Անգլիայի Պրեմյեր լիգայի 19-րդ տուրում չեմպիոն «Մանչեսթեր Սիթին» արտագնա խաղում ուժերը չափեց «Վուլվերհեմփթոնի» հետ: Պորտուգալացի Նունու Էշպիրիտու Սանտուի գլխավորած թիմը հաղթանակ տարավ 3:2 հաշվով:
Խաղի 12-րդ րոպեին «Մանչեսթեր Սիթիի» դարպասապահ Էդերսոնը տուգանային հրապարակից դուրս կատարած խախտումի համար հեռացվեց խաղադաշտից: Խոսեպ Գվարդիոլան պահեստային դարպասապահ Կլաուդիո Բրավոյին խաղադաշտ դուրս բերեց թիմի առաջատար հարձակվող Սերխիո Ագուերոյի փոխարեն:
25-րդ րոպեին «Մանչեսթեր Սիթիի» անգլիացի հարձակվող Ռահիմ Ստերլինգը 11 մետրանոց հարվածից բացեց խաղի հաշիվը, իսկ 50-րդ րոպեին՝ դուբլ ձևակերպեց:
55-րդ րոպեին «Վուլվերհեմփթոնի» իսպանացի հարձակվող Ադամա Տրաորեն կրճատեց հաշվի տարբերությունը, իսկ 82-րդ րոպեին՝ գոլային փոխանցում կատարեց մեքսիկացի Ռաուլ Խիմենեսին: 89-րդ րոպեին «Վուլվերհեմփթոնի» հաղթական գոլը Ռաուլ Խիմենեսի փոխանցումից հետո խփեց իռլանդացի պաշտպան Մեթ Դոերտին:
«Մանչեսթեր Սիթին» այժմ 38 միավորով մրցաշարային աղյուսակի երրորդ տեղում է և առաջատար «Լիվերպուլից» հետ է մնում 14 միավորով: «Լիվերպուլը» նաև 1 հանդիպում պակաս է անցկացրել:
Անգլիայի առաջնություն, 19-րդ տուր
«Վուլվերհեմփթոն» - «Մանչեսթեր Սիթի»՝ 3:2
Ադամա Տրաորե, 55, Ռաուլ Խիմենես, 82, Մեթ Դոերտի, 89 - Ռահիմ Ստերլինգ, 25 (11մ.), 50
Հետևեք NEWS.am SPORT-ին Facebook-ում, Twitter և Telegram-ում