NEWS.am Sport-ը ներկայացնում է 30-րդ Օլիմպիական խաղերում Հայաստանի մարզիկներին։
Քրիստինե Հարությունյան. աթլետիկա, նիզակի նետում
Ծնվել է 1991թ. մայիսի 18-ին, Գյումրիում:
Ամուսնացած չէ:
Նիզականետմամբ զբաղվում է 2005-ից: Սպորտի վարպետ է, Հայաստանի բազմակի չեմպիոն ու ռեկորդակիր:
2006-ին Սոչիում անցկացված «Կովկասյան քաղաքների գավաթի» պատանեկան միջազգային մրցաշարում գրավել է երրորդ տեղը:
2009-ի Հայաստանի չեմպիոն է:
2011-ին Իսլանդիայի մայրաքաղաք Ռեյկյավիկում անցկացված Եվրոպայի 3-րդ դիվիզիոնի թիմային առաջնության առաջնությունում գրավել է երրորդ տեղը՝ սահմանելով Հայաստանի ռեկորդ` 48 մ 02 սմ:
2012-ին Հելսինկիում Եվրոպայի առաջնությունում 45մ 83սմ արդյունքով գրավել է վերջին տեղը:
Օլիմպիական ուղեգիր նվաճել է 2012-ին Սոչիում անցկացված աթլետիկայի Ռուսաստանի առաջնության նետորդների մրցաշարում; Քրիստինե Հարությունյանը ցույց տվեց 59 մետր 12 սանտիմետր արդյունք՝ 12 սմ-ով գերազանցելով օլիմպիական մասնակցության նորման:
Հուլիսի 20-ին Ֆրանսիայում կայացած Ֆրանսիայի բաց առաջնությունում զբաղեցրել է երկրորդ տեղը:
Անձնական մարզիչներն են ռուսաստանցի Իվան Սաֆոնովը եւ Գյումրիի աթլետիկայի մանկապատանեկան մարզադպրոցի տնօրեն Յաշա Եղիազարյանը:
Ամեն ինչ սկսվեց այսպես…
Աթլետիկայով սկսել եմ մարզվել դպրոցական տարիքից: Աշակերտական տարիներից դպրոցում ցատկում էի, նիզակ էի նետում, ինձ նկատեցին եւ առաջարկեցին աթլետիկայի մարզումներ սկսել: Սկզբնական շրջանում հեռացատկով էի տարված: Ապա վնասվածք ստացա եւ ուժերս փորձեցի նիզականետման հատվածում: Առաջին արդյունքս այն ժամանակվա համար եւ տարիքիս համեմատ բավական բարձր է եղել` 35 մետր: Այդ ժամանակ 15 տարեկան էի, իսկ առաջին մրցումս, որտեղ գրանցել եմ 35 մետրը, Սոչիում էր:
Ես մեկնում եմ Լոնդոն…
«Ես մեկնում եմ լավ մասնակցության նպատակով: Սա իմ առաջին օլիմպիական նվաճումն է դեպի Օլիմպիական խաղեր: Ես գնում եմ մասնակցելու: Չեմ կարող ասել` գնում եմ մեդալ բերելու: Վերջին մի քանի օրն ենք Հայաստանից դուրս մարզումներ անցկացնում: Իսկ դա քիչ ժամանակ է լավ մարզավիճակի հասնելու համար: Եթե Հայաստանում ունենայինք այս պայմանները՝ ես վստահորեն հիմա կհայտարարեի, որ մեկնում եմ մեդալ նվաճելու»:
Ակնկալիքները…
«Չեմ կարող ասել: Արդյունքները ցույց կտան: Ես այժմ գտնվում եմ լավ մարզավիճակում: Օրական երկու անգամյա ռեժիմով մարզվում եմ: Այժմ Ֆրանսիայի Լիլ քաղաքում ենք մարզվում թիմի հետ: Այստեղ անցկացնում ենք մեր վերջին հավաքը Օլիմպիական խաղերից առաջ: Ցանկանում եմ, որ ինձանով հպարտանան: Ելույթիցս առաջ եւ հետո առաջինը զանգելու եմ մայրիկիս: Նա ինձ շատ է ոգեշնչում»:
Յաշա Եղիազարյան
«Քրիստինեն ունի մեծ ներուժ: Նա մեծ դժվարություններ է հաղթահարել Հայաստանում այս մարզաձեւում առաջ գնալու համար: Նրա համար մեծ հաջողություն կլինի, եթե նա Լոնդոնում կարողանա գոնե կրկնել Սոչիի արդյունքը` 59 մ 12 սմ: Քրիստինեն Օլիմպիական խաղերի նման մեծ մրցաշարերի փորձ չունի: Եվ չեմ ցանկանա, որ նրան ընկճի այդ փորձի բացակայությունը»:
Քրիստինե Հարությունյանը օլիմպիական մեկնարկ դուրս կգա օգոստոսի 7-ին:
Հետևեք NEWS.am SPORT-ին Facebook-ում, Twitter և Telegram-ում