11:31  ,  6 մայիսի, 2017

Միսակ Գաբրիելյան. Մինչեւ նախարարությունը չունենա իր լողավազանը առանձին մարզադահլիճով, լողում առաջընթաց ակնկալել պետք չէ

Լողի Հայաստանի հավաքականի գլխավոր մարզիչ Միսակ Գաբրիելյանը NEWS.am Sport-ի թղթակցի հետ զրույցում ամփոփեց Երեւանի «Գրանդ սպորտ» համալիրում անցկացված լողի Հայաստանի առաջնությունը, որին մասնակցում էր 130 մարզիկ: 

«Հայաստանի առաջնությունն անցավ շատ բարձր մակարդակով: Արդյունքներից շատ գոհ եմ: Ինձ մասնավորապես շատ ուրախացրեց Արթուր Բարսեղյանը: Նա հոյակապ մասնակցեց, ռեկորդներ սահմանեց: Տղաներից լավ հանդես եկան նաեւ Լեոն Վարդանյանը, Լեւոն Խաչատրյանը: Աղջիկներից լավ արդյունքներ գրանցեց Վարսենիկ Մանուչարյանը, Անի Պողոսյանը: Բոլոր այս լողորդները այս պահին Բուդապեշտում Եվրոպական օրերի շրջանակում լողի փառատոնի թեկնածուներ են:

Այդքան գոհ չեմ մեծերի մասնակցությունից: Օրինակ՝ Վահան Մխիթարյանը թույլ մասնակցեց: Նա իր ուժերի չափով մասնակցեց, բայց նույն արդյունքները ցույց տվեց, ինչ անցյալ տարի: Նույնը կասեմ եւ մեր մյուս մեծահասակ լողորդների մասին: Այս առաջնությունում պատանիներն իրենց արդյունքներով գերազանցեցին մեծահասակներին, ուժեղներին:

Մեծ պայքար կար առաջնությունում՝ պատանիների ու մեծահասակների միջեւ ուժեղ մրցակցություն էր, եւ դա ինձ շատ դուր եկավ: Հայաստանի առաջնության արդյունքներով կկազմավորվի լողի Հայաստանի նոր հավաքականը: Կարծում եմ՝ մեծահասակներից բոլորն էլ կմնան, եթե որեւէ մեկը չհեռանա սպորտից: Օրինակ՝ օլիմպիական Մոնիկա Վասիլյանը հեռացավ սպորտից. նշանադրվել է, ամուսնանում է: Արդեն տարիքն էլ մեծ է: Վահան Մխիթարյանը մեր ուժեղագույններից է: Նոր համալրումներ էլ կունենանք:  Բայց միանշանակ, Հայաստանի հավաքականը կձեւավորվի Հայաստանի առաջնության արդյունքների հիման վրա»,- ասաց Միսակ Գաբրիելյանը:

Հավաքականի ավագ մարզիչի խոսքով, Հայաստանում դեռ ժամանակը չէ լողի զարգացման մասին խոսել կամ միջազգային մրցումներից մեդալներ ակնկալել, քանի դեռ լողորդները չունեն մի լողավազան եւ մարզասարքերով մարզադահլիճ՝ ամենօրյա մշտական մարզումներ անցկացնելու համար:

«Բոլորն էլ լավ գիտեն, թե ինչ է պետք լավ արդյունքների համար: Հայկական լողի պատմության մեջ ունեցել ենք բարձր կարգի լողորդներ, Եվրոպայի մրցանակակիրներ: Լողը լավ պատմություն է ունեցել, լավ պայմաններ մարզումների համար: Այն ժամանակ ունեցել ենք առանձին մարզադահլիճ մարզասարքերով կահավորված, լողորդները բացի ջրային մարզումներից նաեւ ամենօրյա մարզումներ էին անցկացնում մարզասարքերի վրա: Այն ժամանակ լողորդները մարզվում էին 50 մետրանոց լողավազաններում: Այսօր ջուրն այլեւս խնդիր չէ, մարզվելու համար Երեւանում, Հայաստանում շատ լողավազաններ կան, բայց դրանք պրոֆեսիոնալ չեն: Մեր լողորդներն առավոտյան մարզվում են Դավիթ Համբարձումյանի անվան մարզադպրոցի 25 մետրանոց լողավազանում, երեկոյան էլ իրենց ակումբներում, որոնք եւս 25 մետրանոց են: Իսկ մարզադահլիճ չկա, որ հավաքականի անդամներն անվճար մարզվեն: 

Իսկ այս պայմաններում անհնար է զարգանալ: Մինչեւ մեր նախարարությունը չունենա իր լողավազանը՝ 50 մետրանոց եւ առանձին մարզադահլիճը, լողում առաջընթաց ակնկալել պետք չէ: Լողորդները պետք է առավոտյան եւ երեկոյան երկու ժամ մարզվեն լողավազանում եւ նաեւ մարզադահլիճում, այդ ժամանակ նոր արդյունքներ կլինեն:

Արդեն մեկ տարի հավաքականին անվճար մարզվելու հնարավորություն է տալիս «Գրանդ Սպորտ» համալիրը: Ամեն առավոտ 7:30-ից երկու ժամ հավաքականի անդամները, այն լողորդները, ովքեր ինձ մոտ են մարզվում, հնարավորություն ունեն 50 մետրանոցում լողալ: Ֆեդերացիան նախաձեռնեց դիմել մարզահամալիրին, որն էլ մեզ ընդառաջ գնաց: Արդեն երկրորդ տարին է, հնարավորություն տվեց անցկացնել Հայաստանի առաջնությունը: Սա մեզ համար մեծ աջակցություն է:

ՀԱՕԿ-ի նորակառույց «Օլիմպավանում» գիտեմ, որ լինելու է լողավազան, բայց 25 մետրանոց: Եվ այն հիմնականում հարմարեցված է լինելու ջրացատկորդների համար:

Եթե համեմատենք մեր երեխաների ցույց տված արդյունքները 25-30 տարի առաջ եղած արդյունքների հետ, այս երեխաները բոլորը այն ժամանակ օլիմպիական չեմպիոններ կլինեին, աշխարհի, Եվրոպայի չեմպիոններ ու մեդալակիրներ կլինեին: Ուժեղ են, մեծ պոտենցիալ ունեն:  Հիմա ինձ հարցնում են՝ այս կամ այն մրցումից մեդալ կլինի…  Չեն հասկանում՝ լողն աշխարհում ինչ զարգացում է ապրում, ինչ տեմպերով է զարգանում, լողորդներն աշխարհում ինչ պայմաններում են մարզվում: Մեզ այս պահին օգնում է «Գրանդ Սպորտ» համալիրը, իսկ նման պայմաններում մարզվելու համար մեր տարիների աշխատավարձերն ու ֆեդերացիայի բյուջեն գումարած չի բավականացնի մի քանի ամիս վարձով մարզվելու համար նման լողավազաններում: Իսկ ֆեդերացիայի տարեկան գումարը միայն Հայաստանի առաջնություններ անցկացնելուն է բավականացնում»,- մանրամասնեց ավագ մարզիչը:

Արտագնա հավաքների ու մարզումների վերաբերյալ Միսակ Գաբրիելյանը նշեց, որ մայրաքաղաքից դուրս հավաքի հնարավորություն ունեն միայն Ծաղկաձորում:

«Առաջիկայում պատրաստվում ենք աշխարհի առաջնությանը, որը տեղի է ունենալու հուլիսին Բուդապեշտում: Հայաստանը աշխարհի առաջնությանը 4 տեղ ունի: Այդ օրերին  Բուդապեշտում անցկացվելու է նաեւ պատանիների Եվրոպական օրեր: Աշխարհի առաջնությունից առաջ հավաք ենք անցկացնելու Ծաղկաձորի մարզաբազայի լողավազանում, որը 50 մետրանոց է: Հավաքին մասնակցելու հնարավորություն ունի 10 լողորդ: Իսկ աշխարհի առաջնությանը կմասնակցեն այն 4 լողորդները, ովքեր լավ մասնակցություն ցուցաբերեցին Հայաստանի առաջնությունում եւ ըստ իմ պայմանի 1300-ից բարձր միավորներ վաստակեցին: Առաջնությունից առաջ ես ժողով էի անցկացրել եւ առաջարկով հանդես եկել լողորդներին, որ ովքեր 1300-ից բարձր միավորներ կհավաքեն, նրանք էլ կգնան աշխարհի առաջնության: Մարզումներից հետո կքննարկենք եւ կհասկանանք, ովքեր են այդ 4 լողորդները,- նշեց Միսակ Գաբրիելյանը:

Նշենք, որ լողի Հայաստանի առաջնությունում գրանցվել են նաեւ Հայաստանի ռեկորդներ՝ 100 եւ 200 մ ազատ ոճում Հայաստանի ռեկորդներ սահմանեց Արթուր Բարսեղյանը 0:52.95 եւ 1:57.67 արդյունքներով: Լողորդը Հայաստանի ռեկորդներ սահմանեց նաեւ 50 եւ 100 մ բատերֆլայ մրցաոճերում՝ 0:25.78 եւ 0:58.60 արդյունքներով: Հայաստանի ռեկորդ գրանցեց նաեւ Վարսենիկ Մանուչարյանը 50 մ բատերֆլայ ոճում՝ 0:30.64 արդյունքով: Հայաստանի ռեկորդ սահմանեց նաեւ «Գրանդ Սպորտի» թիմը ազատ ոճ փոխանցումալողում՝ 3:38.16 արդյունքով:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում


  • Այս թեմայով