16:46  ,  3 օգոստոսի, 2021

Տոկիո-2020․ Սիմոն Մարտիրոսյանը՝ կրկնակի օլիմպիական փոխչեմպիոն (ֆոտո)

Տոկիոյում ընթացող 32-րդ ամառային Օլիմպիական խաղերում ծանրամարտի տղամարդկանց 109 կգ քաշային կարգում օլիմպիական չեմպիոնի կոչումը երկամարտի 430 կգ արդյունքով նվաճեց ուզբեկ Աքբար Ջուրաեւը։

Հայաստանի հավաքականի առաջատար, Ռիո-2016-ի օլիմպիական փոխչեմպիոն (105կգ), կրկնակի աշխարհի ու Եվրոպայի չեմպիոն Սիմոն Մարտիրոսյանը նվաճեց երկամարտի արծաթե մեդալը՝ 423 կգ:

Պոկում վարժության առաջին մոտեցման համար Սիմոն Մարտիրոսյանը նախնական հայտով պատվիրել էր 190 կգ, որը վստահությամբ կատարեց:

Երկրորդ մոտեցման համար Սիմոն Մարտիրոսյանը պատվիրեց 195, որը հաջողությամբ ֆիքսեց եւ օլիմպիական ռեկորդ սահմանեց այս վարժությունում: Երրորդ մոտեցման համար պատվիրած 198 կգ-ը չկարողացավ պոկել:

Երկրորդ տեղը գրաված Աքբար Ջուրաեւը բարձրացրեց 193 կգ։

Հրում վարժությունում Սիմոն Մարտիրոսյանը պայքարը սկսեց 228 կգ-ից եւ կատարեց առաջին փորձով։

Աքբար Ջուրաեւը հրում վարժությունում բարձրացրեց 237 կգ։ Սիմոն Մարտիրոսյանը ստիպված եղավ պատվիրել 238 կգ, որը չկարողացավ բարձրացնել երկրորդ եւ երրորդ փորձով։

Նշենք, որ Սիմոն Մարտիրոսյանին է պատկանում այս քաշային կարգի երկամարտի աշխարհի ռեկորդը 435 կգ արդյունքով:

Տոկիոյի Խաղերի ընդհանուր մեդալային հաշվարկում Հայաստանը 2 արծաթե եւ 1 բրոնզե մեդալով բարձրացավ 58-րդ տեղ։ Հիշեցնենք, որ օգոստոսի 2-ին հենացատկում բրոնզե մեդալակիր էր դարձել մարմնամարզիկ Արթուր Դավթյանը: Օգոստոսի 3-ին հունահռոմեական ըմբշամարտի 97 կգ քաշային կարգում արծաթե մեդալ նվաճեց 2016թ․ օլիմպիական չեմպիոն Արթուր Ալեքսանյանը։

Բռնցքամարտիկ Հովհաննես Բաչկովը (63 կգ) դուրս է եկել կիսաեզրափակիչ՝ ապահովելով առնվազն բրոնզե մեդալ։ 

Սիմոն Մարտիրոսյան, ծանրամարտ, 109 կգ քաշային կարգ

Ծնվել է 1997 թվականի փետրվարի 17-ին Հայկաշեն գյուղում։

Անձնական մարզիչ է Աշոտ Փիլոսյանը։

Սիմոն Մարտիրոսյանը  2012 թ. երիտասարդների Եվրոպայի բրոնզե մեդալակիր է, 2013թ. Եվրոպայի մինչեւ 17 տարեկանների չեմպիոն, 2013 թ. երիտասարդների աշխարհի չեմպիոն, 2014 թ. պատանիների Եվրոպայի փոխչեմպիոն, Նանջինգ-2014 պատանեկան Օլիմպիական խաղերի չեմպիոն եւ ռեկորդակիր։

Սիմոն Մարտիրոսյանը 2016 թ. Ռիոյի Օլիմպիական խաղերի փոխչեմպիոն է, 2018 թվականի աշխարհի չեմպիոն եւ ռեկորդակիր, 2017 թվականի Եվրոպայի չեմպիոն, աշխարհի երիտասարդական առաջնության չեմպիոն, Համաշխարհային ուսանողական խաղերի չեմպիոն, Եվրոպայի Մ-20 չեմպիոն եւ ռեկորդակիր, Եվրոպայի Մ-23 չեմպիոն եւ ռեկորդակիր, 2019 թ. Եվրոպայի եւ աշխարհի չեմպիոն,  աշխարհի ռեկորդակիր, 2019 թ. Եվրոպայի մինչեւ 23 տարեկանների չեմպիոն:

2019 թվականին ընդգրկվել է Հայաստանի տարվա լավագույն մարզիկների տասնյակում: 

Ամուսնացած չէ։

Մեկ տարվա որակազրկումից հետո ծանրամարտի Հայաստանի հավաքականը երկու օլիմպիականի իրավունք է ստացել Տոկիո-2020-ում՝ 1 տղամարդ եւ 1 կին:

Հետևեք NEWS.am SPORT-ին Facebook-ում, Twitter և Telegram-ում


  • Այս թեմայով

  • Հարցում
Քվեարկել են (13)
  • Ֆեյսբուք
  • NEWS.am Sport Exclusive
  • Արխիվ