Էդուարդ Սպերցյան․ Վաղվանից ազգային հավաքականում սկսվում է նոր պատմություն

Մարտական ենք տրամադրված: Վստահությամբ կարող եմ ասել, որ վաղվանից ազգային հավաքականում սկսվում է նոր պատմություն:

Այս մասին լրագրողների հետ հանդիպմանն ասաց ֆուտբոլի Հայաստանի հավաքականի ավագ, սաուդյան «Ալ Ահլիի» կիսապաշտպան Էդուարդ Սպերցյանը:

Ազգերի լիգայի խմբային փուլի առաջին տուրում Հայաստանի հավաքականը սեպտեմբերի 25-ին կընդունի Լատվիայի հավաքականին։

«Ազգերի լիգան բավականին բարդ մրցաշար է: Արդեն ադապտացվել եմ հավաքականի ճամբարում: Հետաքրքիր հանդիպումներ ենք ունենալու վաղը եւ եւս 3 օր անց: Հավաքականում շատ լավ թիմ է ձեւավորվել: Բոլորս փորձում ենք մարզավիճակ հավաքել: Շատ կարոտել էի հավաքականը: Ինձ համար մեծ պատիվ է խաղալ Հայաստանի հավաքականում: Շատ ուրախ եմ, որ այստեղ եմ: 

4 հանդիպում ունենք եւ բավականին լուրջ գրաֆիկով ենք պատրաստվելու բոլոր խաղերին: Վաղը կհանդիպենք Լատվիային, որի հետ բազմիցս մրցել ենք խաղադաշտում: Այս պահին չեմ ցանկանում հետ նայենք, անցյալը վերհիշենք, այլ տրամադրվենք վաղվա խաղին: Պետք է ապրենք նոր օրով: Վաղը մեզ սպասվում է լիովին նոր խաղ, նոր հանդիպում: Հավաքականում տրամադրությունը եւ մթնոլորտը լավ է: Մարտական ենք տրամադրված: Հուսանք՝ վաղը հաղթանակ կունենանք:

Հաղթելու հնարավորություն միշտ կա եւ ցանկացած խաղում: Շատ բան կախված է մեզանից: Ամեն օր նոր մարզումներ, նոր աշխատանք ենք տանում: Թիմում մոտիվացիա կա: Վաղվանից սկսում ենք:

Այսօր ես նույնպես չեմ ցանկանում խոսել հավաքականի խնդիրների մասին: Կենտրոնանանք վաղվա խաղի վրա, թե ինչ է լինելու վաղը: Չեմ ցանկանում մեկնաբանել մյուս թեմաները:

Ինձ շատ է դուր եկել ազգային հավաքականի նոր մարզահագուստը: Իրականում՝ այդքան էլ էական չի, թե ինչ գույների մարզաշապիկով ենք խաղալու: Մենք խաղում ենք մեր երկրի համար: Շատ կուզեի, որ այս նոր մարզաշապիկը հաջողակ լինի մեզ համար: 

Տեսնելով հավաքականին այսօր, վստահությամբ կարող եմ ասել, որ վաղվանից ազգային հավաքականում սկսվում է նոր պատմություն: 

Ինձ համար կարեւոր չէ, թե ես որ դիրքում եմ խաղում հավաքականում, այլ կարեւոր է, որ անպայման խաղամ»,- ասաց Էդուարդ Սպերցյանը:

Հայաստան - Լատվիա հանդիպումը կմեկնարկի 20:00-ին:

Լուսինե Շահբազյան

Լուսանկարը՝ Էմմա Ասատրյանի

Հետևեք NEWS.am SPORT-ին Facebook-ում, Twitter և Telegram-ում