21:56  ,  15 սեպտեմբերի, 2019

«Ռոման» Մխիթարյանի նորամուտի խաղում հաղթեց 4։2 հաշվով (ֆոտո)

Ֆուտբոլի Իտալիայի առաջնության երրորդ տուրում «Ռոման» ընդունեց «Սասուոլոյին»։ Պորտուգալացի Պաուլու Ֆոնսեկայի գլխավորած թիմն առավելության հասավ 4։2 հաշվով։ «Ռոման» չորս գոլերն էլ խփեց առաջին խաղակեսում։ Հաշիվը բացեց իտալացի կիսապաշտպան Բրիան Կրիստանտեն, կրկնապատկեց բոսնիացի հարձակվող Էդին Ջեկոն։

22-րդ րոպեին աչքի ընկավ մայրաքաղաքային թիմի նորեկ, Հայաստանի հավաքականի կիսապաշտպան Հենրիխ Մխիթարյանը, որը նորամուտը նշեց «Ռոմայում» եւ Իտալիայի առաջնությունում։ Նա դարձավ առաջին հայաստանցին Իտալիայի առաջնությունում։

Ընդմիջումից առաջ էլ «Ռոմայի» առավելությունը 4։0 դարձրեց հոլանդացի հարձակվող Ջասթին Կլույվերտը։

Երկրորդ խաղակեսում հյուրերը կարողացան խփել երկու գոլ իտալացի հարձակվող Դոմենիկո Բերարդիի դուբլի շնորհիվ։ Մխիթարյանն անցկացրեց ամբողջ հանդիպումը։

«Ռոման» 5 միավորով բարձրացավ 7-րդ տեղ, «Սասուոլոն» 13-րդն է՝ 3 միավոր։

Իտալիայի առաջնություն, երրորդ տուր

«Ռոմա» - «Սասուոլո»՝ 4։2 (տեսանյութ)

Բրիան Կրիստանտե, 12, Էդին Ջեկո, 19, Հենրիխ Մխիթարյան, 22, Ջասթին Կլույվերտ, 33 - Դոմենիկո Բերարդի, 53, 72

Հետևեք NEWS.am SPORT-ին Facebook-ում, Twitter և Telegram-ում