12:10  ,  28 հունիսի, 2021

Էդուարդ Սահակյան. Բոլոր օլիմպիականները պատրաստ են մեդալային պայքարին

Բոլոր՝ չորս օլիմպիականներն էլ պատրաստ են մեդալային պայքարին: Հավատում եմ նրանց 100 տոկոսով:

Այս մասին NEWS.am Sport-ի թղթակցի հետ զրույցում ասաց հունահռոմեական ըմբշամարտի Հայաստանի հավաքականի գլխավոր մարզիչ Էդուարդ Սահակյանը:

Տոկիոյի Օլիմպիական խաղերի ուղեգիր նվաճած հունահռոմեական ոճի ըմբիշներ Արթուր Ալեքսանյանը (97 կգ), Կարապետ Չալյանը (77 կգ), Կարեն Ասլանյանն (67 կգ) ու Արմեն Մելիքյանը (60 կգ) շարունակում են Խաղերի նախապատրաստական փուլը: Էդուարդ Սահակյանի գլխավորությամբ օլիմպիականները Հայաստանի հավաքականի հետ միասին հերթական ուսումնամարզական հավաքն են անցնում Երեւանի «Օլիմպավանում»՝ Օլիմպիական խաղերին ընդառաջ: Օրեր անց ըմբիշները հիմնական ծանրաբեռնված հավաքը կանցկացնեն Ուկրաինայի մայրաքաղաք Կիեւում: Դա կլինի օլիմպիականների նախավերջին հավաքը Տոկիո մեկնելուց առաջ:

NEWS.am Sport-ի թղթակիցը հետեւել է երեւանյան հավաքի մարզումային օրերից մեկին:

Տոկիո-2020-ում Հայաստանը ներկայացնող ըմբիշներն անցկացնում են օրական երկու մարզում: Օլիմպիական թիմին օգնում են Հայաստանի հավաքականի բոլոր անդամները: Oլիմպիական չեմպիոն Արթուր Ալեքսանյանի հետ սպարինգ գոտեմարտեր անցկացնելու նպատակով Հայաստան է հրավիրվել Ուկրաինայի հավաքականի անդամ, 97 կգ քաշային Անդրեյ Դիկտարյովը: Նա Արթուր Ալեքսանյանին կօգնի մինչեւ Օլիմպիական խաղեր:

Հայաստանի օլիմպիական թիմի հետ Երեւանի հավաքին մասնակցում է նաեւ Բրազիլիան ներկայացնող Էդգար Սողոմոնյանը: Էդուարդ Սահակյանի նախկին սանը հանդես է գալիս 130 կգ քաշային կարգում եւ Բրազիլիայի հավաքականի կազմում նվաճել է Տոկիո-2020-ի ուղեգիր:

Պարոն Սահակյան, ինչպե՞ս է ընթանում Օլիմպիական խաղերի նախապատրաստական փուլը:

Ըստ ծրագրվածի, անցնում ենք հերթական հավաքը: Բուռն մարզումային փուլում ենք: Երեւանի հավաքից առաջ 14-օրյա հավաք ունեցանք Ղրիմում: Այդ հավաքն ուներ վերականգնողական նպատակ: Աշխատեցինք ընդհանուր ֆունկցիոնալ պատրաստվածության վրա: Հաջորդ փուլը Երեւանի հավաքն էր, որտեղ եւս արագաուժային, ֆիզիկական պատրաստվածության վրա ենք աշխատել, ակտիվացրել գորգային մարզումները: Դեռ ծանրաբեռված գորգային մարզումների փուլին չենք հասել: Հուլիսի 2-ից Կիեւում կանցկացնենք հավաք, որը կտեւի մինչեւ հուլիսի 14-ը: Այստեղ արդեն հիմնական շեշտադրությունը դրված կլինի գորգային աշխատանքի, տեխնիկայի եւ տակտիկայի վրա: Վերջին հավաքը, հավանաբար, տեղի կունենա Երեւանում կամ գուցե Գյումրիում: Վայրը դեռ վերջնական որոշված չէ, բայց Տոկիո մեկնելուց առաջ եւս մեկ հավաք կունենանք, վերջին շտկումները կանենք եւ պատշաճ կերպով կմոտենանք Օլիմպիական խաղերին:

Օլիմպիական խաղերին մեկ ամսից քիչ է մնացել: Տղաների ընդհանուր տրամադրվածությունը, ֆիզիկական վիճակն ինչպե՞ս կգնահատեք:

Հոգեբանական առումով տղաների տրամադրվածությունը բավական բարձր է: Թիմի ոգին բարձր է: Պատահական չէր, որ օրինակ մինչեւ 23 տարեկանների Եվրոպայի առաջնությունում եղան կամային հաղթանակներ: Սա խոսում է ընդհանուր թիմի տրամադրվածության, բարձր ոգու մասին: Մեծ ուշադրություն ենք դարձնում տղաների հոգեբանական պատրաստվածության վրա: Բոլորս էլ հասկանում ենք, որ Օլիմպիական խաղերում հեշտ չի լինելու եւ աշխատում ենք նաեւ այդ ուղղությամբ, որ նրանց կամային ոգին եւս բարձր լինի: Ամեն մի հաղթանակ լինելու է ոչ միայն զուտ հաղթանակ, այլ նաեւ կամային, որը շատ կարեւոր է մեդալների ճանապարհին:

Եթե առանձին վերլուծենք, ներկայումս ո՞վ, ի՞նչ մարզավիճակ ունի եւ հոգեբանորեն որքանո՞վ է պատրաստ օլիմպիական մրցապայքարին:

Այս փուլում բոլորն էլ այն վիճակում են, որ դեռ մարզավիճակի գագաթնակետում չեն: Ըստ փուլերի ենք գալիս այդ գագաթնակետին: Այս պահին մեզ պետք չէ, որ նրանք ունենան լիարժեք մարզավիճակ: Այս պահին հատուկ մասնագիտական տարրերի վրա են աշխատում: Կիեւում արդեն ամբողջական կենտրոնանալու ենք գորգային աշխատանքի վրա: Այժմ այդ տարրերն ենք բերում լիարժեք վիճակի, որպեսզի Կիեւում դրանց վրա ժամանակ չծախսենք:

Ինչ վերաբերում է առանձին տղաների տրամադրվածությանն ու աշխատանքին, Արմեն Մելիքյանը շատ պարտաճանաչ աշխատում է, իր առաջադրանքները լրիվ կատարում է: Շատ մեծ ոգեւորությամբ է աշխատում: Ինձ թվում է՝ մեդալի համար անպայման համառ պայքար կտանի:

Կարեն Ասլանյանը վնասվածքից հետո լիարժեք վերականգնվել է եւ մտել մարզումային փուլի մեջ: Օրեցօր ավելացնում է եւ ավելի հզորանում: Ուզում եմ նշել, որ Կարեն Ասլանյանը շատ է փոխվել որպես մարզիկ: Նա բարձրակարգ մարզիկ է եւ ունի բոլոր հնարավորությունները մեդալային պայքարի համար: Նրան փոխել է օլիմպիական ուղեգիրը, տարիքային առումով արդեն կարողանում է գորգում կառավարել իր էմոցիաները, գոտեմարտերն ավելի գրագետ է կառուցում: Նրա մոտ աճն ակնհայտ է, եւ ամեն ինչ լավ գնում է առաջ: Ուկրաինայի մրցաշարից առաջ Կարենը կողն էր վնասել, ինչը թույլ չէր տալիս, որ լիարժեք մարզվել: Այժմ արդեն վերակագնվել է, եւ ոչինչ նրան չի խանգարում մարզմանը: Սոֆիայում վստահ արեց վարկանիշ եւ ցույց տվեց իր բարձր կարգը:

Կարապետ Չալյանը մի հետաքրքրիր մարզիկ է: Շատ աշխատասեր է, կիրթ եւ գիտի՝ ինչ պետք է անել, ինչպես անել: Լիարժեք իրեն նվիրել է գորգին եւ կոնկրետ նպատակով աշխատում է՝ առանց ջանք խնայելու: Իր առջեւ դրված բոլոր խնդիրներն ու առաջադրանքները կատարում է բարձր մակարդակով:

Արթուր Ալեքսանյանի մասին թերեւս ավելորդ է խոսել: Նա երբեք որեւէ մարզում բաց չի թողնում: Նա ունի ոսկե տրամադրվածություն: Մարզումներին գալիս է միշտ բարձր տրամադրությամբ, խոսակցական լեզվով ասած՝ հավեսով: Նա օրինակ է ծառայում բոլորին եւ իր հետ միասին թիմի ոգին բարձր պահում, տրամադրությունը՝ եւս:

Պարոն Սահակյան, Տոկիո-2020-ը Ձեր առաջին Օլիմպիական խաղերն է գլխավոր մարզիչի կարգավիճակում: Անհանգստություն, մտահոգություն ունե՞ք:

Անհանգստություն չունեմ: Թերեւս ավելի շատ պարտավորություն, պատասխանատվություն եմ զգում, որ լավ մասնակցենք, մեդալներ նվաճենք: Հաղթանակները մեզ պետք են, դրանք եւ պատասխանատվություն են եւ պարտավորություն, ամեն ինչ: Շատ բաներ կան, որ մեզ պարտավորեցնում են մեդալներով վերադառնալ յուրաքանչյուր մրցաշարից: Մեզ պարտավորեցնում է մեր աշխատանքը, քրտինքը, տղաների տանջանքն ու մեծ ցանկությունը Հայաստանին հաղթանակներ նվիրել:

Հավատո՞ւմ եք տղաներին:

Հավատում եմ բոլորին 100 տոկոսով:

Լուսինե Շահբազյան

Հետևեք NEWS.am SPORT-ին Facebook-ում, Twitter և Telegram-ում


  • Այս թեմայով

  • Հարցում
Քվեարկել են (13)
  • Ֆեյսբուք
  • NEWS.am Sport Exclusive
  • Արխիվ