Կարինա Ակոպովա․ Հպարտ եմ, որ «Արցախը» ներկայացնելու ենք Օլիմպիական խաղերում

«Արցախ» ստեղծագործությունը արմատական կապ ունի մեր երկրի հետ եւ մեծ նշանակությունի ունի հայերի համար: Հպարտ եմ, որ մենք այն ներկայացնելու ենք Օլիմպիական խաղերում: 

Այս մասին NEWS.am Sport-ի թղթակցի հետ զրույցում ասաց 25-րդ ձմեռային օլիմպիական խաղերի գեղասահքի մրցաշարում Հայաստանը ներկայացնող Կարինա Ակոպովան:

Սպորտային զույգն արդեն մեկնել է օլիմպիական քաղաք: Մեկնումից առաջ Կարինան եւ Նիկիտան NEWS.am Sport-ի հետ զրուցել են մարզական քաղաքացիությունը փոխելու,  Օլիմպիական խաղերում Հայաստանը ներկայացնելու եւ «Արցախ» ծրագրի կարեւորության մասին:

Կարինա, Նիկիտա, ժամեր անց կմեկնեք օլիմպիական քաղաք: Ի՞նչ զգացողություններ են ունեք: Պատրա՞ստ եք օլիմպիական պայքարին:

Կարինա Ակոպովա- Օլիմպիական խաղերի նախապատրաստական փուլը շատ լավ է անցել: Վստահ ենք մեր ուժերի վրա: Ոգեւորված ենք, որ արդեն հասել է պահը մեկնելու այդքան բաղձալի Խաղերին: Այս օրերին արդեն բազմաթիվ տեղեկություններ ենք ստանում եւ տեսանյութեր տեսնում Խաղերի մյուս ներկայացուցիչներից, որոնք արդեն մրցավայրում են եւ չենք համբերում, թե երբ ենք մենք էլ ժամանելու այնտեղ: Ուրախ ենք, որ եկավ այդ օրը:

Նիկիտա Ռախմանին- Կհամաձայնեմ Կարինայի խոսքերի հետ. ինձ համար եւս շատ ոգեւորիչ է այս պահը, որ եկավ այդ օրը եւ մենք մեկնում ենք Օլիմպիական խաղեր: Լավ ենք պատրաստվել եւ բարձր տրամադրությամբ ենք մեկնում:

Հայկական եւ հնդկական ծրագրով եք ներկայացնելու: Ինչո՞ւ կարճ ծրագրի համար ընտրվեց  «Արցախ» ստեղծագործությունը: Ի՞նչ ուղերձ եք ցանկանում փոխանցել մեկնարկում:

Կարինա Ակոպովա- Կարճ ծրագիրը շատ կարեւոր է մեզ համար, քանի որ ներկայանալու ենք «Արցախ» ստեղծագործության ներքո: Կրկնակի ուրախացնող է այն փաստը, որ Օլիմպիական խաղերին մասնակցելուց բացի, հնարավորություն ունենք «Արցախ» ստեղծագործությամբ մասնակցել. աստղերն այդպես դասավորվեցին մեզ համար եւ դա շատ հուզիչ է: Արդեն ասացի, որ ինձ համար շատ կարեւոր է հենց այս ստեղծագործությամբ մասնակցելը, քանի որ այն արմատական կապ ունի Հայաստանի՝ իմ երկրի հետ: «Արցախ» երաժշտությունը շատ մեծ նշանակությունի ունի հայերի համար եւ այս առումով հպարտ եմ, որ հնարավորություն ունենք այդ ստեղծագործությամբ ներկայանալ Օլիմպիական խաղերին:

Ու՞մ մտահաղացումն էր «Արցախ» ստեղծագործությունն ընտրելը:

Կարինա Ակոպովա- Մտահաղացումն իմն էր, իհարկե (ծիծաղում է): Շատերը համաձայն չէին, որ մենք «Արցախով» ներկայանանք, բայց ես պնդեցի եւ եկանք համաձայնության: Հայաստանի դրոշի ներքո սա մեր առաջին օլիմպիական մրցաշրջանն է, եւ ես կարողացա համոզել բոլորին, որ «Արցախով» Օլիմպիական խաղերին մեկնարկելը լավագույն միտքն է: Այս ծրագիրը դրված է հենց Միլան-2026-ի համար:

Երկար ծրագիրը հնդկական ֆիլմից հատվածի մոտիվներով բեմադրություն է: Համոզված ենք, որ այն նույնպես կսիրվի հանրության կողմից եւ կգնահատվի Օլիմպիական խաղերում:

Դուք հանդես եք եկել Ռուսաստանի հավաքականի կազմում: Ինչո՞ւ որոշեցիք փոխել մարզական քաղաքացիությունը եւ ներկայացնել Հայաստանը:

Կարինա Ակոպովա- Շատերը մտածում են եւ գիտեն, թե մենք ռուսներ ենք, որոնք ուղղակի փոխել են իրենց մարզական քաղաքացիությունը եւ ստացել հայկական անձնագրեր: Ո՛չ, այդպես չի. ցանկանում եմ, որ բոլորն իմանան՝ ես հայուհի եմ եւ պատահական չի Հայաստանի դրոշի ներքո հանդես գալու մեր ցանկությունն ու ընտրությունը: Իմ ընտանիքը, ծնողներս հայ են: Ես քիչ թե շատ խոսում եմ հայերեն եւ հասկանում եմ:

Այո, ճիշտ է, մենք ներկայացրել ենք Ռուսաստանը: Ես վնասվածք ստացա, որի պատճառով հավաքականում մեր դիրքերը բավականին զիջեցինք: Այդ իրավիճակն  ասես նշան լիներ, որ ժամանակն է մեր կյանքում ինչ-որ բան փոխել: Որոշեցինք փոխել դրոշը: Պաշտոնապես ստացանք Հայաստանի քաղաքացիություն եւ հասկացանք, որ պետք է պայքարենք օլիմպիական ուղեգրի համար: Օլիմպիական խաղերին մասնակցելը մեր զույգի երազանքն էր, իմ երազանքն էր, որն իրականացավ Հայաստանի դրոշի ներքո, ինչի համար կրկնակի երջանիկ եմ:

Անկեղծ կլինեմ՝ մինչեւ Հայաստան տեղափոխվելը, փորձել եմ հանդես գալ Ավստրալիայի հավաքականի կազմում: Հետո հասկացա, որ որեւէ իմաստ չունի ներկայացնել մի երկիր, որի հետ դու որեւէ առնչություն եւ արմատական կապ չունես: Ես հայուհի եմ, Հայաստանը շատ մեծ նշանակություն ունի ինձ համար եւ ուրախ եմ, որ այժմ ներկայացնում եմ իմ երկիրը: Ինձ համար մեծ պատիվ է եւ երջանկություն:

Նիկիտա Ռախմանին - Սա մեր զույգի առաջին Օլիմպիական խաղերն են: Ինձ համար նույնպես մեծ պատիվ է ներկայացնել Հայաստանը: Ուրախ եմ, որ կարողացանք հասնել մեր երազանքին եւ այն կիրականացնենք՝ ներկայացնելով Հայաստանը: Մենք այժմ լիիրավ հայեր ենք (ծիծաղում է Նիկիտան եւ ցուցադրում մարզահագուստի վրա փակցված Հայաստանի դրոշը):

Կարինա Ակոպովա- Հպարտություն եմ զգում, որ ներկայացնելու եմ իմ հայրենիքը: Մեծ պատասխանատվություն է: Այս առումով որոշակի լարվածություն կա, բայց փորձում ենք հնարավորինս քիչ մտածել այդ մասին: Օլիմպիական խաղերն իրականում շատ լարված մրցաշար է, քանի որ այն քեզնից խլում է ամբողջ էներգիան եւ զրկում սառույցի վրա կանգնելու ուժերից: Փորձում ենք կենտրոնանալ միայն մրցելույթների վրա, եւ ամեն ինչ լավ կլինի:

Ինչպե՞ս ընդունեց Ձեզ Հայաստանը, ինչո՞վ առանձնացավ մեր երկիրը Ձեզ համար:

Նիկիտա Ռախմանին- Ինձ այստեղ շատ է դուրս գալիս: Մեզ շատ ջերմ ընդունեցին այստեղ: Սիրել եմ հայկական խոհանոցը, ինձ հետաքրքրել է նաեւ երկրի արդյունաբերությունը: Ամեն ինչ շատ լավ է այստեղ:

Կարինա Ակոպովա- Գեղասահքով զբաղվելու համար այստեղ լավ պայմաններ են ստեղծված: Սառույցն է ինձ դուր գալիս: Տեսնում եմ, որ ֆեդերացիան, նախարարությունը ներդնում են բոլոր ուժերը մարզաձեւը զարգացնելու համար: Միակ խնդիրը մեզ համար այն է, որ Հայաստանում չկան սպորտային զույգի մարզիչներ: Այդ պատճառով մեր հիմնական մարզումները կենտրոնացած են Սոչիում մեր մարզիչների ղեկավարությամբ, որոնց հետ աշխատում ենք արդեն 8 տարի: Փորձում ենք համատեղել երեւանյան մարզումները Սոչիի մարզումների հետ: Նաեւ ձգտում ենք շատ ժամանակ անցկացնել Երեւանի սառույցի վրա, մարզվող երեխաների կողքին եւ մեր ներկայությամբ նպաստել մարզաձեւի զարգացմանը:

Կարինա, ինչպե՞ս է սկսվել Ձեր մարզական ուղին գեղասահքում: Ո՞ւմ խորհրդով եք ընտրել այս մարզաձեւը:

Գեղասահքով սկսել եմ զբաղվել 5 տարեկանից: Տատիկս է ինձ տարել գեղասահքի: Այսօր նա հպարտությամբ ամենուր ասում է, որ իր թոռնուհին մասնակցում է Օլիմպիական խաղերին եւ այն էլ ներկայացնում է Հայաստանը: Ես երջանիկ եմ, որ նաեւ նրա ցանկությունն եմ իրականացրել:

Ինձ այս ամենը շատ է մոտիվացնում եւ գտնում եմ, որ Օլիմպիական խաղեր գնալը, Հայաստանը ներկայացնելը լավագույն գնահատականն է այն ամենին, ինչ արել են մեր ծնողները, տատիկս, որպեսզի հասնեմ այս կետին: 

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում