Հակոբ Սերոբյանը՝ Կոտբուսից․ Համլետ Մանուկյանին եւ Մամիկոն Խաչատրյանին խանգարեց լարվածությունը

Հավաքականի նորեկներ Համլետ Մանուկյանին եւ Մամիկոն Խաչատրյանին խանգարեց լարվածությունը: Մեդալ նվաճել չհաջողվեց, բայց կարող էին, նրանք ունեն բոլոր հնարավորությունները: Մինչեւ աշխարհի գավաթին գալը, մեր տղաների մասին արդեն խոսում էին: Նրանց շատ ջերմ ընդունեցին մեծահասակների պայքարում:

Այս մասին NEWS.am Sport-ի թղթակցի հետ զրույցում Կոտբուսից ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:

Երիտասարդ մարմնամարզիկներ Համլետ Մանուկյանն ու Մամիկոն Խաչատրյանը Գերմանիայի Կոտբուս քաղաքում անցկացվող սպորտային մարմնամարզության աշխարհի գավաթի խաղարկությունում նորամուտը նշեցին հավաքականի կազմում: Մեծահասակներում առաջին պաշտոնական մրցաշարում  նժույգ թափեր վարժության եզրափակիչում Մամիկոն Խաչատրյանը գրավեց 4-րդ տեղը (13.800),  Համլետ Մանուկյանը՝ 8-րդ (12.166):

«Տարվա առաջին մրցաշարին ենք մասնակցում եւ արդեն ունենք ոսկե մեդալ, ինչն ուրախացնող է:

Համլետ Մանուկյանին եւ Մամիկոն Խաչատրյանին խանգարեց հոգեբանական լարվածությունը: Որակավորման փուլում այնքան լավ հանդես եկան, որ, ուղղակի, իրենք էլ զարմացան ու եզրափակիչում շփոթվեցին: Սխալներ թույլ տվեցին եւ մեդալային պայքարից դուրս  մնացին: Եթե ամեն ինչ անեին այնպես, ինչպես որակավորման փուլում, երկուսն էլ մեդալակիր կդառնային, առաջին եւ երկրորդ տեղերում կլինեին նորից: Վստահ եմ, որ կարող էին:

Եզրափակիչում Մամիկոն Խաչատրյանն ընկավ գործիքի վրայից, բայց չորրորդ տեղը գրավեց: Մամիկոնի ընկնելը Համլետի մոտ լարվածություն առաջացրեց: Նա եզրափակիչում վերջինը մոտեցավ, որն ամենաբարդն է մեր մարզաձեւում: Նյարդային լարվածությանը նույնիսկ մեծերը չեն դիմանում:

Սխալներ թույլ չտալու դեպքում բոլորից մի գլուխ բարձր կլինեին: Այս մասին բոլորն էին ասում, ոչ միայն ես: Այս տղաներն ապագա ունեն, ավել ոչինչ չեմ ասում: Նրանք դեռ ցույց կտան, թե ինչ ներուժ ունեն: Մեծերի մեջ եզրափակիչ դուրս գալն առաջին փորձից մեծ արդյունք է: Սպասում էի, որ եզրափակիչում կլինեն, իրենք էլ էին սպասում, բայց որ մյուս ուժեղ մրցակիցներից մեծ տարբերությամբ առաջին-երկրորդ տեղերով դուրս կգան եզրափակիչ, չէին սպասում:

Նախավերջինը եւ վերջինը մոտեցան, որն առաջացրեց շփոթմունք եւ լարվածություն: Ապագան նրանցն է. պետք է փորձ մեծահասակներում, հոգեբանական կայունություն,  ինչպես, օրինակ, Արթուր Դավթյանինն է: Պատրաստ են եւ ուժեղ:

Աշխարհի գավաթի խաղարկության առաջին փուլում ամենաբարդ մրցակցությունը նժույգ թափեր վարժությունում էր եւ հենց որակավորման փուլում: Մեր տղաները մրցում էին աշխարհի եւ Եվրոպայի մեդալակիրների հետ:

Մարմնամարզության հանրությունը շատ ջերմ ընդունեց տղաներին մեծահասակների պայքարում: Նրանց մասին խոսում էին մինչեւ մեր Կոտբուս գալը: Արդեն հարցազրույցներ են տալիս, ինքնագրեր բաժանում, նրանց հետ լուսանկարվում են: Բոլորը շատ լուրջ են ընդունում Համլետին եւ Մամիկոնին: Բոլորի համար շատ բարձր մակարդակի մարմնամարզիկներ են: Ամեն ինչ դեռ առջեւում է:

Ինչ վերաբերում է օղակների վարժության երզափակիչին, Վահագն Դավթյանը շտկեց որակավորման փուլում թույլ տված սխալը եւ ոսկե մեդալակիր դարձավ: Վահագն Դավթյանը հետ թողեց Ադրբեջանի եւ Թուրքիայի ներկայացուցիչներին: Արթուր Ավետիսյանը վարժության վերջնամասում այնպիսի սխալ թույլ տվեց, որն, ուղղակի, զարմանալի է:

Արթուր Դավթյանի մասնակցությամբ սպասվող եզրափակիչում երկու ուժեղ մրցակից ունենք:

Աշխարհի գավաթի խաղարկության փուլերը 6-ն են, որից կմասնակցեն 5-ին: Հաջորդը Բաքվում է, բաց կթողնենք: Երրորդը փուլը տեղի է ունենալու Անկարայում, որին կմասնակցենք: Թուրքիա կմեկնեն Արթուր Դավթյանն ու Վահագն Դավթյանը»,- ասաց Հակոբ Սերոբյանը:

Աշխարհի գավաթի խաղարկության առաջին փուլում Հակոբ Սերոբյանի գլխավորած հավաքականից ոսկե մեդալ է նվաճել Եվրոպայի կրկնակի փոխչեմպիոն Վահագն Դավթյանը: Փարիզի Օլիմպիական խաղերի մասնակիցը հավասարը չունեցավ օղակների վարժության եզրափակիչում եւ 14.133 միավորով դարձավ հաղթող:

Փետրվարի 23-ին հենացատկի վարժության եզրափակիչում մեդալի համար կպայքարի Օլիմպիական խաղերի արծաթե եւ բրոնզե մեդալակիր, աշխարհի չեմպիոն, Եվրոպայի կրկնակի չեմպիոն, աշխարհի կրկնակի գավաթակիր Արթուր Դավթյանը: Հայաստանի թիմի ավագը որակավորման փուլի արգելքը հաղթահարել է 14.850 միավորով:

Նշենք, որ աշխարհի գավաթի խաղարկության փուլերի արդյունքներով մարմնամարզիկները 2025 թ. աշխարհի առաջնության մասնակցության իրավունք ձեռք կբերեն:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում