Թոմաս Տուխել․ Կարծես՝ պարտություն կրած լինենք

Լոնդոնի «Չելսիի» գերմանացի գլխավոր մարզիչ Թոմաս Տուխելը մեկնաբանել է «Բրայթոնի» հետ 1։1 հաշվով ոչ ոքի արդյունքը Անգլիայի առաջնության 24-րդ տուրի արտագնա խաղում։

«Բարդ է վերլուծել այսպիսի հանդիպումները։ Դաշտի տերերի համար սա նման էր գավաթային խաղի։ Կարծես՝ պարտություն կրած լինենք։ Այդպիսի տպավորություն է։

Անկասկած, թիմից պետք է պահանջել առավելագույնը, սակայն այս փուլում ամեն ինչ շատ բարդ է։ Մենք 7 օրում 3 արտագնա հանդիպում ենք անցկացրել։ Ամբողջ ընթացքում ճանապարհին ենք, չենք հասցնում լիարժեք քնել։

Արդարացումներ չեմ փնտրում, ներկայացնում եմ իրականությունը։ Արեցինք հնարավոր ամեն ինչ, բայց հիմա թիմը հյուծված է»,- Տուխելի խոսքը մեջբերում է «Չելսիի» կայքը։

Պրեմիեր լիգայի չորրորդ խաղում անընդմեջ «Չելսին» հաղթանակ չտարավ եւ 23 խաղից հետո 44 միավորով երրորդն է։ Երկրորդ տեղում գտնվող «Լիվերպուլը» 21 խաղում վաստակել է 45 միավոր։ Առաջատարը չեմպիոն «Մանչեսթեր Սիթին» է, որը 22 խաղից հետո ունի 56 միավոր։ «Բրայթոնը» (21 խաղ) 9-րդն է՝ 29 միավոր։

Հաջորդ տուրում «Չելսին» հունվարի 23-ին կընդունի «Տոտենհեմին»։

Հետևեք NEWS.am SPORT-ին Facebook-ում, Twitter և Telegram-ում