխիայի, Հայաստանի եւ Դանիայի հավաքականները B խմբում 7-ական խաղից հետո ունեն 9-ական միավոր եւ 1 միավոր են զիջում երկրորդ տեղում գտնվող Բուլղարիային: Առաջատարը Իտալիան է՝ 17 միավոր:
Վերա Մարտիրոսյան
Հետևեք NEWS.am SPORT-ին Facebook-ում, Twitter և Telegram-ում