Մանուել Տուլիպա․ Մեր պարտության պատճառը շատ պարզ է

Չեմ ուզում, որ այս արդյունքը մեզ կոտրի, առջեւում շատ խաղեր ունենք: Մեր պարտության պատճառը շատ պարզ է, մրցակիցը շատ ուժեղ թիմ էր եւ մեզ գերազանցեց: Որեւէ մեկին դուր չի գալիս պարտվել, բայց պետք է պատրաստ լինենք մրցաշարի ընթացքում հանդիպել նման թիմերի: Պարտության պատասխանատվությունն ինձ վրա եմ վերցնում, որովհետեւ ես եմ ընտրում կազմը, ֆուտբոլիստներին:

Այսպես Եվրոպայի լիգայի հիմնական փուլի առաջին խաղում տանը չեխական «Սպարտայից» կրած 1:4 հաշվով պարտությունը մեկնաբանեց ֆուտբոլի Հայաստանի չեմպիոն «Արարատ-Արմենիայի» պորտուգալացի գլխավոր մարզիչ Մանուել Տուլիպան:

«Շատ լավ մտանք խաղի մեջ: Սկզբում շատ լավ հնարավորություններ ունեցանք: Խնդիրներ ունեցանք ստանդարտների ժամանակ: Գիտեինք, թե որքան լավ է մրցակիցը խաղում մենապայքարներում: Մրցակիցն իսկապես մասնագետ էր անկյունայինների ու ստանդարտների:

Մեր պարտության պատճառը շատ պարզ է, մրցակիցը շատ ուժեղ թիմ էր եւ մեզ գերազանցեց: Առաջին րոպեներին մեր հնարավորությունները չօգտագործեցինք, ապա երկու րոպեում երկու գոլ բաց թողեցինք ու չկարողացանք հետ բերել: Մենք չէին կարողանում հաջող սկսել մեր գրոհները խորքից, որն էլ նրանց հաղթաթղթերից մեկն էր: Հնարավոր չի նման մրցակցի դեմ խաղում ունենալ 70 տոկոս գնդակի վերահսկողություն: Գոլային պահերի առումով հավասար իրավիճակ էր: Մրցակիցը 5 ֆուտբոլիստով գալիս էր պրեսինգի: Այսպիսի իրավիճակներում ունեինք լուրջ խնդիրներ: «Սպարտայի» դեմ գնդակ երկար պահելը բավականին բարդ էր:

Որեւէ մեկին դուր չի գալիս պարտվել, բայց խաղից կային որոշակի դրական նշաններ: Մենք պետք է պատրաստ լինենք մրցաշարի ընթացքում նման թիմերի հանդիպել: Եվրոպայի լիգան միջակ մրցաշար չի, սա ուժեղագույն մրցաշարերից մեկն է, եւ մենք դեռ հանդիպելու ենք բարձրակարգ թիմերի:

Պետք է վերանայեմ խաղը, վերանայեմ նաեւ իմ սխալները: Ես նույնպես շատ սխալներ եմ թույլ տալիս: Հիմա հասկանում եմ, որ եթե խաղայինք 5 պաշտպանով, գուցե ավելի լուրջ խնդիրներ կարողանայինք ստեղծել մրցակցի համար:

Չեմ ուզում, որ այս արդյունքը մեզ կոտրի, առջեւում շատ խաղեր ունենք եւ պետք է պատրաստ լինենք այսպիսի թիմերի դեմ պայքարին:

Ես չեմ ուզում, որ մենք խաղանք մշտական ճնշման տակ:

Եվրոպայի լիգան Եվրոպայի նշանակությամբ երկրորդ մրցաշարն է: Երբ հիմնական փուլի վիճակահանության արդյունքներն ամփոփեցի, թիմերին ուսումնասիրեցի, հասկացա, որ կարող ենք 8-9 միավոր վաստակել: Մեր հիմնական նպատակ դա է: Ամեն դեպքում՝ գիտեի, որ «Սպարտան» ուժեղ թիմ է եւ մեզ համար լուրջ խնդիրներ է ստեղծելու:

«Սպարտան» հզոր թիմ է, ես գիտեմ, թե որքան բյուջե ունի:

Կարող էինք հաղթել այսօր, եթե օգտագործեինք առաջին րոպեների մեր հնարավորությունները, բայց ֆուտբոլը «եթե»-ների մասին չէ: Մրցակիցը երկու ստանդարտ իրացրեց՝ երկու րոպե, երկու գոլ:

Պարտության պատասխանատվությունն ինձ վրա եմ վերցնում, որովհետեւ ես եմ ընտրում կազմը, ֆուտբոլիստներին: Սա շատ բարձր մակարդակի, բարդ խաղ էր շատ ուժեղ մրցակցի դեմ: Ինձ համար այս հանդիպումը մեծ դաս էր»,- ասաց Մանուել Տուլիպան:

Երկրորդ տուրում «Արարատ-Արմենիան» հոկտեմբերի 15-ին կհյուրընկալվի լեհական «Յագելոնիային»։

Լուսինե Շահբազյան

Լուսանկարը՝ Էմմա Ասատրյանի

Հետևեք NEWS.am SPORT-ին Facebook-ում, Twitter և Telegram-ում