Չեմպիոնների լիգա. «Շախտյորը»` փլեյ-օֆֆում, «Յուվենտուսը» հաղթեց «Չելսիին»

Չեմպիոնների լիգայի խմբային փուլի հինգերորդ տուրում Դոնեցկի «Շախտյորը» հյուրընկալվեց «Նորդշելանդին»: 24-րդ րոպեին հաշիվը բացեց Մորտեն Նորստրանը: 2 րոպե անց Լուիս Ադրիանոն հավասարեցրեց հաշիվը: Բրազիլացի հարձակվողը խախտեց Fair Play-ի կանոնները: Վիլիանը գնդակը վերադարձնում էր դանիացիներին, սակայն Ադրիանոն տիրացավ գնդակին եւ այն ուղարկեց մրցակցի դարպասը: Եւս երեք րոպե անց դանիացիները կրկին առաջ անցան հաշվի մեջ: Սակայն 44-րդ րոպեին Մխիթարյանի հարվածից հետո դարպասապահը գնդակը հետ մղեց Վիլիանի ոտքերի մոտ, եւ բրազիլացին նորից հավասարեցրեց հաշիվը: Երկրորդ խաղակեսում Վիլիանը եւս մեկ անգամ, իսկ Լուիս Ադրիանոն երկու անգամ գրավեցին մրցակցի դարպասը` հաշիվը դարձնելով 5:2:

Հայաստանի ազգային հավաքականի ֆուտոլիստ Հենրիխ Մխիթարյանը խաղադաշտ դուրս եկավ մեկնարկային կազմում եւ մասնակցեց ամբողջ հանդիպմանը: Մխիթարյանը մի քանի լավ հնարավորություն ուներ գրավելու մրցակցի դարպասը:

Թուրինի «Յուվենտուսը» սեփական խաղադաշտում 3:0 հաշվով հաղթեց «Չելսիին»: Գոլերի հեղինակ դարձան Ֆաբիո Կվալյարելյան, Սեբաստիան Ջովինկոն եւ Արտուրո Վիդալը:

Այս տուրից հետո E խմբի մրցաշարային աղյուսակը 10 միավորով գլխավորում է «Շախտյորը», որը դուրս եկավ փլեյ-օֆֆ:  «Յուվենտուսը» ունի 9 միավոր, իսկ «Չելսին»` 7:

Չեմպիոնների լիգա. խմբային փուլ

E խումբ

«Նորդշելանդ» – «Շախտյոր»` 2:5

Մարտին Նորտստրան, 24, Կասպեր Լորենցեն, 29 – Լուիս Ադրիանո, 26, 53, 81, Վիլիան, 44, 50

 «Յուվենտուս» - «Չելսի»` 3:0

Ֆաբիո Կվալյարելիա, 38, Արտուրո Վիդալ, 61,Սեբաստիան Ջովինկո, 90

Հետևեք NEWS.am SPORT-ին Facebook-ում, Twitter և Telegram-ում