«Սելթիկի» դեմ Գեւորգ Ղազարյանի խաղից շատ գոհ ենք, NEWS.am Sport-ի թղթակցի հետ զրույցում ասաց Կարագանդայի «Շախտյորի» գլխավոր մարզիչ Վիկտոր Կումիկովը: Չեմպիոնների լիգայի որակավորման չորրորդ փուլի առաջին խաղում ղազախական թիմը 2։0 հաշվով պարտության մատնեց շոտլանդական «Սելթիկին»։ Պատասխան հանդիպումը տեղի կունենա օգոստոսի 28-ին։
Պարոն Կումիկով, շնորհավորում եմ Ձեր թիմի հաջող ելույթի առթիվ: Կարո՞ղ էիք պատկերացնել, որ «Շախտոյրը» կկարողանա հասնել մինչեւ որակավորման փլեյ-օֆֆ եւ առաջին խաղում հաղթել «Սելթիկին»:
Շնորհակալություն շնորհավորանքների համար: Մենք կարող էինք միայն ենթադրել եւ հուսալ: Մենք շատ էինք ցանկանում ղազախ երկրպագուներին ուրախացնել: Երեւի այդ մեծ ցանկության արդյունքում հաղթեցինք:
Ո՞րն է հաջողության գրավականը:
Գեւորգ Ղազարյանը մեկ անգամ հայկական լրատվամիջոցներից մեկի հետ (NEWS.am Sport) հարցազրույցում ասաց, որ «Շախտյորի» հաջողության գրավականը կարգապահության եւ թիմային խաղի մեջ է: Բոլոր ֆուտբոլիստները կատարում էին իրենց հանձնարարված առաջադրանքները:
Ինչպե՞ս եք գնահատում հնարավորությունները պատասխան խաղից առաջ:
Կարծում եմ՝ պատասխան խաղում «Սելթիկի» հնարավորություններն ավելի մեծ են: Նրանք ավելի փորձառու թիմ ունեն: «Սելթիկը» բարձրակարգ թիմ է, բայց ֆուտբոլում ամեն բան հնարավոր է:
Ի վերջո, խաղից առաջ զոհաբերություն տեղի ունեցե՞լ էր, թե՞ ոչ: Երեկ, կարծես, հերքվեց այդ լուրը:
Ես գերադասում եմ անվանել դա թիմում եղած ավանդույթների պահպանում, իսկ մանրամասների մասին կարծում եմ չարժե խոսել:
Ավանդույթները պահպանում եք միայն տանը՞, թե՞ նաեւ արտագնա խաղերի ժամանակ: Հնարավո՞ր է Շոտլանդիայում էլ լինի նման մի բան:
Մենք ամեն տեղ ենք հետեւում մեր ավանդույթներին: Հնարավոր է, որ նաեւ Շոտլանդիայում լինի:
Ի՞նչ կասեք Հայաստանի հավաքականի ֆուտբոլիստ Գեւորգ Ղազարյանի խաղի մասին:
Մենք շատ գոհ ենք նրա խաղից: Երեկ շատ լավ խաղաց: Մի քիչ կասկածներ ունեինք: Նա բացակայել էր երկար ժամանակ:
Վերա Մարտիրոսյան
Հետևեք NEWS.am SPORT-ին Facebook-ում, Twitter և Telegram-ում