Նոր տարվա հեքիաթ. Համլետ Մանուկյան

 NEWS.am Sport-ը ներկայացնում է «Նոր Տարվա հեքիաթ» հարցազրույցների շարք, որտեղ մրցաշրջան-2024-ում մեծ նվաճումներ ունեցած հայկական սպորտի աստղերը կպատմեն անցնող տարվա ձեռքբերումների, մեծ հաղթանակների, ցավալի ձախողումների, Ամանորի եւ մանկական հիշողությունների մասին: Շարքի այսօրվա հերոսը հայկական սպորտի ամենահեռանկարային մարմնամարզիկն է՝ երիտասարդների աշխարհի կրկնակի չեմպիոն, Եվրոպայի չեմպիոն, 17-ամյա Համլետ Մանուկյանը:

2024 թ. Եվրոպայի երիտասարդական առաջնությունում երիտասարդ մարմնամարզիկը ուսի վնասվածքով հավասարը չունեցավ նժույգ թափեր վարժությունում եւ նվաճեց չեմպիոնի տիտղոսը: Ըստ մասնագետների, Համլետ Մանուկյանը հայկական մարմնամարզության ապագան է: 2025 թվականից Համլետ Մանուկյանը կպայքարի մեծահասակների Եվրոպայի եւ աշխարհի առաջնություններում:

Համլետ, ինչպիսի՞ն ստացվեց մրցաշրջան-2024-ը քեզ համար:

2024 թվականը հաջող տարի էր ինձ համար, կարողացա Եվրոպայի չեմպիոն դառնալ: Ուսի վնասվածքի պատճառով միայն մեկ գործիքով մասնակցեցի Եվրոպայի առաջնությանը: Դեկտեմբերին մասնակցեցի նաեւ Վորոնինի գավաթի խաղարկությանը եւ հաղթող ճանաչվեցի երկու գործիքների վրա, տարբեր գործիքների վրա մեդալակիր դարձա: Ընդհանուր հաշվարկով 7 մեդալ եմ նվաճել 2024-ին:

2025-ից արդեն ուժերս կփորձեմ մեծահասակների պայքարում եւ կփորձեմ արդարացնել բոլորի սպասելիքները: Նորամուտս կնշեմ Եվրոպայի առաջնությունում, եթե ընդգրկվեմ կազմ: Կփորձեմ մեծահասակներում լավ հանդես գալ եւ մեդալներ նվաճել:

Ո՞րն ես համարում տարվա գլխավոր ձեռքբերումդ:

Եվրոպայի առաջնության ոսկե մեդալն էր մեծ նվաճումս: Կուզեի այլ գործիքի վրա էլ պայքարել, բայց վնասվածքս թույլ չտվեց:  Այս տարի միակ ուժեղ մրցաշարը Եվրոպայի առաջնությունն էր: 2024-ում երիտասարդների աշխարհի առաջնություն չանցկացվեց:

2024-ում ունե՞ս կատարված երազանք:

Ավելի շատ նպատակ է եղել. քանի որ Եվրոպայի չեմպիոն չէի դարձել, երկու անգամ աշխարհի առաջնությունում էի հաղթել, մեծ նպատակ ունեի Եվրոպայի առաջնության ոսկե մեդալակիր էլ դառնալ: Շնորհակալ եմ Աստծուն, որ կարողացա լավ կատարել վարժությունս, մարզիչներիս օգնությամբ, նրանց հրահանգները լսելով՝ հաղթեցի, ինչի համար շատ ուրախ եմ:

Ո՞րն է տարվա ամենահիշարժան օրդ:

Ամենահիշարժանը Եվրոպայի առաջնության եզրափակիչի օրն է ՝ ապրիլի 27-ը, պարգեւատրման արարողությունը: Շատ ուրախ էի այդ հաղթանակի համար:

Ի՞նչ մտքերով ես ճանապարհում 2024-ը:

Լավ մտքերով եմ ճանապարհում՝ նոր սպասումներով ու նպատակներով նոր տարվա համար: Բարդ տարի էր վնասվածքներիս առումով, բայց հագեցած էր հույզերով, հաղթական զգացողություններով:

Սիրո՞ւմ ես Նոր տարին, տոնական օրերը: Ինչո՞վ է առանձնանում այն քեզ համար:

Ինչպես մնացած տոները, Նոր տարին էլ սիրում եմ: Պատրաստվում ենք, ընտանիքով նշում ենք: Նոր տարին ընտանիքով դիմավորում ենք եկեղեցում:

Սիրում եմ նաեւ տոնական աժիոտաժը, որ այցելում ենք բարեկամների, ընկերների տներ, շնորհավորում միմյանց: Ամենասիրելի պահն ինձ համար կեսգիշերի ղողանջներն են:

Հավատո՞ւմ ես Ամանորի հրաշքին:

Երազանք չեմ պահում: Ցանկություններս, նպատակներս աղոթքներով եմ ասում, իսկ նպատակներս հիմնականում կապված են սպորտային հաջողությունների հետ: Ինձ համար այդ հրաշքը աղոթքներով խոսքս Աստծուն հասցնելն է:

Փոքր տարիքում բոլորի նման ես էլ էի հավատում Ձմեռ պապիկին: Անհամբեր սպասում էի, թե երբ է գալու Ձմեռ պապին եւ ինձ նվերներ բերելու: Ծնողներս անակնալ էին անում, եւ ես ստանում էի նվերները: Նոր տարվա ամենասիրելի հիշողություններս այդ պահերի հետ են կապված: Տոնածառի տակ էին դնում նվերները ու ինձ համար մեծ անակնկալ էր, թե ինչպես են նվերները հայտնվում տոնածառի տակ:

Եթե հանդիպեիր Ձմեռ պապին...

Երբեք չէի մտածել, թե ինչ կասեմ Ձմեռ պապին, եթե տեսնեի: Երեւի կուզեի, որ մեր երկրում խաղաղություն լիներ: Ինձ համար ոչինչ չէի ուզի եւ չէի ասի, որովհետեւ իմ նպատակներին ինքս պետք է հասնեմ:

Ո՞րն է ամենասիրելի ուտեստը տոնական սեղանից:

Ամենասիրելի ուտեստս խոզի բուդն է:

Ո՞րն է քո Նոր տարվա հեքիաթը:

Ընտանիքով Նոր տարին դիմավորելն է իմ հեքիաթը: Վերջին տարիներին եկեղեցում ենք դիմավորում եւ շատ խորհրդանշական է, երբ ընտանիքի բոլոր անդամներով գիշերով եկեղեցում ենք: Ինձ համար առաջնահերթ է ընտանիքի հետ դիմավորելը: Եկեղեցում դիմավորելն է ինձ համար կարեւոր, Աստծուն ուղղված աղոթքներով տարին սկսելը:

Ի՞նչ նպատակներով եւ երազանքներով ես դիմավորում 2025-ը:

2025-ին ամեն ինչ պետք է անեմ, ջանք ու եռանդ չխնայեմ մեծահասակներում լավագույնս հանդես գալու համար: Մարզիչներիս հորդորդները լսելով, քրտնաջան աշխատանքով կփորձեմ յուրաքանչյուր մրցաշարում, որին մասնակցեմ, մեր երկրի պատիվը բարձր պահել, դրոշը բարձրացնել:

2025 թվականին բոլորին մաղթում եմ հաջողություններով լի տարի, մարզիկներին՝ առանց վնասվածքների եւ հաղթանակների տարի: Խաղաղություն լինի մեր երկրում: Փորձենք տարբեր միջազգային մրցաշարերում Հայաստանի պատիվը բարձր պահել:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում