NEWS.am Sport-ի Օլիմպիական բլոգը Սոչիից. Հայ երկրպագուները եւս ակտիվ են օլիմպիական մայրաքաղաքում (ֆոտոշարք)

Սոչիում NEWS.am Sport-ի հատուկ թղթակից Լուսինե Շահբազյանը Օլիմպիական բլոգի հերթական թողարկումը նվիրել է ամերիկահայ լեռնադահուկորդ Արման Սերեբրակյանի ելույթին, նրա ընտանիքին եւ «Ռոզա Խուտոր» մարզահամալիրին:

Սոչիում շարունակվող 22-րդ ձմեռային օլիմպիական խաղերի լեռնադահուկային սպորտի մրցաշարում Հայաստանի միակ ներկայացուցիչ Արման Սերեբրակյանն իր առաջին ելույթն ունեցավ հսկա ոլորավայրէջքում: Մրցումն անցկացվում էր «Ռոզա Խուտոր» մարզահամալիրում: Իսկ այնտեղ հասնելու համար չորս տրանսպորտ պետք է փոխեի՝ ավտոբուս, ճոպանուղի, կրկին ավտոբուս, մարդատար մեքենա, ոտքի ճանապարհ ու վերջապես՝ «Ռոզա Խուտորի», որի մասին լսել էի Օլիմպիական քաղաքի հյուրերի պատմածներով, բայց չէի պատկերացնում, որ իրականում տեսնելու եմ հրաշք մի համալիր լեռան գագաթին: Անցնելով բոլոր երթուղիներով, արդեն ճոպանուղու բարձրությունից իմ առջեւ բացվեց շքեղ մի տեսարան:

«Ռոզա Խուտոր» լեռնադահուկային համալիրը գտնվում է Աիբգա լեռնաշղթայի վրա: Մարզահամալիրն ընդհանուր առմամբ ընդգրկում է մոտ 1820 հեկտար տարածք: Այն մեծ, բազմաֆունկցիոնալ համալիր է, որտեղ հնարավոր է անցկացնել մի շարք լեռնադահուկային մարզաձեւերի մրցումներ: Օլիմպիական լեռնադահուկային մրցուղիների ընդհանուր երկարությունը 20 կմ է: 

Հասա «Ռոզա Խուտոր» եւ տեղավորվեցի հավատարմագրված թղթակիցների տարածքում: Լրագրողների համար նախատեսված տարածքն իսկապես լավ էր մտածված, քանի որ անմիջապես մեր առջեւ բացվում են երեք հսկա մրցուղիները եւ բոլոր կողմերից հնարավոր է հետեւել վայրէջք կատարող լեռնադահուկորդներին, հարմար է լուսանկարելու,  տեսագրելու համար: Միակ խոչընդոտը աչք ծակող արեւն էր։

Լեռնադահուկային սպորտի հսկա ոլորավայրէջքը մեծ տպավորություն թողեց: Լարված հետեւում էի մարզիկների վայրէջքներին: Անհանգստությունս մեծանում էր, քանի որ մոտենում էր մեր հայրենակցի՝ Արման Սերեբրակյանի մեկնարկը: Առաջին փորձի ժամանակ նա իրենից հետ էր թողել ադրբեջանցի մարզիկին, դուրս էր մնացել վրացի մարզիկը: Իսկ մեր հայրենակիցը 106 մասնակցից 54-րդն էր: Երկրորդ փորձի ժամանակ նա բարելավեց իր արդյունքը: Արմանին «բռնեցի» անմիջապես վերջնագծին հասնելուն պես։ Նա ժպտում էր, ուրախ էր, իսկ դա նշանակում է՝ գոհ էր արդյունքից՝ 46-րդը 106-ից:

Կարճ զրույցից հետո ճանապարհ բռնեցի դեպի քաղաք: Մարզահամալիրի դռների մոտ սպասվում էր հրաշալի անակնկալ: Մի խումբ հայ երիտասարդներ, եռագույն դրոշներով, երեսներին եռագույն նկարած, «Հայաստան, Արման» վանկարկումներով քայլում էին համալիրից դեպի դուրս:

Շուտով նրանց միացավ նաեւ Արման Սերեբրակյանը: Տղաները պատմեցին, որ Սոչիում են ծանոթացել Արմանի հետ եւ մեկ օրում հասցրել են ընկերանալ: Քիչ հետո նկատեցի Արմանի ծնողներին եւ քրոջը։

Արմանի հայր Արմեն Սերեբրակյանը ինձ հետ զրույցում ասաց, որ հանդիսատեսի շարքերում նստած շատ էր անհանգստանում, բայց Արմանի արդյունքը նրան գոհացրել է: Ամենաշատն այսօր հսկա ոլորավայրէջքի եւ առաջին օլիմպիական մրցելույթի համար թերեւս անհանգստացել է Արմանի մայրը՝ Անիտա Սերեբրակյանը: Նրա խոսքով, իր փոխարեն յուրաքանչյուր մայր էլ նույն անհանգստությունը կզգար  որդու վտանգավոր վայրէջքի ժամանակ:

Արմանի ամենամեծ երկրպագուն Անի Սերեբրակյանն էր՝ քույրը, ով Վանկուվերում կայացած 2010 թվականի ձմեռային Օլիմպիական խաղերում ներկայացրել է Հայաստանը լեռնադահուկային սպորտում: Անին երջանիկ է, որ իր եղբայրը նույնպես հնարավորություն է ստացել Հայաստանը ներկայացնել Օլիմպիական խաղերում եւ որ ավելի լավ հանդես եկավ, քան ինքը՝ Վանկուվերում:

«Ռոզա Խուտոր» կվերադառնամ փետրվարի 22-ին, այդ օրը Արման Սերեբրակյանը կմասնակցի հատուկ ոլորավայրէջքին:

Լուսինե Շահբազյան՝ օլիմպիական Սոչիից

NEWS.am Sport-ի Օլիմպիական բլոգը անտրամադիր Սոչիից. Ադլերից դուրս կյանքը դժգույն է (ֆոտոշարք)

NEWS.am Sport-ի Օլիմպիական բլոգը Սոչիից. Ինֆորմացիոն հոսքերի սկզբնաղբյուրը

NEWS.am Sport-ի Օլիմպիական բլոգը Սոչիից. Թալան, թալան մինչեւ վերջ

NEWS.am Sport-ի Օլիմպիական բլոգը Սոչիից. Հայկական ռեպորտաժ՝ օլիմպիական հոկեյից, եռագույնն էլ՝ Չեխիա - Շվեդիա խաղին (ֆոտոշարք)

NEWS.am Sport-ի Օլիմպիական բլոգը Սոչիից. «Օլիմպիական պարկում» թեժ է (ֆոտոռեպորտաժ)

NEWS.am Sport-ի Օլիմպիական բլոգը Սոչիից. «Լաուրա» հասնելու լեռնային փորձությունները

NEWS.am Sport-ի Օլիմպիական բլոգը Սոչիից. Հեքիաթն ավարտվեց կամ գուցե դեռ նոր է սկսվում (ֆոտո)

NEWS.am Sport-ի Օլիմպիական բլոգը Սոչիից. Համառությամբ բացման հրավիրատոմս էլ կգտնվի (ֆոտո)

NEWS.am Sport-ի Օլիմպիական բլոգը Սոչիից (live). Կամավորներն ասես բոլորը հայ լինեն

Սոչի-2014. Օլիմպիական բլոգ, մեկնարկ