18:21  ,  26 օգոստոսի, 2026

Մանուել Տուլիպա. Վաղվա հնարավոր հաղթանակը շատ կարեւոր կլինի Հայաստանի, հայկական ֆուտբոլի համար

Թիմում, հանդերձարանում կա դրական էներգիա վաղվա կարեւոր խաղից առաջ: Վաղվա հնարավոր հաղթանակը շատ կարեւոր կլինի Հայաստանի, հայկական ֆուտբոլի, հայի համար: Կփորձենք ցույց տալ, որ այս երկրում ֆուտբոլը աճելու, զարգանալու տեղ ու հնարավորություն ունի:

Այս մասին նախախաղային ասուլիսում ասաց ֆուտբոլի Հայաստանի չեմպիոն «Արարատ-Արմենիայի» գլխավոր մարզիչ Մանուել Տուլիպան:

Պորտուգալացի մասնագետի գլխավորած թիմը Եվրոպայի լիգայի որակավորման փլեյ-օֆֆի պատասխան խաղում Երեւանում կընդունի ռումինական «Ունիվերսիտատեա Կրայովային»։

«Վաղվա խաղի հաջողության գրավականը՝ թալիսմանը, դրական էներգիան է, որը կա թիմում, հանդերձանանում, ֆուտբոլիստների մոտ: Մինչեւ հիմա այդ դրական էներգիան օգնել է մեզ: Հույս ունեմ՝ վաղն էլ կօգնի:

Ես շատ եմ սիրում երազել, եւ դա այն բանն է, որի համար հարկ չենք վճարում:  Հասկացել եմ, որ Հայաստանում ֆուտբոլը պարզապես ժամանց չի: Կփորձենք ցույց տալ, որ այս երկրում ֆուտբոլը զարգանալու տեղ ու հնարավորություն ունի:

Ռումինական թիմը բարձր պրեսինգով է փորձում մրցել մեզ հետ: Հաշվի առնելով մրցակցի բարձր պրեսինգը, թիմից պահանջել եմ, որ առաջիկա խաղում բոլորի դիրքերը լինեն շատ ճիշտ, արագ որոշումներ կայացնեն մենապայքարներում:  Մրցակիցը մենապայքարներում շատ ուժեղ է: Պետք է փորձենք խուսափել ֆիզիկական կոնտակտներից, ավելի արագ գործենք եւ գնդակի հետ պայքարից ավելի արագ կարողանանք դուրս գալ: Կփորձենք օգտագործել մրցակցի ազատ գոտիները թիկունքում:

Երեք կենտրոնական հարձակվող ունենք եւ երեքին էլ վստահում ենք, բայց ամենակայունը Սանդրո Լիման է: Նա 35 տարեկան է: Երբ հրավիրում էին նրան, շատերը կասկածներ ունեին: Կարեւոր է, որ նա կարողանում է շատ լավ համագործակցել եզրային հարձակվողների հետ:

Լավն է իմ թիմի միասնական աշխատանքը եւ որեւէ ֆուտբոլիստի լավ խաղը թիմային աշխատանքի արդյունք է:

 

Առաջին հանդիպման մի մասը հետեւում էի տրիբունայից: Ինձ համար հարմար չի լինել տրիբունայում: Ամենակարեւորն այն էր, որ մենք կարողանում էինք տարատեսակ միջոցներով մեր մտքերը հասցնել ֆուտբոլիստներին: Մարզչական շտաբն առաջին խաղում շատ լավ աշխատանք կատարեց:

Երբ եկա ակումբ, իմ առաջին խնդիրը թիմին հոգեբանորեն պատրաստելն էր, որ նրանք հաղթանակի քաղց ունենան: Արդյունքն այն էր, որ դարձանք Հայաստանի չեմպիոն:  Չեմպիոնության դրական հետեւանքն այն էր, որ հիմա տեսնում ենք ավելի լավ թիմ Եվրոպայում: Ինձ դուր է գալիս, որ յուրաքանչյուր դիրքում ունենք երկու ուժեղ ֆուտբոլիստ, որոնք պայքարում են այդ դիրքի համար: Կարծում եմ, որ իմ թիմը շատ մրցունակ է:

Հոգեբանորեն պատրաստ լինելը շատ կարեւոր է ամբողջ հայկական ֆուտբոլի համար, որին պետք է ուշադրություն դարձնեն նաեւ մյուս ակումբները:

Ֆուտբոլիստները շատ լավ են մարզվում, բավականին մեծ ինտենսիվությամբ: Մրցաշրջանի այս հատվածում խաղում ենք երկու կազմերով՝ առաջնության համար եւ եվրագավաթային խաղերի համար»,- ասաց Մանուել Տուլիպան:

«Արարատ-Արմենիա» - «Ունիվերսիտատեա Կրայովա» պատասխան հանդիպումը տեղի կունենա օգոստոսի 27-ին Երեւանի Վազգեն Սարգսյանի անվան «Հանրապետական» ստադիոնում եւ կմեկնարկի 20:00-ին:  Առաջին խաղում գրանցվել էր ոչ ոքի՝ 1:1:

«Արարատ-Արմենիան» ապահովել է առնվազն Կոնֆերենցիաների լիգայի հիմնական փուլի ուղեգիր։

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում

Print  

  • Related News