Մեկնարկեց Աղասի Աղասյանի առաջին հուշամրցաշարը, մասնակցում է նաեւ անվանի ծանրորդի որդին (ֆոտո, վիդեո)

Երեւանի Օլիմպիական հերթափոխի պետական քոլեջում oգոստոսի 29-30-ը անցկացվում է ծանրամարտի Հայաստանի բազմակի չեմպիոն, Եվրոպայի բրոնզե մեդալակիր, Համաշխարհային ուսանողական խաղերի չեմպիոն, Եվրոպայի Մ-23 կրկնակի չեմպիոն Աղասի Աղասյանի հուշամրցաշարը:

Առաջին անգամ անցկացվող հուշամրցաշարին մասնակցում են պատանի ծանրորդները: Մասնակիցների թվում է նաեւ Աղասի Աղասյանի որդին՝ կրտսեր Աղասի Աղասյանը:

Օգոստոսի 29-ին տեղի ունեցավ հուշամրցաշարի բացումը, որին ներկա էին Աղասի Աղասյանի կինը, հայրը, Հայաստանի ծանրամարտի ֆեդերացիայի անդամներ, մարզաշխարհի ներկայացուցիչներ, ծանրորդներ: Մինչեւ հուշամրցաշարի բացումը, ընտանիքի անդամները, Հայաստանի ծանրամարտի ֆեդերացիայի ներկայացուցիչների հետ այցելեցին ծանրորդի գերեզման: Հիշեցնենք, որ Աղասի Աղասյանը մահացել է 2019 թվականին ավտովթարից:

ՀԾՖ գլխավոր քարտուղար, Եվրոպայի կրկնակի չեմպիոն, աշխարհի առաջնության բրոնզե մեդալակիր Սամվել Գասպարյանի խոսքով, Աղասի Աղասյանի հուշամրցաշար անցկացնելու մտահաղացումը ֆեդերացիայինն է: NEWS.am Sport-ի թղթակցի հետ զրույցում Հայաստանի հավաքականի նախկին անդամը նշեց, որ հուշամրցաշարը լինելու է ամենամյա՝ հետագայում միջազգային դառնալու նպատակով:

«Աղասի Աղասյանի հետ թիմակից ընկերներ ենք եղել: Շատ մտերիմ էինք: Նրա հետ կապված վառ հիշողություններ ունեմ: Անկախ տարիքային տարբերությունից, մոտ ընկերներ էինք: Հիշում եմ՝ դեպքի օրը, երբ իմացանք, հավաքի էինք, առաջինը ես եւ Ռուբեն Ալեքսանյանը գնացինք հիվանդանոց: Դժվար օրեր էին բոլորիս համար: Հետագայում միշտ միտք եմ ունեցել ֆեդերացիային առաջարկել կազմակերպել Աղասի Աղասյանի հիշատակին նվիրված մրցաշար: Երբ ֆեդերացիան փոխվեց, առաջարկեցի նախագահին, մեր ծրագրում ներառեցինք: Օլիմպիական հերթափոխի քոլեջը հանձն առավ մրցաշարի անցկացումն ու ամբողջ ֆինանսավորումը, քանի որ քոլեջը չուներ ծանրամարտի մրցաշար: Արդեն ամեն տարի քոլեջը կանցկացնի Աղասի Աղասյանի հուշամրցաշար: Երկու տարի անց նրա 40-ամյակին կփորձենք հուշամրցաշարը դարձնել միջազգային, որպեսզի մեր հարեւան երկրներից էլ մասնակցեն:

Մեր նպատակն է, որ Աղասիի հիշատակը միշտ վառ մնա: Նա օրինակելի է նոր սերնդի համար որպես Համաշխարհային ուսանողական խաղերի առաջին չեմպիոն հայկական ծանրամարտում: Այս տարի Բաթումիում անցկացված Եվրոպայի առաջնության բացմանը մեզ հանձնեցին Աղասիի մեդալները, որին նա արժանացել էր հետմահու:

Աղասին հայկական ծանրամարտում արդարության խորհրդանիշն է, մասնավորապես Ռիոյի Օլիմպիական խաղերից հետո, երբ նրան չընդգրկեցին օլիմպիական հավաքական: Սա մեծ դաս եղավ իմ սերնդի բոլոր ծանրորդների համար, որ հավաքականում մինչեւ վերջ պետք է պայքարել տեղի, մեդալի, դիրքի համար, որպեսզի անարդար որոշումները չխանգարեն եւ չփչացնենք մարդկանց ճակատագրերը:

Այժմ Աղասիի ճանապարհը շարունակում է նրա որդին՝ կրտսեր Աղասի Աղասյանը եւ իր հայրիկի առաջին հուշամրցաշարում մասնակցում է 51 կգ քաշային կարգում: Հեռանկարային ծանրորդ է, շատ համեստ է, հայրիկի հակապատկերն է: Ձգտում ունի, բայց դեռ հայրիկի չափ չի: Սպորտային ագրեսիա չունի, ինչպիսին ուներ Աղասին, ինչը շատ կարեւոր է սպորտում: Իր չեմպիոն հայրիկի արժանի հետնորդ է:

2027 թ.-ից Աղասի Աղասյանի հուշամրցաշարը կլինի դեռահասների Հայաստանի պաշտոնական առաջնությունը, որպեսզի Եվրոպայի Մ-15 առաջնության կազմի ընտրությունը կատարենք այս մրցաշարից»,- ասաց Սամվել Գասպարյանը:

Աղասի Աղասյանի կինը՝ Արմինե Գաբրիելյանը, որը հետեւում էր որդու մրցելույթներին, NEWS.am Sport-ի հետ զրույցում ասաց, որ ամուսնու հուշամրցաշարի անցկացումը երկար սպասված էր իր եւ ընտանիքի համար:

«Այսօր շատ պատասխանատու, ուրախ եւ երկար սպասված օր է մեզ համար: Ուրախ ենք եւ շնորհակալ ֆեդերացիային այս հնարավորության համար, որ տեղի ունեցավ Աղասի Աղասյանի հուշամրցաշարը: Որդիս՝ Աղասին հաճույքով է մարզվում: Անկեղծ կլինեմ՝ մինչեւ այս նրան չէի տեսնում ծանրամարտում, բայց նա ընտրեց հայրիկի ուղին: Շատ կցանկանամ, որ հայրիկի չկատարած երազանքը եւ կիսատ թողած գործը որդիս իրականացնի, ամենակարեւորը՝ մասնակցի Օլիմպիական խաղերին եւ դառնա հաղթող: Պատրաստ եմ որդուս հետ անցնել այն նույն ճանապարհը, որն անցել եմ Աղասիի հետ: Ամուսնուս հետ յուրաքանչյուր մրցաշար կիսել եմ, ապրել: Շատ դժվար օրեր ենք ունեցել, հաղթանակները մեր միասնական հաղթանակներն են եղել:

Որդիս իր նախաձեռնությամբ է սկսել զբաղվել ծանրամարտով: 3 տարեկանից հայրիկի հետ միշտ ժամանել է մարզադահլիճ, տեսել, թե ինչպես են մարզվում: Սկզբում մարմնամարզությամբ էր զբաղվում, հետո ձյուդոյով, հետո ինքնակամ որոշեց, որ պետք է զբաղվի ծանրամարտով: Իր հայրիկի մարզիչ՝ Երվանդ Կիրակոսյանին խնդրեց, որ իր մոտ հաճախի մարզումների:

Այս պահին հպարտության զգացողություններ եմ ապրում, հուզմունք, որ իմ ամուսնու անվան հուշամրցաշար է անցկացվում: Շատ հպարտ եմ իմ ամուսնով, նրա կատարած աշխատանքով հայկական ծանրամարտում: Նա արժեքներ է կերտել հայկական ծանրամարտում իր նվաճումներով: Ոգեւորված եմ այս իրադարձությունով»,- նշեց Աղասի Աղասյանի կինը:

Պատանի ծանրորդների հետ մրցահարթակում աշխատում է ծանրամարտի Հայաստանի պատանեկան հավաքականի ավագ մարզիչ Երվանդ Կիրակոսյանը, որը եղել է Աղասի Աղասյանի անձնական մարզիչը: Այսօր Երվանդ Կիրակոսյանը մարզում է կրստեր Աղասի Աղասյանին:

«Աղասի Աղասյանը լավ ծանրորդ էր: Բոլորիս նպատակը մեկն է՝ վառ պահել Աղասիի հիշատակը: Աղասիի հետ կապված շատ հիշողություններ ունեմ: Վառ կերպար էր, կենսուրախ, հումորով, ընկերասեր, մարդամոտ էր: Նա իր առաջին քայլերն ինձ մոտ է արել այն նույն տարիքից, ինչ իր տղան է այսօր:

Կրտսեր Աղասի Աղասյանը հեռանկարային երեխա է: Այսօր հետաքիքր կիլոգրամներ բարձրացրեց՝ պոկումը՝ 47 կգ, հրումը՝ 63 կգ: Մարզումներին այս կիլոգրամները չէր բարձրացրել: Կշարունակենք աշխատել եւ փորձել բարձր արդյունքներ գրանցել ծանրամարտում: Սպորտային բնավորությունը լավն է, նմանություն ունի հայրիկին:

Այս հուշամրցաշարը կարեւոր նպատակ ունի՝ բացահայտել դեռահաս ծանրորդների, որոնք հետագայում կհամալրեն թիմը»,- ասաց Երվանդ Կիրակոսյանը:

Հուշամրցաշարին մասնակցում է 80 ծանրորդ Գյումրիից, Վեդիից, Արարատից, Երեւանից, մասնակիցներ կան նաեւ Սյունիքի մարզից:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում