Երեւանում ընթացող կիոկուշին կարատեի Եվրոպայի առաջնությանը նախապես հայտավորված թուրք մարզիկները այդպես էլ չեն ժամանել. Հայաստան գալու հետ կապված ինչ-որ խնդիրներ են առաջացել:
Այս մասին NEWS.am Sport-ի թղթակցի հետ զրույցում ասաց Հայաստանի կիոկուշին կարատեի ֆեդերացիայի նախագահ Անդրանիկ Հակոբյանը:
Ապրիլի 7-8-ը Երեւանում անցկացվում է կիոկուշին կարատեի Եվրոպայի առաջնություն՝ Հայասանի սպորտի նախարարության, ՀԱՕԿ-ի եւ Երեւանի քաղաքապետարանի աջակցությամբ:
Ապրիլի 8-ին կայացավ առաջնության բացման հանդիսավոր արարողությունը (NEWS.am Sport Live): Մասնակցում է 27 պետությունների 700 մարզիկ: Առաջնությանը հետեւում է կիոկուշին կարատեի միջազգային ֆեդերացիայի փոխնախագահը եւ ներկայացուցիչները, Հայաստանում արեւելյան մարտարվեստների տարբեր ֆեդերացիաների նախագահներ ու անդամները: Սակայն Հայաստանում անցկացվող Եվրոպայի առաջնությանը այդպես էլ չներկայացան Հայաստանի սպորտի նախարար Հրաչյա Ռոստոմյանը, Երեւանի քաղաքապետ Տարոն Մարգարյանը, ներկա չէր նաեւ քաղաքապետի խորհրդական Գոռ Վարդանյանը, ով նույնպես հրավիրված է եղել եւ ում հետ վերջին շրջանում խնդիրներ ունեն արեւելյան մարտարվեստների հանրապետական ֆեդերացիաները:
«Եվրոպայի առաջնությունը կազմակերպել ենք բարձր մակարդակով: Ինքնագովազդ չհնչի, բայց Հայաստանում ես այսպիսի մարզական միջոցառում երբեւէ չեմ տեսել, որ այս մակարդակով անցկացվի: Ունենք 1000-ից ավել հյուրեր, բոլորը հիացած են մեր կազմակերպած միջոցառումից: Մասնակից երկրների թիվը պետք է լիներ 28, բայց Թուրքիայից հայտ ներկայացրած կարատեսիտների թիմը այդպես էլ չժամանեց, քանի որ Հայաստան գալու հետ կապված ինչ-ինչ խնդիրներ են առաջացել:
Մրցաշարը մեծ ստացվեց, նույնիսկ մեր պատկերացրածից մեծ: Դեռ, իհարկե, աշխատելու տեղ շատ ունենք, բայց բոլորիս սպասելիքները արդարացված են: Ուժեղ մարզիկներ են պայքարի մեջ: Հայ մարզիկները դեռեւս զիջում են իրենց տեխնիկայով, դեռ այդքան էլ ուժեղ չենք, բայց նոր եկող սերունդը մեզ դեռ շատ կուրախացնի բարձր արդյունքներով: Այլ երկրներում այս մարտարվեստն ավելի զարգացած է, քանի որ պետական մակարդակով աջակցությունը ավելի մեծ է, քան մեր երկրում: Հենց այս պատճառով մեծահասակների տարիքային խմբում հայ մարզիկները դեռ զիջում են: Այս մրցաշարով ցույց տվեցինք ամբողջ աշխարհին, որ մեր երկիրն էլ կարող է խոշոր մրցաշար ընդունել եւ բարձր մակարդակով անցկացնել»,- ասաց Անդրանիկ Հակոբյանը:
Լուսինե Շահբազյան
Ֆոտո՝ Էմմա Ասատրյան
Հետևեք NEWS.am SPORT-ին Facebook-ում, Twitter և Telegram-ում