Մադրիդի «Ռեալի» ռեկորդը

Մադրիդի «Ռեալը» երկրորդ տարին անընդմեջ ամառային տրանսֆերային պատուհանը փակել է շահույթով, հաղորդում է AS-ը: Թիմի նորեկներ Թեո Էրնանդեսի եւ Դանի Սեբալյոսի համար Արքայական ակումբը վճարել է 46,5 միլիոն եվրո: Վինիսիուս Ժունիորի տրանսֆերի համար նախատեսված 45 միլիոն եվրոն «Ռեալը» կվճարի հետագայում:

Ֆուտբոլիստների վաճառքից իսպանական ակումբը ստացել է 126 միլիոն եվրո. Ալվարո Մորատան 62 միլիոն եվրոյով տեղափոխվել է «Չելսի», Դանիլոն 30 միլիոն եվրոյով՝ «Մանչեսթեր Սիթի»: «Ռեալ Սոսյեդադը» Դիեգո Լիորենտեի համար վճարել է 10 միլիոն եվրո, «Լիոնը» Դիասի համար՝ 8 միլիոն, «Բավարիան» Խամես Ռոդրիգեսի վարձակալության համար «Ռեալին» փոխանցել է 13 միլիոն:

Ամառային տրանսֆերային ֆինանսական դրական հաշվեկշիռը կազմել է 79.5 միլիոն եվրո, ինչը ռեկորդային ցուցանիշ է «Ռեալի» համար: Անցած ամռանը այն հավասար էր +7.5 միլիոնի:

Հետևեք NEWS.am SPORT-ին Facebook-ում, Twitter և Telegram-ում