ԱԱ․ Հայաստանի մարմնամարզիկների արդյունքները

Անգլիայի Լիվերպուլ քաղաքում հոկտեմբերի 31-ին մեկնարկել է սպորտային մարմնամարզության աշխարհի առաջնության որակավորման փուլը:

Հայաստանի 5 մասնակցից որակավորման փուլին արդեն մասնակցել են Արթուր Դավթյանը, Վահագն Դավթյանը, Գագիկ Խաչիկյանը եւ Արթուր Ավետիսյանը:

Տոկիոյի Օլիմպիական խաղերի բրոնզե մեդալակիր, Եվրոպայի չեմպիոն, աշխարհի գավաթակիր Արթուր Դավթյանը հենացատկի որակավորման փուլում վաստակել է 14.900, որ այս պահին ամենաբարձրն է մինչ այս մասնակցածների մեջ: Լավագույն եռյակը գլխավորում են Արթուր Դավթյանը, Գաբրիել Բուրդանետեն (Ռումինիա 14.633) եւ Իգոր Ռադիվիլովը (Ուկրաինա, 14.566):

Արթուր Դավթյանը երկու ցատկերը գերազանց է կատարել եւ երկուսի դեպքում էլ 14.900 միավոր է վաստակել:

Եվրոպայի փոխչեմպիոն, աշխարհի գավաթակիր Վահագն Դավթյանը օղակների վարժության որակավորման փուլում վաստակել է 14.566 միավոր: Այս վարժությունում Հայաստանի երկրորդ ներկայացուցիչ, աշխարհի գավաթի արծաթե մեդալակիր Արթուր Ավետիսյանը՝ 14.466 միավոր:

Բազմամարտում Հայաստանի միակ ներկայացուցիչ Գագիկ Խաչիկյանը վաստակել է 74, 366 միավոր՝ ազատ վարժություն - 13,000 միավոր, նժույգ թափեր - 13,000 միավոր, օղակներ - 11,866 միավոր, հենացատկ - 13,300 միավոր, զուգափայտ - 12,300 միավոր, պտտաձող - 10,900 միավոր:

Քիչ անց նժույգ թափեր վարժության որակավորման փուլում մրցահարթակ դուրս կգա Եվրոպայի կրկնակի չեմպիոն, աշխարհի բրոնզե մեդալակիր Հարություն Մերդինյանը:

Որակավորման փուլը հաղթահարած մարմնամարզիկների անունները հայտնի կդառնա մրցումային օրվա ավարտին:

Երզափակիչները տեղի կունենան նոյեմբերի 5-ին եւ 6-ին: Նոյեմբերի 5-ին կանցկացվի նժույգ թափերի, օղակների վարժությունների եւ բազմամարտի եզրափակիչները, հենացատկի եզրափակիչը տեղի կունենա նոյեմբերի 6-ին:

Հակոբ Սերոբյանի գլխավորած թիմը Լիվերպուլ է մեկնել Թբիլիսիից, որտեղ հոկտեմբերի 5-ից 21-օրյա ուսումնամարզական հավաք  է անցել աշխարհի առաջնությունից առաջ: Օլիմպիական բրոնզե մեդալակիր Արթուր Դավթյանը Անգլիա է մեկնել Գերմանիայից, որտեղ մասնակցում էր ակումբային մրցաշարի:

Հետևեք NEWS.am SPORT-ին Facebook-ում, Twitter և Telegram-ում