09:05  ,  30 դեկտեմբերի, 2016

Արթուր Ալեքսանյան. Ձմեռ պապից կխնդրեմ, որ մեր զինվորները ողջ-առողջ վերադառնան իրենց մայրերին

Հայկական մարզաշխարհի պատմական ոսկե տարին ավարտվում է: Այս տարին հայկական սպորտում կհիշվի որպես օլիմպիական ամենամեծ նվաճման տարի: 2016 թվականի օգոստոսի 16-ին հունահռոմեական ոճի ըմբիշ, աշխարհի կրկնակի, Եվրոպայի եռակի չեմպիոն Արթուր Ալեքսանյանը 20-ամյա դադարից հետո Հայաստանի համար նվաճեց օլիմպիական ոսկե մեդալը: Սա հայկական մարզաշխարհի վերջին տարիների ամենամեծ նվաճումն է: Ոսկե մեդալը Արթուր Ալեքսանյանի կրծքին փայլեց ապրիլյան քառօրյա պատերազմում հերոսի մահով զոհված Ռոբերտ Աբաջյանի նկարը պատկերող շապիկով՝ ի նվիրում հայ զինվորներին: Արթուր Ալեքսանյանը 2017 թվականը կդիմավորի հայ զինվորի մասին երազանքով՝ սահմանը պաշտպանող բոլոր զինվորները առողջ վերադառնան իրենց տները:

NEWS.am Sport-ը ներկայացնում է հայկական սպորտի ոսկե տարվա վերջին հարցազրույցը օլիմպիական չեմպիոնի հետ:

Արթուր, ինչպիսի՞ տարի էր 2016 թվականը քեզ համար:

2016 թվականն իսկապես հրաշալի տարի էր ինձ համար, օլիմպիական բարձունքի տարի էր: Իմ ամբողջ կյանքում կհիշվի 2016 թվականի օգոստոսի 16-ը, այն օրը, երբ ես նվաճեցի օլիմպիական ոսկե մեդալը: 2016-ում բացթողումներ էլ եղան, բայց գտնում եմ, որ օլիմպիական ոսկին փակեց բոլոր այդ բացթողումները:

Երրորդ տարին անընդմեջ ճանաչվում ես Հայաստանի լավագույն մարզիկ: Ի՞նչ է քեզ համար այդ կոչումը:

Պատիվ է երեք տարի անընդմեջ ճանաչվել Հայաստանի լավագույն մարզիկ, ինչի համար շնորհակալ եմ բոլոր ինձ քվեարկողներին: Այս կոչմանը եւ այս նվաճումներին չէի հասնի, եթե չլինեին իմ մարզիչները, հավաքականի գլխավոր մարզիչ Լեւոն Ջուլֆալակյանը. նրանց եմ շնորհակալ եմ, որովհետեւ առանց նրանց հաղթանակներ չէի ունենա: Իսկ ամենամեծ շնորհակալությունս Աստծունն է: Ես իմ ամբողջ կյանքը նվիրել եմ սպորտին եւ հասել եմ ամենաբարձր տիտղոսին: Զգում եմ, որ կարող եմ շարունակել պատմություն կերտել եւ Հայաստանի պատիվը միշտ բարձր պահել:

Բոլոր հնարավոր մեդալները քեզ հաջողվել է նվաճել, մարզաշխարհում ամենամեծ բարձունքին հասել ես: Քո՝ գյումրեցուդ, հաջողության գաղտնիքը ո՞րն է:

Իրականում ինքս էլ չգիտեմ, թե ինչպես է ինձ հաջողվել բոլոր նվաճումները ձեռք բերել սպորտում: Երեւի, առաջ շարժվելու շատ մեծ ձգտում կա իմ մեջ, նորանոր հաղթանակներ ձեռք բերելու, հաղթանակներին հասնելու: Եթե ես իմ առջեւ ինչ-որ նպատակ եմ դնում, այնպես եմ անում, որ հասնեմ իմ նպատակին ցանկացած գնով, նույնիսկ շատ բաներ զոհաբերելով, շատ բաներից ինքս ինձ զրկելով:

Օլիմպիական չեմպիոն դառնալուց հետո ի՞նչ փոխվեց Արթուր Ալեքսանյանի կյանքում, Արթուր Ալեքսանյան մարդու մեջ:

Փոփոխությունները միայն դրական են եղել: Ես հասա իմ կյանքի, մարզական կարիերայի ամենաբարձր կետին, սպորտային նպատակին: Իսկ օլիմպիական չեմպիոն դառնալով՝ չեմ կարծում մարդ պետք է փոխվի մարդկային տեսակետից: Ես չեմ տառապում աստղային հիվանդությամբ, ես նույն Արթուրն եմ, նույն մարդը: Չնայած, դա ես չէ, որ պետք է ասեմ, փոխվել եմ, թե ոչ, երեւի ինձ հետ շփվողները կասեն: Բայց, իմ կարծիքով, ես չեմ փոխվել, չեմ մեծամտացել եւ ոչ մեկի վերեւից չեմ նայում:

Անձնական կյանքի ժամանակ մնո՞ւմ է: Անձնական կյանքում փոփոխություն կա՞:

Վերջերս լուրեր էին տարածվել, թե ես ամուսնանում եմ (ծիծաղում է): Անձնական կյանքում ոչ մի փոփոխություն չկա, նման բան չկա, ես չեմ ամուսնացել, չեմ ամուսնանում: Բոլորը զանգում հարցնում են, թե ամուսնացել եմ... Ոչ:

Սիրտդ դեռ ազատ է:

Այո:

Եթե սիրահարվես, ըստ քեզ, կարո՞ղ ես համատեղել սպորտն ու անձնական կյանքը:

Իմ կարծիքով, ես կկարողանամ այդ երկուսը համատեղել: Ինձ մոտ կստացվի: Չեմ կարծում, թե սպորտն ու անձնական կյանքը անհամատեղելի են: Ուղղակի պետք է ունենաս համպատասխան կողակից՝ հասկացող եւ ըմբռնող: Թերեւս, ես կկարողանամ:

Ի՞նչ տրամադրությամբ ես պատրաստվում դիմավորել Նոր տարին:

Տոնական տրամադրություն դեռեւս չկա: Կարծում եմ, պատճառն այն է, որ մինչեւ օլիմպիական տարվա վերջ մեր թիմը մարզումների մեջ եղավ, հավաք անցկացրինք Ծաղկաձորում: Այն օրերին, երբ բոլորը տոնական եռուզեռի մեջ էին, տոնական առեւտուր, տոնածառ դնել եւ այլն, մենք մարզադահլիճում էինք: Միայն դեկտմերի 27-ին ավարտեցինք մարզումները: Մի քանի օր կհանգստանանք եւ նոր տարում կսկսենք նոր մրցաշրջան, մարզումներ, մրցումներ:

Այս տարի Նոր տարին նշելու եմ ընկերական միջավայրում. ընկերներիս հետ մեկնում եմ Լաս Վեգաս, այնտեղ եմ դիմավորելու 2017 թվականը:

Ամանորի գիշերվա հեքիաթին, խորհրդավորությանը հավատո՞ւմ ես:

Ինչ-որ չափով հավատում եմ:

Արթուր, ի՞նչ երազանքով էիր դիմավորել 2016 թվականը, իրականացա՞վ քո երազանքը:

Նոր տարվա գիշերն անցյալ տարի երազանք չէի պահել, բայց հիշում եմ, որ մինչեւ Օլիմպիական խաղերը չի եղել այնպիսի մի օր, որ օլիմպիական ոսկե մեդալի մասին չմտածեի:

Ի՞նչ երազանքով կդիմավորես 2017 թվականը, ի՞նչ կուզես Ձմեռ պապից քեզ համար:

Ձմեռ պապի գոյությանը հավատացել եմ փոքր տարիքում, մինչեւ 7-8 տարեկանս: Շատ եմ սիրել Ձմեռ պապից նվեր ստանալ: Ինքս էլ սիրում եմ շատ նվերներ անել մարդկանց: Չնայած, որ երբեք Ձմեռ պապ չեմ եղել:

Այս տարի Ձմեռ պապից ինձ համար ոչինչ չեմ խնդրել: Մեր ժողովրդի ու զինվորների համար երազանքով կդիմավորեմ նոր տարին. թող մեր ժողովուրդը խաղաղ երկնքի տակ ապրի, հարուստ լինի, իսկ մեր զինվորները ողջ-առողջ հետ վերադառնան իրենց ընտանիքներ, մայրերին:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում


  • Այս թեմայով