ԵԱ. Կարեն Ասլանյանը հաղթեց ադրբեջանցի ըմբիշին եւ կգոտեմարտի բրոնզե մեդալի համար

Հայաստանի ներկայացուցիչ Կարեն Ասլանյանը հնարավորություն ստացավ բրոնզե մեդալի համար գոտեմարտ անցկացնել Ռուսաստանի Կասպիյսկ քաղաքում ավարտին մոտեցող հունահռոմեական ըմբշամարտի Եվրոպայի առաջնությունում:

Միակ սփոփիչ գոտեմարտում 67 կգ քաշային Կարեն Ասլանյանը 5:3 հաշվով հաղթեց ադրբեջանցի Էլման Մուխտարովին: Երեկոյան մրցահերթում հայ ըմբիշը բրոնզե մեդալը կվիճարկի լեհ Դավիդ Կարեցինսկու հետ:

Հիշեցնենք, որ նախօրեին Կարեն Ասլանյանը 1/8 եզրափակիչում սերբ Մատե Նեմեշին 5:0 հաշվով հաղթելուց հետո հաջորդ փուլում 3:6 հաշվով պարտվել էր ռուս Արտյոմ Սուրկովին: Քանի որ Ասլանյանին հաղթած Սուրկովը նվաճել է եզրափակիչի ուղեգիր, հայ ըմբիշը հնարավորություն էր ստացել մայիսի 2-ին պայքարել բրոնզե մեդալի համար:

Մայիսի 2-ի երեկոյան մրցահերթում մեդալների համար գոտեմարտելու են նաեւ աշխարհի գործող չեմպիոններ Արթուր Ալեքսանյանը եւ Մաքսիմ Մանուկյանը, որոնք նախօրեին տարել էին 3-ական հաղթանակ եւ դուրս եկել եզրափակիչ: 97 կգ քաշային Ալեքսանյանը Եվրոպայի չեմպիոնի կոչումը կվիճարկի Սերբիայի ներկայացուցիչ Միխեիլ Կաջայայի հետ, իսկ 82 կգ քաշային Մաքսիմ Մանուկյանը եզրափակիչում կմրցի բելառուս Վիկտոր Սասունովսկու հետ:

Հայաստանի մյուս ներկայացուցիչները՝ Սլավիկ Գալստյանը (63 կգ), Արմեն Մելիքյանը (60 կգ), Կարապետ Չալյանը (77 կգ) եւ Արթուր Շահինյանը (87 կգ) մեդալ չէին նվաճել: 

Եվրոպայի առաջնությանն անցկացվում է նոր կանոնակարգով, եւ ըմբիշները կշռվում են մրցագորգ դուրս գալուց 2 ժամ առաջ:

Հետևեք NEWS.am SPORT-ին Facebook-ում, Twitter և Telegram-ում