Դորտմունդի «Բորուսիան» հաղթեց Հենրիխ Մխիթարյանի դուբլի շնորհիվ

Դորտմունդի «Բորուսիան» չորրորդ անընդմեջ հաղթանակը տարավ ֆուտբոլի Գերմանիայի 2013/2014թթ. առաջնությունում: Բունդեսլիգայի չորրորդ տուրում Յուրգեն Կլոպի թիմը Հայաստանի հավաքականի կիսապաշտպան Հենրիխ Մխիթարյանի դուբլի շնորհիվ 2:1 հաշվով առավելության հասավ Ֆրանկֆուրտի «Այնտրախտի» նկատմամբ:

Ֆրանկֆուրտում կայացած խաղի հաշիվը 10-րդ րոպեին բացեց Մխիթարյանը՝ խփելով իր առաջին գոլը Բունդեսլիգայում: 36-րդ րոպեին «Այնտրախտի» չեխ հարձակվող Վացլավ Կադլեցը հավասարեցրեց հաշիվը, սակայն ընդմիջումից հետո Հայաստանի հավաքականի ֆուտբոլիստը դարձավ դուբլի հեղինակ՝ խփելով «Բորուսիայի» հաղթական գնդակը:

Մխիթարյանը խաղաց առանց փոխարինման, իսկ դորտմունդցիները 12 միավորով միանձնյա գլխավորեցին մրցաշարային աղյուսակը՝ 2 միավորով գերազանցելով երկրորդ տեղում գտնվող Մյունխենի «Բավարիային»:

Այս խաղից հետո Հենրիխ Մխիթարյանը կմիանա Հայաստանի հավաքականին, որը սկսում է նախապատրաստվել չեխերի (սեպտեմբերի 6) եւ դանիացիների (սեպտեմբերի 10) դեմ աշխարհի առաջնության ընտրական փուլի խաղերին:

Գերմանիայի առաջնություն․ չորրորդ տուր 

«Այնտրախտ Ֆ.» - «Բորուսիա Դ.»՝ 1:2

Վացլավ Կադլեց, 36 – Հենրիխ Մխիթարյան, 10, 56

Հետևեք NEWS.am SPORT-ին Facebook-ում, Twitter և Telegram-ում