Էլինա Ավանեսյան․ Ամեն ինչ կանեմ Լոս Անջելեսի Օլիմպիական խաղերում Հայաստանը պատշաճ ներկայացնելու համար

Ես ամուր կապ եմ զգում Հայաստանի հետ եւ ցանկանում եմ իմ ներդրումն ունենալ հայկական թենիսի զարգացման մեջ: Ամեն ինչ կանեմ 2028 թ. Լոս Անջելեսի Օլիմպիական խաղերում Հայաստանը պատշաճ ներկայացնելու համար: Ճիշտ աշխատանքի արդյունքում իմ շանսերը շատ մեծ կլինեն Լոս Անջելեսում:

Այս մասին NEWS.am Sport-ի թղթակցի հետ զրույցում ասաց Հայաստանի ներկայացուցիչ, Կանանց թենիսի ասոցիացիայի (WTA) վարկանիշային աղյուսակում 47-րդ ռակետ Էլինա Ավանեսյանը։

Նախորդ շաբաթ Էլինա Ավանեսյանը Երեւանում էր: Արմատներով արցախցի թենիսիտուհին Հայաստանում գտնվելու 5 օրերի ընթացքում հանդիպեց արցախցի երեխաների հետ, վարպետության դաս անցկացրեց, մարզվեց, հանդիպումներ ունեցավ, մասնակցեց համաժողովի եւ ծննդյան տարեդարձն առաջին անգամ նշեց Երեւանում: 

NEWS.am Sport-ի թղթակիցը ներկա է եղել Ավանեսյանի մարզումային օրերից մեկին եւ զրուցել մարզական քաղաքացիությունը փոխելու որոշման, Հայաստանի հետ կապի, Հայաստանի դրոշի ներքո խաղալու պատասխանատվության եւ մեծ նպատակների մասին:          

Հիշեցնենք, որ այս տարվա օգոստոսից Էլինա Ավանեսյանը ներկայացնում է Հայաստանը: Նրան մարզական քաղաքացիությունը փոխելու եւ Հայաստանի քաղաքացիություն ստանալու հարցում աջակցել են Հայաստանի թենիսի ֆեդերացիան, ԿԳՄՍ նախարարությունը եւ «Կերոն» բարեգործական հիմնադրամը, որի դեսպանն է: 

Էլինա, նախ շնորհակալ եմ հարցազրույցի առաջարկն ընդունելու համար: Ի՞նչ տպավորություններ ունես հայ երկրպագուների հետ հանդիպումից, ինչպե՞ս անցավ ծննդյանդ տարեդարձի օրը Հայաստանում:

Առաջին հանդիպումս հայ երկրպագուների հետ անմոռանալի էր, հույզերով լի: Թենիսային հանրությունն ինձ ընդունեց մեծ ջերմությամբ եւ անկեղծությամբ: Ինձ այս ամենը ոգեւորեց եւ առաջ շարժվելու նոր ուժեր տվեց: Յուրահատուկ զգացողություններ ունեցա առաջին անգամ ծննդյանս օրը Հայաստանում անցկացնելով: Այդ օրն ուղղակի տոն չէր ինձ համար, այլ հնարավորություն էր վերաիմաստավորել կապն իմ արմատների հետ, զգալ ջերմություն ու աջակցություն այն մարդկանցից, որոնք հանդիպեցին ինձ այստեղ:

Սկսենք ամենասկզբից. Ե՞րբ եւ ո՞ւմ խորհրդով ես սկսել զբաղվել թենիսով:

Թենիսով սկսել եմ զբաղվել շատ վաղ տարիքից: Իմ ավագ եղբայրն էր հաճախում թենիսի: Մի օր ես էլ ցանկացա խաղալ: Իմ կարիերայում շատ կարեւոր դերակատարում են ունեցել ծնողներս եւ քեռիս: Ես նրանց շատ շնորհակալ եմ:

Ի՞նչն է նպաստել թենիսիստ դառնալու որոշմանդ մեջ:

Միշտ ներքին ցանկություն է եղել ինքս ինձ եւ մյուսներին ապացուցել, որ կարող եմ ավելին: Թենիսը այն մարզաձեւն է, որը պարբերաբար մարտահրավերներ է նետում եւ դա ինձ ոգեւորում է:

Ո՞վ է քո կուռքը մեծ թենիսում:

Ինձ միշտ գրավել է Սերենա Ուիլյամսի խաղը. նրա ճկունությունը, ուժեղ բնավորությունը, հաղթելու անսահման ցանկությունը: Նա վառ օրինակ է այն բանի, որ անտրտունջ աշխատանքը, նվիրվածությունը թենիսին կարող են հասցնել բարձունքների:

Ո՞վ է քո ամենամեծ քննադատը:

Ես ինքս: Միշտ փորձում եմ անկեղծ եւ օբյեկտիվ իմ արդյունքների, մրցելույթների նկատմամբ, վերլուծում եմ սխալներս եւ մտածում՝ ինչպես դառնալ ավելի լավը:

Ինչպե՞ս ես հաղթահարում պարտությունները:

Պարտությունները սպորտի մի մասն են: Իհարկե, ցանկալի է միշտ հաղթել, հաղթող լինել, բայց հենց պարտություններն են մեզ սովորեցնում լինել ուժեղ: Ես դրանք ընդունում եմ որպես դասեր, որոնք օգնում են ինձ աճել եւ կատարելագործվել:

Ի՞նչը կարող հիասթափության պատճառ դառնալ թենիսում:

Հիասթափությունները կարող են լինել, երբ տեսնում ես անարդարություն, անարդար վերաբերմունք: Փորձում եմ կենտրոնանալ դրական պահերի վրա եւ ինձ կենտրոնացնել այն մտքի վրա, թե ինչու եմ ես ընտրել այս մարզաձեւը, այն է՝ թենիսի նկատմամբ սերն ու պայքարի հանդեպ կիրքը:

Ո՞րն է քեզ համար ամենամեծ նվաճումը մարզական կարիերայում:

Յուրաքանչյուր մասնակցությունն ու տարած հաղթանակն խոշոր միջազգային մրցաշարում իմ կարիերայում մեծագույն նվաճում եմ համարում: Այս ամենից զատ, այս պահին մեծ նվաճում եմ համարում Հայաստանի դրոշի ներքո հանդես գալը: Սա առանձնահատուկ ձեռքբերում է, որը մեծ հպարտություն է եւ նույնքան մեծ պատասխանատվություն ինձ համար:

Պատմիր քո հայկական արմատների մասին: Որտե՞ղ ես ծնվել:

Ես ծնվել եւ մեծացել եմ Ռուսաստանում, բայց իմ արմատներն Արցախից են: Ծնողներս, մեր ընտանիքը միշտ պահպանել են հայկական ավանդույթները, կապը հայկական մշակույթի հետ: Տանը խոսել ենք հայերեն: Ես միշտ հպարտացել եմ իմ հայկական արմատներով: Ինձ համար շատ կարեւոր է լինել անկեղծ ինքս ինձ հետ եւ ինձ շրջապատող մարդկանց հետ: Գտնում եմ, որ իմ ազգությունը իմ էության եւ բնույթի մի մասն է:

Բացի այն, որ դու ստացել ես հիանալի առաջարկ «Կերոն» հիմնադրամի կողմից, ի՞նչը դարձավ մարզական քաղաքացիությունը փոխելու եւ Հայաստանի դրոշի ներքո հանդես գալու որոշման հիմնական պատճառ:

Ես ամուր կապ եմ զգում Հայաստանի հետ եւ ցանկանում եմ իմ ներդրումն ունենալ հայկական թենիսի զարգացման մեջ: «Կերոն» բարեգործական հիմնադրամի առաջարկը միայն աջակցություն չէր ինձ, այլ հնարավորություն է իրականություն դարձնել իմ բոլոր ձգտումները եւ իմ լուման ունենալ հայկական սպորտի զարգացման մեջ:

Քո առաջին մրցելույթը Հայաստանի դրոշի ներքո եղել է Ցինցինատիի WTA-1000 մրցաշարը: Մե՞ծ էր լարվածությունը:

Մեծ պատիվ է ինձ համար ներկայացնել Հայաստանը այդպիսի բարձրակարգ մրցաշարում: Լարվածությունը մեծ էր, պատասխանատու պահ էր: Ես այնտեղ զգում էի երկրպագուների աջակցությունը եւ փորձել եմ ցուցադրել իմ լավագույն խաղը: Ինձ համար շատ կարեւոր էր առաջին մրցաշարը, որպեսզի արդարացնեի բոլորի վստահությունը:

Ցինցինատիում պարտվեցիր հիմնական փուլի երրորդ շրջանում: Ի՞նչը պակասեց Լյուդմիլա Սամսոնովայի հետ մրցախաղում:

Լյուդմիլան ուժեղ մրցակից է: Նրա հետ ստացվեց լարված խաղ: Մի քանի դրվագներում ինձ պակասեց կենտրոնացվածությունը: Իմ խաղում կան որոշ շեշտադրումներ, որոնց վրա պետք է աշխատել: Դա ընդունում եմ որպես մոտիվացիա հետագայում խաղամակարդակս բարելավելու համար:

Հաջորդ երկու մրցաշարերում՝ WTA-500 –ում եւ US Open-ում ի՞նչը խանգարեց:

Սպորտը՝ վերելքներ է եւ վայրէջքներ: Ես հիվանդացել էի եւ չկարողացա այս երկու մրցաշարերին մասնակցել այնպես, ինչպես ցանկանում էի: Այսպիսի պահերը օգնում են հասկանալ, թե ինչ ասպեկտների վրա պետք է աշխատել հետագայում ավելի ուժեղ լինելու համար:

Կանանց թենիսի ասոցիացիայի (WTA) վարկանիշային աղյուսակը գլխավորում է Իգա Շվյոնտեկը: Լավագույն տասնյակում ընդգրկված թենիսիտուհիներից ո՞ւմ հետ ես հանդիպել կորտում, ի՞նչ կասես նրանց մասին: Ի՞նչ որակներ պետք է ունենալ լավագույն տասնյակում ընդգրկվելու համար:

Ես խաղացել եմ այնպիսի թենիսիտների հետ, ինպիսիք են Մարիա Սակարին, Չժեն Ցինվենը, Օնս Ժաբերը: Թոփ-10-ից ցանկացածի հետ խաղալը մարտահրավեր է եւ հիանալի հնարավորություն սովորելու: Նրանցից յուրաքանչյուրն ունի իր ուժեղ կողմերը՝ տեխնիկա, տակտիկա, մենթալ կայունություն:  Թոփ-10-ում հայտնվելու համար անհրաժեշտ է քրտնաջան աշխատանք, կայունություն եւ տարբեր պայմաններին, մրցակիցներին հարմարվելու ունակություն:

Հայաստանում թենիսը դանդաղ է զարգանում: Ըստ քեզ, ի՞նչն է գլխավոր պատճառը, խնդիրը:

Պատճառներից մեկն այն է, որ քիչ են ենթակառուցվածքների: Երիտասարդ թենիսիտներին ոչ պրոֆեսիոնալ աջակցություն կա: Ես հավատում եմ, որ «Կերոն» հիմնադրամի աջակցությամբ մենք կարող ենք իրավիճակը փոխել եւ ավելի մեծ ուշադրություն գրավել այս մարզաձեւի նկատմամբ:

Ես գիտեմ, որ քո մարզական քաղաքացիությունը փոխելը ծրագրվում էր ավելի վաղ, որպեսզի ներկայացնեիր Հայաստանը Փարիզ-2024-ում, բայց տեխնիկական պատճառներով չստացվեց: Կտեսնե՞նք քեզ 2028 թ. Լոս Անջելեսի Օլիմպիական խաղերում:

Օլիմպիական խաղերին մասնակցելն իմ մեծագույն նպատակներից մեկն է: Ես ամեն ինչ կանեմ, որպեսզի պատրաստվեմ եւ ներկայացնեմ Հայաստանը 2028 թ. Օլիմպիական խաղերում ամենաբարձր մակարդակով: Հավատում եմ, որ ճիշտ նախապատրաստական աշխատանքի եւ աջակցության շնորհիվ իմ շանսերն Օլիմպիական խաղերում բավականին իրատեսական են:

Ո՞րն է ամենամեծ երազանքդ մեծ սպորտում:

Ամենամեծ երազանքս թենիսի վարկանիշային աղյուսակում առաջինը լինելն է: Դրանից բացի նաեւ երազում եմ երիտասարդ թենիսիստների ոգեշնչման աղբյուրը լինել:  Ուզում եմ, որ իմ մրցելույթները ոգեշնչեն ուրիշներին, օգնեն հավատալ սեփական ուժերին եւ ձգտել բարձրագույնին՝ ինչ խոչընդոտներ էլ լինեն:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում