Ֆուտբոլի աշխարհի ու Եվրոպայի չեմպիոն Յուրի Ջորկաեֆը ԱԿԲԱ-Կրեդիտ Ագրիկոլ բանկի թիմի կազմում մասնակցել է բարեգործական հանդիպման: Մրցակիցը եղել է Հայաստանի լրագրողների հավաքականը: «Փյունիկ» ակումբի մարզադաշտում կայացած խաղում գրանցվել է ոչ ոքի՝ 1:1: Լրագրողների թիմի կազմում աչքի է ընկել NEWS.am Sport-ի խմբագիր Դավիթ Եղիազարյանը, ում գոլին բանկի թիմն առաջին խաղակեսում պատասխանել է անվրեպ իրացրած 11 մետրանոց հարվածով: Լրագրողների թիմում խաղացել է նաեւ Հայաստանի ազգային հավաքականի նախկին գլխավոր մարզիչ Վարդան Մինասյանը, որը խաղադաշտ է դուրս եկել երկրորդ խաղակեսեում: Յուրի Ջորկաեֆը եւս մասնակցել է միայն երկրորդ խաղակեսին, որը տեւել է 20 րոպե:
Լրագրողների թիմում ընդգրկված են NEWS.am-ի, Mediamax.am-ի, «Հայաստանի Հանրապետություն» թերթի, Առաջին ալիքի, «Արմենիա» հեռուստաընկերության, Հանրային ռադիոյի ու այլ լրատվամիջոցների ներկայացուցիչներ, իսկ մարզիչը մարզական մեկնաբան Կարեն Գիլոյանն է:
Հիշեցնենք, որ Ֆրանսիայի հավաքականի նախկին կիսապաշտպանը Հայաստան է ժամանել Երեւանում հոկտեմբերի 3-ին կայանալիք միջազգային կիսամարաթոնին մասնակցելու համար:
Յուրի Ջորկաեֆը Երեւանում ֆուտբոլ խաղացել էր նաեւ 1999-ի սեպտեմբերի 8-ին, երբ Եվրո-2000-ի ընտրական փուլում Ֆրանսիայի հավաքականը «Հրազդան» ստադիոնում 3:2 հաշվով կամային հաղթանակ տարավ Հայաստանի նկատմամբ: Այդ օրը Հայաստանի հավաքականից աչքի ընկան Կարապետ Միքայելյանն ու Արմեն Շահգելդյանը, իսկ ֆրանսիացիներից՝ Զինեդին Զիդանը, Լիլիան Լասլանդը եւ հենց Յուրի Ջորկաեֆը:
Հայաստանի լրագրողների հավաքականը ստեղծվել է 2014-ի սեպտեմբերին եւ մինչեւ օրս անցկացրել է 3 հանդիպում: Առաջին խաղը լրագրողներն անցկացրել են Հայաստանի մարզիչների հավաքականի հետ՝ պարտվելով 3:7 հաշվով, իսկ երկրորդ մրցավեճում Երեւանի «Հրազդան» ստադիոնում 2:0 հաշվով առավելության են հասել Ազգային ժողովի թիմի նկատմամբ: Երրորդ մրցակիցն էր Պաշտպանության նախարարության թիմը, որի դեմ խաղում գրանցվեց մարտական ոչ ոքի՝ 8:8:
Լուսինե Շահբազյան
Լուսանկարներն՝ Արսեն Սարգսյանի / NEWS.am Sport
Հետևեք NEWS.am SPORT-ին Facebook-ում, Twitter և Telegram-ում
16:27 , 28 ապրիլի 
16:02 , 28 ապրիլի 
15:04 , 28 ապրիլի 
13:23 , 28 ապրիլի 
12:06 , 28 ապրիլի 
11:17 , 28 ապրիլի 
10:05 , 28 ապրիլի 
09:02 , 28 ապրիլի 
03:31 , 28 ապրիլի 
02:23 , 28 ապրիլի 
