Ֆուտբոլի Ռուսաստանի առաջնության չորրորդ տուրում Կրասնոդարի «Կուբանն» ընդունել էր Մոսկվայի «Սպարտակին»: Հանդիպումն ավարտվեց 2:2 հաշվով:
Հայաստանի հավաքականի ֆուտբոլիստներ Յուրա Մովսիսյանը եւ Արաս Օզբիլիսը խաղը սկսեցին «Սպարտակի» փախարինողների թվում, սակայն դա Վալերի Կարպինի թիմին չխանգարեց ընդմիջման գնալ մեկ գոլի առավելությամբ: 30-րդ րոպեին «Սպարտակի» նիգերիացի հարձակվող Էմանուել Էմենիկեն խփեց առաջին խաղակեսի միակ գնդակը:
61-րդ րոպեին «Կուբանի» երկրպագուների սուլոցների ներքո փոխարինման դուրս եկավ Արաս Օզբիլիսը, ինչից հետո կրասնոդարցիները շատ արագ առաջ անցան հաշվի մեջ: Սենեգալցի հարձակվող Իբրահիմ Բալդեն խփեց «Կուբանի» առաջին գոլը, իսկ իսպանացի պաշտպան Անխել Դեալբերտը՝ երկրորդ: «Սպարտակին» փրկության հասավ Յուրա Մովսիսյանը, ով 71-րդ րոպեին դուրս եկավ փոխարինման, իսկ 4 րոպե անց անկրկնելի հարվածով խփեց հյուրերի երկրորդ գնդակը՝ վերջակետ դնելով խաղին:
Չորրորդ տուրից հետո «Սպարտակն» ու «Ռոստովը» 10-ական միավորվ գլխավորում են մրցաշարային աղյուսակը, իսկ «Կուբանը» 6 միավորով 7-րդն է:
Ռուսաստանի առաջնություն. չորրորդ տուր
«Կուբան» - «Սպարտակ»՝ 2:2
Իբրահիմ Բալդե, 66, Անխել Դեալբերտ, 70 – Էմանուել Էմենիկե, 30, Յուրա Մովսիսյան, 75
Հետևեք NEWS.am SPORT-ին Facebook-ում, Twitter և Telegram-ում