11:25  +04,  3 սեպտեմբերի, 2013

Արթուր Պետրոսյան. Հենրիխ Մխիթարյանն ընտրեց սխալ թիմ

«Լիվերպուլ» տեղափոխվելն ավելի ճիշտ կլիներ Հենրիխ Մխիթարյանի համար: Հենրիխը հիանալի կընդգրկվեր Բրենդան Ռոջերսի սիրած իսպանական ֆուտբոլում: Մխիթարյանը հենց այն ֆուտբոլիստն է, ով պետք է լիվերպուլցիներին: Նա թիմին կբարձնացներ նոր մակարդակի»:

Այս մասին NEWS.am Sport-ի թղթակցի հետ զրույցում ասաց ռուսական «Спорт-Экспресс» կայքի գլխավոր խմբագիր Արթուր Պետրոսյանը, ով խոսեց Հենրիխ Մխիթարյանի տրանսֆերի, Հայաստանի հավաքականի, Մարկոս Պիզելիի հետ ծանոթության, իր անցած ուղու եւ սիրելի թիմի մասին:

Արթուր, ինչպես երեւում է ռուսական մարզական մամուլում շատ են հայերը: Այժմ արդեն «Спорт Экспресс» կայքի գլխավոր խմբագիրը նույնպես հայ է: Դու խոսո՞ւմ ես հայերեն:

Ծնվել եմ հայկական ընտանիքում, բայց ընկերներս սիրում են կատակել, թե իմ մեջ հայկական են միայն ազգանունս եւ արտաքինս: Ծնվել եմ Ռուսաստանում եւ այնպես է ստացվել, որ հիմնականում շփվել եմ ռուսների հետ: Ծնողներս նույնպես Ռուսաստանից են եւ հայերեն գրեթե չգիտեն: Ես, բնականաբար, ինձ հայ համարում եմ, բայց ամոթով եմ նշում, որ մայրենի լեզվիս չես տիրապետում: Ի դեպ, հայկական արյունից բացի, իմ մեջ կա նաեւ հունական արյուն:

Դու ներկա էիր Հայաստան – Ռուսաստան խաղին: Դա քո առաջի՞ն այցն էր Հայաստան:

Ոչ, ինձ կնքել են Էջմիածինում, երբ երեք տարեկան էի: Այդ տարիներին մեկ անգամ եւս եկանք Հայաստան: Այնուհետեւ 20 տարի չէի եկել: Նախորդ անգամ էլ եկա Հայաստան - Ռուսաստան խաղի շնորհիվ, արդեն որպես գործուղում: Հայաստանում շատ դուր եկավ հատկապես Երեւանը, մարդիկ, կլիման: Շատ յուրօրինակ զգացողություն էր, երբ շուրջբոլորը հայեր էին:

Ճի՞շտ է, որ Մարկոս Պիզելին, տեսնելով քեզ, մոտեցել է եւ սկսել խոսել հայերեն, իսկ դու չես կարողացել պատասխանել նրան:

Այո, իսկ դուք որտեղի՞ց գիտեք դա: Կարծեմ դա Մարբելիայում էր «Կուբանի» հավաքից առաջ: Ես թիմից շուտ էի ժամանել եւ օդանավակայանում սպասում էի նրանց: Մարկոսի հետ այդ ժամանակ ծանոթ չէինք: Նա նկատեց ինձ, մոտեցավ, սեղմեց ձեռքս եւ հարցրեց, թե ինչպես եմ: Ես ասացի, որ լավ եմ եւ միանգամից անցա անգլերենի: Այդպես ծանոթացա նրա հետ:

Շատ հայտնի մարզական լրագրողներ ունեն ոչ համապատասխան կրթություն: Որտե՞ղ ես սովորել եւ ինչպե՞ս ես հայտնվել այս ոլորտում:

Կարելի է ասել, ես նույնպես պատահական հայտնվեցի այս ոլորտում: Մասնագիտությամբ տնտեսագետ եմ: Աշխատել եմ տարբեր հաստատություններում՝ սկսած «Роснефти»-ից մինչեւ «Сбербанк», բայց հետո հասկացա, որ դա իմը չէ: Տխուր էր եւ անհետաքրքիր: Հայտնի մարզական լրագրող ընկերս առաջարկեց ուժերս փորձել մարզական նոր թերթում: Փորձեցի եւ մնացի այս ոլորտում: Գրում էի տարբեր պարբերականների համար: Հետո տեղափոխվեցի «РТР-Спорт», Sportbox.ru, իսկ հիմա աշխատում եմ «Спорт Экспресс»-ում:

Ի՞նչ են ամենաշատը կարդում ձեր ընթերցողները: Ո՞ր բաժիններն են ամենաընթերցվողները ձեր կայքում:

Կարծում եմ՝ «Спорт Экспресс»-ը ոչ միայն Ռուսաստանում, այլեւ ամբողջ ԱՊՀ-ում առաջատար է իր բացառիկ նյութերով: Ոչ ոք չունի թղթակիցների այդպիսի մեծ ցանց, ինչպիսին ունենք մենք: Շատ նորություններ եւ հարցազրույցներ սկզբում հայտնվում են մեր կայքում, իսկ հետո՝ միայն մյուսների մոտ: Թերթն ու կայքն ունեն շատ մեծ լսարան եւ հեղինակություն են վայելում ընթերցողների շրջանում: Ամենաշատը, բնականաբար, կարդում են հենց բացառիկ նյութերը:

Արթուր, դու Հայաստանում հայտնի դարձար Հենրիխ Մխիթարյանի՝ «Բորուսիա» տեղափոխության ժամանակ: Հայկական շատ լրատվամիջոցներ այդ օրերին հղում էին կատարում քո թվիթերյան էջին, որտեղ ամեն օր գրում էիր Հենրիխի տրանսֆերի մասին: Այժմ, հետեւելով Մխիթարյանի խաղերին Բունդեսլիգայում, չե՞ս կարծում, որ նա ճիշտ ընտրություն է կատարել:

Ոչ, չեմ կարծում: Նա պարտավոր էր տեղափոխվել «Լիվերպուլ», քանի որ դա իմ սիրած թիմն է: Իրականում, եթե կատակը մի կողմ դնենք, միեւնույն է վստահ եմ, որ «Լիվերպուլ» տեղափոխվելն ավելի ճիշտ կլիներ նրա համար: Հենրիխը հիանալի կընդգրկվեր Բրենդան Ռոջերսի սիրած իսպանական ֆուտբոլում: Համակարգված խաղ մեծ արագության վրա, կարճ փոխանցումներ, թիմային խաղ, գնդակ պահելու կարողություն. Մխիթարյանը հենց այն ֆուտբոլիստն է, ով պետք է լիվերպուլցիներին: Նա թիմին կբարձրացներ նոր մակարդակի:

Ինչպե՞ս ստացվեց, որ սկսեցիր երկրպագել «Լիվերպուլին»: Քո հասակակիցները հիմնականում երկրպագում են այլ թիմերի:

Իմ հասակակիցնե՞րը: Իսկ ո՞ւմ են երկրպագում նրանք: Հիշում եմ առաջին խաղը, որը դիտել եմ «Լիվերպուլի» մասնակցությամբ. դա 1992-ին «Սանդերլենդի» դեմ Անգլիայի Գավաթի եզրափակիչն էր: «Լիվերպուլը» հաղթեց 2:0 հաշվով: Այդ նույն օրն իմ սիրելի ռուսական թիմը՝ «Սպարտակը», նույնպես Գավաթի եզրափակչում հաղթեց 2:0 հաշվով: Ես այդ ժամանակ մարզադաշտում էի: Դա շատ սիմվոլիկ էր: Այդ զուգադիպությունը հիմք հանդիսացավ իմ սիրուն դեպի «Լիվերպուլը»: Այդ երկու թիմերի մարզաշապիկների գույներն էին անգամ նման իրար: Ծնողներիս սերը դեպի Բիթլզը նույնպես մեծ դեր խաղաց այդ հարցում: Իսկ ֆուտբոլային կյանքիս ամենահիշարժան օրը 2005-ի մայիսի 25-ն էր: Ես Ստամբուլի մարզադաշտում էի եւ տեսա լիվերպուլյան այդ հրաշքը: Մինչեւ այժմ էլ փշաքաղվում եմ՝ հիշելով «Միլանի» նկատմամբ տարած հաղթանակը:

Հետեւո՞ւմ ես հայկական ֆուտբոլին: Ի՞նչ  կասես Հայաստանի հավաքականի մասին:

Այս հավաքականն ամենաուժեղն է պատմության մեջ: Մնում է միայն գտնել լավ պաշտպանների եւ դարպասապահի, ով կփոխարինի Ռոման Բերեզովսկուն:

Չե՞ս կարծում, որ մինչեւ գտնեն այդ պաշտպաններին, գուցե հարձակվողներն արդեն «կծերարան»:

Եթե ֆուտբոլային դպրոցը նորմալ աշխատի եւ ամեն սերնդի մեջ լավ ֆուտբոլիստներ լինեն, ապա խնդիր չի լինի: Որքանով է դա իրական, դուք կիմանաք ավելի լավ:

Քո կանխատեսումը Հայաստանի հավաքականի՝ չեխերի եւ դանիացիների դեմ խաղերում:

Վատատեսորեն կհնչի, բայց կարծում եմ, որ Հայաստանի հավաքականը կպարտվի չեխերին, իսկ դանիացիների հետ լավագույն դեպքում կգրանցվի ոչ ոքի:

Արթուր վերջերս մարզական լրագրողներն ընտրեցին Եվրոպայի լավագույն ֆուտբոլիստին: Եթե դու քվեարկեիր, ինչպե՞ս կբաշխեիր ձայներդ:

Վերջնական արդյունքի պես՝ Ռիբերի, Մեսի, Ռոնալդու:

Վերջում փոքր բլից

Բոլոր ժամանակների լավագույն մարզիչը

Բիլ Շենկլին

Լավագույն ֆուտբոլիստը

Ջեյմի Կարագերը

Լավագույն մարզադաշտը

Բնականաբար, «Էնֆիլդը» թե՛ մթնոլորտի, թե՛ ֆուտբոլ դիտելու հարմարավետության առումով: Սիրում եմ նաեւ «Սեւիլիայի» մարզադաշտի մթնոլորտը: «Սանտիագո Բերնաբեուում» ֆուտբոլ դիտելը նույնքան հարմար է, որքան «Էնֆիլդում»:

Ամենագեղեցիկ գոլը

Մարկո վան Բաստենի՝ 1988-ին խփած գոլը Դասաեւի դարպասը:

Լավագույն դարպասապահը

Բուֆոնը:

Վերա Մարտիրոսյան

Հետևեք NEWS.am SPORT-ին Facebook-ում և Twitter-ում


Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

  • Լրահոս
  • Հարցում
Քվեարկել են (12)
  • Ֆեյսբուք
  • NEWS.am Sport Exclusive
  • Արխիվ