Բռնցքամարտի ԱԱ. Հովհաննես Բաչկովը կիսաեզրափակիչում է (ֆոտո)

Տոկիոյի Օլիմպիական խաղերի բրոնզե մեդալակիր, աշխարհի առաջնության քառակի բրոնզե մեդալակիր, Եվրոպայի եռակի չեմպիոն Հովհաննես Բաչկովն ապահովեց իր մարզական կարիերայի 5-րդ բրոնզե մեդալն աշխարհի առաջնություններում: 

Դուբայում անցկացվող աշխարհի առաջնությունում Բաչկովը 67 կգ քաշային կարգի քառորդ եզրափակիչում 5:0 հաշվով պարտության մատնեց Բելառուսը ներկայացնող Վադիմ Վաուչոկին: 

Առաջին ռաունդը Բաչկովի համար հաջող չստացվեց: Գրոհները նպատակին չէին հասնում: Մրցակիցը հաջողությամբ էր իրացնում իր գրոհները եւ նպատակին հասցնում հարվածները: Այս ռաունդում մրցավարները առավելությունը 4:1 հաշվով տվեցին բելառուս բռնցքամարտիկին: 

Երկրորդ ռաունդում գյումրեցի բռնցքամարտիկը նոր ուժով սկսեց եւ հարվածաշարերով առավելության հասավ մրցակցի նկատմամբ: Այս ռաունդում բոլոր մրցավարները միաձայն հաղթանակը տվեցին օլիմպիական բրոնզե մեդալակրին: 

Երրորդ ռաունդում Հովհաննես Բաչկովն ուղղակի ոչ մի հնարավորություն չտվեց բելառուս բռնցքամարտիկին, հարվածներով ավելացնելով ճնշումը: Մրցակիցը միայն կարողանում էր պաշտպանվել Բաչկովի հարվածներից, որոնք մեծ մասը հասնում էին նպատակին: 

Հովհաննես Բաչկովը դուրս եկավ աշխարհի առաջնության կիսաեզրափակիչ՝ ապահովելով Հայաստանի երկրորդ մեդալն այս առաջնությունում: 

Հայաստանի հավաքականի ավագը աշխարհի առաջնությունում պայքարը սկսել էր 1/16 եզրափակիչից, որտեղ երկրորդ ռաունդում տեխնիկական նոկաուտով հաղթել էր Քենիայի ներկայացուցիչ Կավոնդո Վիսման Մուաթեին:

1/8 եզրափակիչում Բաչկովը 5:0 հաշվով առավելության էր հասել Ղրղզստանի ներկայացուցիչ Ալմազ Օրոզբեկովի նկատմամբ: 

Նախորդ անգամ Հովհաննես Բաչկովը Հայաստանի հավաքականի կազմում մրցաշարի մասնակցել էր 2023 թ. մայիսին Տաշքենդում անցկացված աշխարհի առաջնությունում, որտեղ նվաճել էր իր 4-րդ բրոնզե մեդալը: 

2023 թ. աշխարհի առաջնությունից հետո Հայաստանի առաջատար բռնցքամարտիկը ձեռքերի վիրահատություն տարավ, ապա հրաժարվեց օլիմպիական վարկանիշային մրցաշարերին մասնակցելուց: Այս ընթացքում Տոկիո-2020 Օլիմպիական խաղերի բրոնզե մեդալակիրը հանդես էր գալիս պրոֆեսիոնալ ռինգում, որտեղ անցկացրել է 8 մենամարտ եւ տարել նույնքան հաղթանակ (8:0:0):

Հայաստանի առաջին մեդալն այս աշխարհի առաջնությունում ապահովել է Եվրոպայի փոչեմպիոն, 60 կգ քաշային Արթուր Բազեյանը, որը քառորդ եզրափակիչում 5:0 հաշվով վստահ հաղթանակ տարավ լատվիացի Մատվեյ Պրոկուդինսի նկատմամբ:

Ռուդիկ Մկրտչյանի գլխավորած հավաքականից կիսաեզրափակիչի ուղեգրի համար կպայքարեն նաեւ  Ռուդոլֆ Գարբոյանը (51 կգ), Ժիրայր Սարգսյանը (57 կգ),  , Արտուշ Հովհաննիսյանը (80 կգ), Ռաֆայել Հովհաննիսյանը (86 կգ), Նարեկ Մանասյանը (92 կգ) եւ Դավիթ Չալոյանը(+92 կգ)։ Հաղթանակների դեպքում հայ բռնցքամարտիկները կապահովեն առնվազն բրոնզե մեդալներ:

Հետևեք NEWS.am SPORT-ին Facebook-ում, Twitter և Telegram-ում