Կարինա Ակոպովա․ Օլիմպիական խաղերում Հայաստանը ներկայացնելը մեծ պատիվ է, երազանք, որն իրականացավ

Երեւանի «Գազպրոմ Արմենիա» ուսումնա-սպորտային համալիրի սահադաշտում այսօր հաճելի իրարանցում էր: 25-րդ ձմեռային Օլիմպիական խաղերի գեղասահքի մրցաշարում Հայաստանը ներկայացնող Կարինա Ակոպովա եւ Նիկիտա Ռախմանին զույգը երեւանյան սառույցի վրա վերջին մարզումն էր անցկացնում Իտալիա մեկնելուց առաջ:

Մինչեւ մարզման մեկնարկը,  սպորտային զույգը սահադաշտի նախասրահում ուրախ տրամադրությամբ եւ զրույցներով նախավարժանք էր անում: Զույգը մարզման էր եկել նոր ձմեռային համազգեստով, որը ստացել էր Հայաստանի Օլիմպիական կոմիտեից հատուկ Օլիմպիական խաղերի համար:

Տարիներ անց հայրենիք վերադարձած, մարզական քաղաքացիությունը փոխած հայուհին  Հայաստանում բոլորին ջերմ ժպիտով է ընդունում,  պատրաստ է ցանկացած իրավիճակում զրույցի բռնվել եւ փորձել հնարավորինս շատ հայերեն խոսել: Դժգոհում է միայն, որ իր հետ պարբերաբար ռուսերեն են հաղորդակցվում, իսկ ինքն ուզում է խոսել հայերեն: 

«Ես Կարինան եմ: Շատ հաճելի է, երբ շուրջս բոլորը հայերեն են խոսում»,- NEWS.am Sport-ի  թղթակցի հետ զրույցում կցկտուր հայերենով արտաբերում է գեղասահորդուհին եւ շարունակում արդեն ռուսերենով:

«Ինձ շատ լավ եմ զգում այստեղ: Տրամադրությունս շատ բարձր է: Այսօր ստացանք մեր մարզահագուստը Օլիմպիական խաղերի համար: Ճիշտ է՝ ամեն ինչ մի քանի չափ մեծ է ինձ վրա, բայց կարեւորը տաք է, քանի որ ես շատ մրսկան եմ: Սառույց դուրս գալիս էլ պարտադիր մի քանի տակ հագուստ եմ կրում. ոչ մի կերպ չեմ համակերպվում ցրտին: Սահելիս, երբ մկաններս տաքանում են, հանում եմ ավելորդ վերնահագուստը»,- ծիծաղում է Կարինան եւ ցույց տալիս, թե որքան մեծ է իր վերարկուն, ապա անմիջապես եւ հպարտորեն մատնացույց անում վերարկուի վրայի գրվածքը եւ Հայաստանի եռագույնը:

«Շատ ուրախ եմ եւ հպարտ, որ Օլիմպիական խաղերում ներկայացնելու եմ Հայաստանը: Ինձ համար սա մեծ պատիվ է, երազանք, որն իրականացավ: Բոլորը կարծում են, որ ես ռուս եմ, ուղղակի փոխել եմ մարզական քաղաքացիությունս եւ ստացել հայկական անձնագիր: Ուզում եմ՝ բոլորն իմանան. ես հայուհի եմ, ծնողներս հայ են: Մեր ընտանիքում լիարժեք խոսում են հայերեն, միայն ես լավ չեմ տիրապետում, բայց այժմ հայ մասնագետի հետ գրել եւ կարդալ եմ սովորում: Գրել փոքր-ինչ կարողանում եմ, խոսել ամաչում եմ, քանի որ լավ չի ստացվում: Հասկանում եմ, բայց դժվար եմ շարադրում միտքս»,- ասաց Կարինան:

Հայաստանի զույգը օլիմպիական քաղաք է մեկնում այսօր երեկոյան 21:30-ին Երեւան -Միլան չվերթով:

 «Մեկնում ենք Միլան: Այնտեղ է անցկացվելու գեղասահքի մրցաշարը: Ոգեւորված ենք: Լարվածություն կա, բայց փորձում ենք շատ չմտածել: Կենտրոնացած ենք մեր մրցելույթների վրա: Կարճ ծրագրում ներկայացնելու ենք «Արցախ» ստեղծագործության համանուն համարը: Ինձ համար անչափ կարեւոր է այս ծրագիրը, քանի որ իմ եւս մեկ երազանքն էր, որ Օլիմպիական խաղերում Հայաստանը ներկայացնելուց բացի նաեւ հանդես գամ «Արցախ» ստեղծագործության ներքո»,- պատմեց Կարինան:

Սառույցի վրա նախավարժանքն անցավ բարձր տրամադրությամբ, ապա Կարինան խնդրեց միացնել «Արցախ» ստեղծագործությունը: Սպորտային զույգը եւս մեկ վերջին անգամ պարեց կարճ ծրագիրը, բայց ամբողջական տարբերակը չներկայացրեց՝ հետաքրքրություն թողնելով Օլիմպիական խաղերի համար:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում