Արթուր Ալեքսանյան. Անելու եմ հնարավորը, որ նվաճեմ բաղձալի օլիմպիական ոսկին

Ես շատ ուրախ եմ, որ այս տարի եւս ինձ հաջողվեց հռչակվել Հայաստանի լավագույն մարզիկ, ինչի համար շնորհակալ եմ մարզական լրագրողներին, որ բարձր են գնահատել իմ աշխատանքը: Այդ մասին NEWS.am Sport-ի թղթակցի հետ զրույցում ասաց երկրորդ տարին անընդմեջ Հայաստանի լավագույն մարզիչ ճանաչված, հունահռոմեական ըմբշամարտի աշխարհի կրկնակի չեմպիոն Արթուր Ալեքսանյանը:

«Յուրաքանչյուր մարզիկի համար մեծ նվաճում է դառնալ երկրի տարվա լավագույն մարզիկը, ինձ համար եւս: Իսկ այս նվաճումն ավելի շատ պարտավորեցնող է, քանի որ Հայաստանը սպորտային երկիր է, եւ մեծ պատիվ է լինել այդ երկրի լավագույն մարզիկը: Այս պարգեւատրումները մեծ ուշադրություն են մարզիկների համար, իսկ մարզիկների համար շատ կարեւոր է նման ուշադրությունը:

Հաջորդ տարի օլիմպիական տարի է, շատ կարեւոր տարի է: Ես արդեն ունեմ օլիմպիական ուղեգիր: Մեծ պատասխանատվությամբ պատրաստվում ենք Օլիմպիական խաղերին, նոր եմ վերադարձնել ծաղկաձորյան հավաքից, հունվարից կվերսկսվեն հավաքներրը, միջազգային մրցաշարեր եւ այդպես մինչեւ Օլիմպիական խաղեր: Փորձում եմ ամեն ինչ անել եւ անելու եմ հնարավորը, որ Օլիմպիական խաղերում ձեռք բերեմ այդ բաղձալի ոսկե մեդալը մեր երկրի, մեր ժողովրդի համար»,- ասաց Արթուր Ալեքսանյանը:

Հայաստանի 10 լավագույն մարզիկները 2015-ին

1. Արթուր Ալեքսանյան՝  հունահռոմեական ոճի ըմբշամարտ - 339  միավոր

2. Միհրան Հարությունյան՝ հունահռոմեական ոճի ըմբշամարտ - 267                 

3. Հարություն Մերդինյան՝ սպորտային մարմնամարզություն - 265                            

4. Տիգրան Մարտիրոսյան՝ ծանրամարտ - 231

5. Արթուր Թովմասյան՝ սպորտային մարմնամարզություն - 113                                       

6. Արման Երեմյան՝ թաեքվոնդո - 107

7. Տիգրան Կիրակոսյան՝ սամբո - 106

8. Արամ  Ավագյան՝ բռնցքամարտ - 101

9. Անդրանիկ Կարապետյան՝  ծանրամարտ - 99

10. Սմբատ Մարգարյան՝ ծանրամարտ - 95        

Մարզական լրագրողները հարցաթերթիկներում նշել են եւս 3 մարզիկների անուններ. Արթուր Դավթյան (սպորտային մարմնամարզություն, 81 միավոր), Լեւոն Արոնյան (շախմատ, 35 միավոր) եւ Հենրիխ Մխիթարյան (ֆուտբոլ, 31 միավոր):

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում